UMA LE AFA AE SAU LE PEFU

O se tasi o faafitauli tele ua feagai nei ma le toatele o aiga i Samoa ina ua tuanai le afa o Evan i le lua vaiaso talu ai, o le tele lea o le pefu i vaega eseese o le atunuu, aemaise lava i nofoaga o lo o tele taavale e feoa’i solo ai.

I le taulaga i Apia e pei o le faasolo atu i Saleufi, Taufusi, Savalalo ma Matautu ua taua mai ai le faatupulaia o le pefu i luga o le alatele, ona o le palapala o lo o to’a ai ina ua tuana’i tafega, ma ua amata ona mago i le la, ma alia’e mai ai loa le faafitauli o le pefu e pei ona maitauina i le taimi nei.

I le tulai mai ai o lea faafitauli, ua fautuaina ai e le Matagaluega o le Soifua Maloloina a Samoa le atunuu ina ia tausisi i le soifua maloloina ma le saogalemu, ma ia ufiufi o latou fofoga i taimi uma e galulue ai mo le faamamaina o le otaota ma le palapala i luma o fale faapea ai tafatafa o le alatele.

O lo o faaauau pea lava i le taimi nei asiasiga a komiti o fesoasoani ma le ofoina atu o le soifua maloloina i nofoaga sa sili ona pagatia i le matagi ma le suavai.

O ni isi o aiga ua maea ona faaoo atu a latou faamaumauga i lea komiti, mo le aofai o mea sa faaleagaina i totonu o a latou aiga, ma ua sauni ai foi le malo e tuuina atu i ai se fesoasoani.

FAAIU I LE FALEMAI SE VEVESI NA MAFUA MAI I LUGA O LE FACEBOOK

O se feeseeseaiga o upu i le va o se alii e 18 tausaga le matua mai Iva ma se tamaitai la te nuu faatasi, na faaiu i le falemai ina ua tui e le tamaitai lea le manava o le alii 18 tausaga i se naifi (tulou), ma manaomia ai filo e 7 e su’i ai le manu’a sa i le manava o lea alii.

Na taua e le alii na aafia o Vaasilitino Leauanae e faapea, o le vevesi i le va o ia ma le tamaitai lea na mafua mai i ni faamatalaga sa faia i luga o le facebook, ma o ni isi o ia faaupuga e lei manaia i le faitau ma le maitau a ni isi o la uo.

I le aso Toonai na tea nei ina ua alu e fai lana faatau i Salelavalu, sa ia vaaia ai se taavale ua paka i luma o le faleoloa, ma ia vaaia ai le tamaitai lea ua savali atu ia te ia ma amata loa le la taugaupu.

O le musu o lenei alii i le vevesi ma le isi itu o lo o toatele tagata o loo matamata atu, na mafua ai ona fai atu i le mafine lea, sei alu e fai lana faatau, peitai ao faia lana faatau, sa ia faalogoina se mea maai o pai atu i lona papatua, ina ua faliu i tua, sa ia vaaia ai le mafine lea o lo o ia tuiina o ia, o lea na ia taumafai ai loa e fusu atu i ai, peitai sa ia toe faalogoina le isi tui ua tau i lona manava, ma ia lagonaina ai le tiga, ae sa taumafai pea e fusu atu i ai, seia oo lava ina matapogia ma ua ia le iloa se mea.

Na taua e le alii o Leauanae le ee o le faatauoloa ma mafua ai loa ona laga atu tagata mo se fesoasoani ma auina atu ai loa o ia i le falemai mo togafitiga.

Ua maea ona faila le tagi a le aiga o Leauanae i luma o le faamasinoga, ma ua faamoemoe o le masina fou e fofogaina ai lenei mataupu, ae o le taimi nei, ua faasala e le afioaga o Iva le tamaitai na faatinoina le solitulafono e ala i lo latou totogiina lea o se salatupe e $2,000.

FALEPUIPUI DR. PUNI MO LE 12 MASINA

E 12 masina lea ua faasala ai e le Faamasinoga Maualuga i Samoa le alii fomai o Dr. Emosi Puni, ina ua faamaonia e le faamasinoga le moliaga o lona faia lea o ni uiga mataga i se tina maitaga sa alu atu e siaki lona manava e le alii fomai.

O le susuga Dr. Puni e le gata o se tasi o fomai sinia i totonu o Samoa, ae sa avea muamua foi o ia ma pule o le falemai tumaoti o le Medcen Hospital i Vailima mo le tele o tausaga o lana auaunaga faafomai.

O le mataupu lenei na tulai mai i le 7 tausaga talu ai, peitai o lea faatoa faila ma faamaonia i luma o le faamasinoga.

