MOLIA SE TAMAITAI FAIPISINISI E TOATASI I LE UTA O FAGU MALOSI

E toatasi se tamaitai faipisinisi ua faamautu mai e le sooupu o le Ofisa o Leoleo, le komesina lagolago ia Fauono Talalelei Tapu, ua molia I a latou suesuega o se uta oloa o pusa fagu ava malosi na auina mai I totonu o le atunuu, I ni auala faasolitulafono. O ia moliaga e aofia ai le taufaasese ma le tuuina mai o faamaumauga sese.

E le o mafai ona faalauiloa le igoa o lea tamaitai ona o lo o faagasolo pea suesuega, ae na faaalia e Fauono, o nei faamatalaga uma e mai le Ofisa o Tiute. O le silia ma le fa vaiaso talu ai na amata suesue ai lea mataupu ma maua ai le aumaia faanana o lea uta o pusa fagu ava malosi uisiki o le ituaiga o le VAT 999 Whiskey ma le Democrat Scotch Whiskey. E le gata e sese pepa na faaulufale mai ai I le atunuu, ae sa mafai foi ona aveeseina faanana mai luga o le uafu, e aunoa ma le uia o auala sa’o pe totogi lafoga ma tiute e silia ma le $200,000.

O le taimi nei ua toe maua le tele o ia fagu uisiki ma toe faafoi I le Ofisa o le Tiute, ao le tele lava e talitonu ua maea ona faatau e faleoloa I le atunuu. I se pepa o faamatalaga mai le Matagaluega o Tupe Maua lea e pulea o le Ofisa o le Tiute, ua faaalia ai e le ofisa sili o pulega, le susuga Pitolau Lusia Sefo Leau, o lo o faagasolo suesuega I itu uma o lenei mataupu pe le aofia ai nisi o le aufaigaluega.

TUUINA ATU LE TAIMI FAATAPULAA E FAUSIA AI LE FALEAOGA FOU MO SAGAGA

Ua tuuina atu nei e le Matagaluega o Aoga, Taaloga ma Aganuu se taimi faatapulaa mo le Aoga Maualuga a Sagaga, e faamautu mai ane ai se nofoaga e faatuina ma fausia ai le latou faleaoga fou, lea ua maea faamatuu ese se vaega seleni e fausia ai.

Na faaalia mai e le afioga i le Ofisa Sili o le matagaluega, le afioga ia Matafeo Falanaipupu Tanielu Aiafi, ua maea ona faailoa ane i le Komiti o lea aoga, o le masina fou, o Aperila lea, ua tuuina I ai e faamautu mai ai lea tulaga, ma e maea loa Aperila, e lua mea e agai I ai le Matagaluega; o le faaoga loa o le seleni mo le fausia o faleaoga a nisi afioaga, po o le agai loa o le malo e saili se fanua i totonu lava o le itumalo e le o lavelavea i ni mataupu tau faamasinoga, e faatuina ai le faleaoga.

O le masina o Iuni o le tausaga nei, e maea ai le taimi faatulagaina e tatau ona faaaogaina ai le tupe mo le poloketi lea o lo o I ai lea faleaoga.

FAAGASOLO I LE VAIASO FOU POLOKALAMA MO LE TETEE ATU I LE MUMU TUTUPA

O le Aso Lua o le vaiaso fou I le maea ai o le faamanatuina o le Eseta, o le a amata faagasolo ai se suesuega a le Matagaluega o le Soifua Maloloina, e saili ai le tulaga o I ai le ono aafia o le mamalu o le atunuu i le gasegase o le Mumu Tutupa.

O le a malaga taamilo alii ma tamaitai fomai, i aoga tulaga lua uma i le atunuu, e amata atu i le Vaimauga ma faasolo atu ai i Anoamaa seia so o uma Upolu, ona agai atu lea i Savaii i le maea ai o le tuuaga a le fanau i nai vaiaso o muamua. O le asiasiga ma le iloiloga o le a faia, e siaki ai na o tamaiti i le vasega muamua ma le lua, i le taimi o aoga.

O le vaiaso ua tuanai sa feiloai ai sui o le matagaluega ma pule aoga uma e faamanino le faatinoga o lea faamoemoe, ma tusi ua maea saunia e tufa mo le silafia e matua. O nai tausaga ua tuanai na faia ai le inumaga o fualaau e puipuia ai le atunuu mai i le siama o le mumu, o lo o feaveai e namu, ma i le maea ai o le iloiloga o le a faia nei, ona mautu ai lea o se faaiuga, pe ono toe faia se faainumaga o fualaau o le mumu mo le atunuu atoa, pe na o ni nai vaega, e fua i le taunuuga o le suesuega.

TOALUA TAMAITI AOGA UA PULE I O LA SOIFUA

Na pule I lona soifua se alii sa aoga I le aoga o matata eseese a Ausetalia ma le Pasefika, le APTC I le Papaigalagala I ni nai aso ao loma lona faauuga. O lea alii e mai le afioaga o Manono-tai ma e maua atu o tautau mai I totonu o se potu o le aoga ua sisi lava e ia lona ua.

O le ua maliu sa aoga I tomai tau kuka po o le gaseseina o mea taumafa eseese ma sa alala o ia I le lotoa o le aoga faatasi ma isi tamaiti aoga mai atunuu esese o le Pasefika. Na faaalia e ana uo I le aoga, e leiloa pe o se feeseeseaiga ma se tamaitai o le aoga sa fai se la faigauo ua oo ina pule ai o ia I lona ola.

I se isi faalavelave e ese mai, na pule ai foi se teineititi aoga mai se aoga e lalata I Apia I lona soifua ma o le vaiaso na tea nei sa faataunuu ai ona toe sauniga. O lo o suesueina e leoleo ia faalavelave.

TASI LE MANUMALO TASI LE MALOLO A LE SAMOA ‘A’ I NIU SILA

O le Aso Tofi nei le taaloga lona tolu o le taaloga faaiu foi lea a le au lakapi o le Samoa ‘A’ i totonu o Niu Sila, i le maea ai o le latou taaloga lona lua i le faaiuga o le vaiaso i le taamilosaga o le PRC poo le Ipu a le Pasefika ma le au lona lua a le Crusaders.

E le i manuia le taumafaiga a le Samoa ‘A’ ina ua malolo i ai e 27, i le 30 a le Crusaders Knights. O le latou uluai taaloga i Niu Sila na manumalo ai i le au lona lua a le Blues a Aukilani, ma ua tasi le manumalo tasi le malolo, a o talia ai le taaloga ma le au lona lua a le Chiefs i le Aso Tofi. E pei ona silafia, o le tatou malaga taamilo mo le PRC lava i totonu o Ausetalia, e 1 le manumalo lua malolo, ma e taga tasi lava foi ma au a Toga ma Fiti lea  o loo malaga faatasi ma tatou.

O le au lona lua a le Crusaders lea na taaalo ma le Samoa ‘A’ i le faaiuga o le vaiaso na faia i Kalaiesetete i le aoauli o le aso Toonai. E toalima tama o le squad e fili mai ai le au tele a le Crusaders i le Supa 15 na taaalo i le aso Toonai, ma e toatolu alo o Samoa na taaalo mai ai i le Crusaders Knights, e I ai le alii o Jordan Taufua, o Seb Siataga ma Rameka Paraki. I le maea ai o le tatou taaloga i le Aso Tofi, ona taliu mai lea o le au i le Aso Toonai I le faaiuga o le vaiaso.

Saunia: Lilomaiava Andrew Fa’asau, Naenae Productions