Ads by Google Ads by Google

TALA MAi SAMOA

LE FIAFIA MATUA O TAMA TA’AALO O LE SAMOA ‘A’

 

Ua faaalia le le fiafia o matua o tama taaalo e toatolu o le au lakapi o le Samoa ‘A’ lea o lo o tausinio nei i le taamilosaga o le Ipu o le Pasefika, ona o le le maua o alauni o o latou alo.

 

Na faaalia e ia matua, e ui i se faaaliga faalauaitele a le Iuni Lakapi a Samoa i le leai o sana seleni, ae ua tatau lava i le Iuni ona foia lea faafitauli ae lei auina atu le au.

 

Na saunoa le tina o Meilan Meredith, e ui i sona le fiafia i le tulaga ua tulai mai nei, “Ae o le a le mea a le Iuni e mafai pe afai ua leai se tupe?” Fai mai a ia, ua tatau lava i le Iuni ona tagai faalelei i lea faafitauli ona o a matou fanau ia o lo o tu’i o latou tino mo le atunuu.

 

Na faaalia e lea tina, o lo o ia lafoina tupe i lana tama o Rudolph lea o lo o taalo ai i le au, “Ona ou te alofa i si au tama. E leai lava se matua e le alofa i sana tama o lo o malaga i lea au.”

 

FAALEAOGA TAUOFOGA MUAMUA MO LE FAUSIA O LE MAKETI I FUGALEI

 

Ua talosagaina e le malo ia kamupani sa tauofo mo le fausia o le maketi i Fuaglei ina ia toe tuuina atu ni a latou tauofoga fou, ona ua faaleaoga e le malo tauofoga muamua i ana taumafaiga ina ia faaititia le tau o le galuega i le $10 miliona tala.

 

O lea faaiuga na faamaonia e le Minisita o Tupe, le afioga Faumuina Tiatia Liuga i le au tusitala ma sa ia saunoa ai, ua maea foi ona suesueina auiliili e le malo ia faasea e faapea o lo o aofia nisi o minisita lagolago i ia tauofoga, ma ua maea foi ona faia le tulaga e ao ona fai i lalo o taiala ma tulafono a le malo.

 

Na saunoa Faumuina, sa logoina o ia e uiga i nei minisita lagolago o lo o fai paaga ma nisi o le au fai pisinisi, ma ua uma foi ona logoina i latou e le mafai ona latou auai i ia tauofoga.

 

O le faaititia o le tau o le galuega i le $20 miliona tala, ona o fuafuaga a le malo e suia le ata o le galuega ma o le a le taunuu ona faafogafalelua e pei ona sa fuafua i ai. Na saunoa le alii minisita, ua mafua lea faiga ina ia mafai ai ona ausia e le au faifaatoaga le totogi e faatau ai a latou fua o faaeleleaga i le maketi.

 

FALEPUIPUI I LE FAIAIGA FAAMALOSI MA SE TEINEITITI E NA O LE 10 TAUSAGA

 

E 12 tausaga ua nofosala ai nei i le toese se tama e 35 tausaga ina ua faamaonia moliaga e lua o le faiaiga faamalosi i se teineititi e na o le 10 tausaga. Ua le mafai ona faalauiloa faalauaitele le igoa o lea alii ona o puipuiga a le Faamasinoga i le laititi o tausaga o le sa aafia.

 

Na faaalia i faamaumauga a le Faamasinoga e faapea, o le ua molia ua faaipoipo ae leai sana fanau, ae o le teineitit, o le tama a le tausoga a lona toalua.  I se tolaulauga a le itu a leoleo na faaalia ai e faapea, o le masina o Me 2012 na tulai mai ai lea soligatulafono ma e faalua ona faiaiga faamalosi le ua molia i lea teineititi.

 

Na iloa e le aiga le mea ua tupu ina ua fesiligia le teineititi pe aisea ua faaletonu ai lana savali, ma sa logoina loa leoleo. “O lou faia o lenei amioga i lenei teineititi ua e aveesea ai lona mamalu faaletamaitai ma oo ai lona mafaufau i mea leaga,” o le saunoaga lea a Faamasino Vui Clarence Nelson i le taimi na lauina ai le faasalaga a le ua molia.

 

SUESUE PO O AI NA FAALEAGAINA LAINA TELEFONI A LE BLUE SKY

 

O lo o suesueina e leoleo po o ai na faaleagaina laina telefoni tetele a le kamupani o le Blue Sky i le auala laupapa i Lelata.  I se talanoaga ma le susuga Toleafoa Tiafau Douglas Creevey o le Blue Sky na ia ai, e le gata ua aafia ai le latou auaunaga mo nuu ma afioaga aemaise a latou paaga i le itumalo Vaimauga, ae o le a tele foi tupe ma le taimi o le a toe faaalu i le faaleleia o ia mea totino.

 

O le Aso Toonai na tea nei faatoa iloa ai e le kamupani telefoni lea faaletonu ina ua valaau atu nisi i a latou laina telefoni ua le ola. Sa amata ai loa a latou suesuega ma maua ai le tele o paipa tetele o lo o i ai i totonu laina telefoni i le auala laupapa i Lelata ua matua faaleagaina uma.

 

FAALEAOGA MOLIAGA O NIULEVAEA ROPATI

 

Ua leai se faasalaga faafalepuipui faasaga i se tama faipisinisi na molia mai i moliaga e fa o le umia o fualaau faasaina e aofia ai le mariuana ma le aisa, ae ua faatonuina o ia e totogi le $6,500 i totonu o le lua vaiaso, a leai, ua loka loa mo le 6 masina.

 

Na molia Niulevaea Ropati ina ua osofaia e leoleo le nofoaga o lana pisinisi i Pesega ma latou maua ai ia laau faasaina ma ua silia nei ma le lima masina o taofia o ia i Tafaigata.

 

Na fautua malosi le afioga Faamasino Vui Clarence Nelson i lea alii faipisinisi ona o le tomai ma le agavaa o lo o ia te ia, e tatau ona faaaoga tatau aua e tele foi lona sao i le tautuaina o le atunuu e ala i lana pisinisi.

 

Saunia: Lilomaiava Andrew Fa’asau, Naenae Productions