Ao lei tuuina maia le faasalaga a le faamasinoga, na afea i le silasila a le alii faamasino ni isi o itu taua e faatatau i lenei mataupu, e pei o le tulaga lea ua oo i ai le alii fomai ma lona aiga ina ua faasala e le nuu, atoa ai ma le tupe e $1,000 sa tuuina atu e le aiga o le fomai i le aiga o le tina sa aafia i lenei mataupu, o lea faaleleiga sa faia lea ina ua toe lua aso lau le faasalaga a le alii fomai.

Ina ua tausala e le faamasinoga le moliaga na tuuaia ai le alii fomai o Dr. Puni, sa faila ai loa e lana loia o Tagaloa Enoka Puni se talosaga apili e toe apili ai le faaiuga, peitai i le masina o Novema na tea nei, na tuuina mai ai le faaiuga a le faamasinoga apili ua teena le talosaga.

O le alii faamasino ia Pierre Slicer na tuuina maia le faasalaga o Dr. Puni, ina ua maea ona iloilo e le alii faamasino mau faamaonia uma faasaga i lenei mataupu.

TULAGA LEAGA PEA LE TAU I SAMOA

O lo o maitauina pea tulaga leaga o le tau i Samoa ma Fiti i le taimi nei, ina ua maea ona faalauiloa mai ni isi foi o taaviliga o matagi malolosi ua faamalumalu mai i luga o ia atunuu.

I le tuanai ai o le afa malosi o Evan, na toe ripotia mai ai e le Ofisa o le Vaaitau le tumau pea lea o ni isi o matagi malolosi i luga o le atu Samoa, ma faasolosolo atu ai i isi atunuu o le Pasefika e aofia ai Fiti.

O matagi malolosi o loo agiagi mai pea i ni isi o taimi ua faaigoaina o Cyclone Freda, ma o le matagi lea ua faailoa mai ina ua tuanai cyclone Evan, ae ui i ripoti mo isi foi matagi malolosi, e le o taofia ai galuega fesoasoani mo nuu o lo o aafia i Samoa i le taimi nei.

O lo o faaauau pea ona tufatufa atu taumafa ma faguvai mo aiga o lo o mafatia i Samoa, i le taimi lava e taunuu mai ai fesoasoani mai malo tuaoi e pei o Niu Sila, Ausetalia ma Amerika Samoa.

O le taimi nei i Samoa, o lo o tumau pea le aofai o tagata sa maliliu i le afa i le toa 5, e aofia ai ma le toa 11 na leiloloa i luga o le sami. O lea aofaiga e aofia ai le toa 9 sa leiloloa i luga o le sami ma le toalua na tafefea i le malolosi o tafega i le taulaga o Apia, ae mo le atunuu o Fiti, e na o le toatasi ua faamaonia mai na maliu i le afa o Evan ina ua aafia ai Fiti ina ua maea ona aafia ai Samoa.

OSOFAI SE ALII I SE AGAESE A’O MOE

O se alii e 19 tausaga mai Vailele ma Lotofaga, ua ia faitauina nei fetu laki o lona olaga ina ua toe faasaoina mai o ia i se faalavelave na semanu a oti ai, ina ua osofaia e ni alii se toalua o ia i ni agaese ao moe i lo latou fale sa faaleagaina i le afa o Evan i Lotofaga i le vaiaso na tea nei.

Na taua e se ulugalii i le Samoa Observer e faapea, na faateia i laua ina ua la faalogoina se tagata o lo o ee mai i le fia ola, ma la vaaia ai le alii o Kaio Simi o tamoe agai atu i lo latou fale ma lona tino ua lilo uma i le toto.

Na taumafai le ulugalii agalelei lea e momoli Simi i le falemai peitai sa matapogia o ia i luga o le ala ao agai atu le taavale i le falemai.

O le taiminei, e le o iloa lava e le alii o Simi le mafuaaga na osofaia ai o ia e nei taulelea. Sa ia faamatala i le Samoa Observer e faapea, na te le iloaina se mea na tupu, o ia sa moe i lo latou fale i Lotofaga, peitai na tei ina ua ia faalogoina le tiga o lona tino, ma ia vaaia ai ni alii ma ni agaese o lo o la osofaia o ia.

E 4 tamatama’i lima o le isi lima o Simi ua motu ese (tulou), ina ua aafia lona lima i lea osofaiga, faatasi ai ma lona papatua, o le isi ona lima ma ona foliga na matua faaleagaina i lea osofaiga.

O le taimi nei, o lo o faaauau pea suesuega a leoleo e uiga i lenei mataupu, ae mo le aiga o le alii o Simi, e oo mai lava i le taimi nei e le o malamalama i latou i le mafuaaga o lenei faalavelave.

O lo o taofia pea Simi i le falemai ma ua agai ina atoatoa lona malosi i le taimi nei.

faaliliu: Ausage Fausia