SAILIA PEA LE TINO O LE ALII FAIFAIVA NA LEILOA

O lo o  tau sailia pea le tino o le alii faifaiva mai Saoluafata lea na sailia mai i le lua vaiaso talu ai. Na taua e le aiga o lea alii o le a toe maua mai lona tino. Na taua e se sui o le aiga o le alii o loo leiloa o Vaivao Tusigaigoa e faapea, o lo o galulue pea ni isi o le latou aiga i le tau sailia o le tino o lenei alii, ma afai ae maea le vaiaso lenei e lei maua lava, ona fuafua loa lea o ona toe  sauniga e faia i le vaiaso fou.

O Tusigaigoa na o ma le isi alii faifaiva o Savelio e tatao le la upega i gatai lava o Saoluafata, peitai na taua e Savelio, sa ia maulu e asi le upega ae faatali atu Vaivao i le vaa. Sa fai si umi o maulu, ae manu ifo ua mamao le mea ua tafea i ai le paopao ma Vaivao a ua to faata’uta’u le savili ma ua sou foi le sami. Fai mai a ia, ua ia fiu e taumafai atu i le vaa a ua tafea lava ma sa iu ina faatafea ai ma ia ona ua ia lelava. Sa faatafea o ia i le au ma iu ina toe manu ifo i le matafaga ae ua leiloa le Vaivao ma le paopao.

TALIU I FANUA MALAGA TAAMILO MANU SAMOA I EUROPA

O le aso Faraile na sei mavae atu nei na faatinoina ai se faaafe a le malo e faafeiloai aloaia ai le taunuu ma le manuia mai i fanua o le faigamalaga a le Manu Samoa mai Europa. I lana saunoaga, na faaalia e le alii faiaoga, le susuga Stephen Betham, ua a’e ma le manuia le latou faigamalaga i le alofa o le Atua ma le tapuaiga mamalu a le atunuu sa tui atu le muli papaga.

Fai mai a ia, e ui na malolo le Manu Samoa ia Farani, ae ua ausia le tulaga sa latou taumafai i ai, o le siitia lea o le tulaga o le Manu Samoa i le faatulagaga o au o le lalolagi. Ua see atu nei le Manu Samoa i le tulaga valu i le faatulagaga o au a le IRB. Na saunoa Betham, o le ausia o le tulaga valu, o lona uiga o le a i ai au e maualalo atu i totonu o le pulu e i ai le Manu Samoa i le isi taamilosaga o le ipu o le lalolagi.

E le gata i lea, o le a umi le va i taaloga toe faaopopoina foi ia alagatupe fesoasoani mai le IRB mo le atinaeina o le taaloga. Na saunoa foi le taitai Malaga, le susuga Leota Namulauulu Sami Leota ma na ia faaalia e faapea, na tele foi kalapu sa mananao i ni konekarate ma le toatele o tama taaalo o le au.

TAOFIA DR. EMOSI PUNI TALIA AI LAUINA LONA FAASALAGA

Ua poloaia e le Faamasinoga Maualuga le taofia o le alii fomai o Le Mamea Dr. Emosi Puni e talia ai le aso e lauina lona faasalaga i le moliaga ua faamaonia nei faasaga ia te ia, o le faaoolima mataga.

O lenei mataupu na tulai mai i le tausaga e 2005 ina ua faaulu le tagi a se tina maitaga sa oo atu i le falemai tumaoti o le MedCen i Vailima mo lana siaki masani, ae faatino ai e Dr. Puni ni uiga mataga faafeusuaiga ia te ia. O le aso 12 o Tesema ua toe tolopo i ai lenei mataupu.

TOLOPO LE TOE LAUINA O SE FAASALAGA MULITALO SIAFAUSA

Ua toe tolopo i le aso 14 o Tesema le mataupu sa molia ai le sa avea ma minisita o le kapeneta, o Mulitalo Siafausa, lea o le a toe lauina ai e le Faamasinoga Maualuga se faasalaga talafeagai e pei ona faatonuina ai e le Faamasinoga o Apili I le vaiaso na tea nei.

Na teena e le Faamasinoga o Apili le apili a Mulitalo, ma sa toe iloilo e faamasino e toatolu le faaiuga a le Faamasinoga Maualuga lea sa faasalaina ai Mulitalo e na te faatinoina ni galuega mo le lelei lautele po o le community service, atoa ma le tuutuuga e totogi le tinoitupe e $3,000 i le tamaitai sa tagi i lenei mataupu, o se faasalaga le talafeagai mo se tagata e faamaonia ni moliaga tau feusuaiga e pei ona sa molia ai Mulitalo.

O le faaiuga aloaia a le Faamasinoga o Apili e pei ona lauina i le aso Faraile ananafi, e faaleaogaina le apili a le itu tetee ma toe poloaina le Faamasinoga Maualuga a Samoa e toe iloilo lana faaiuga na faia muamua e tusa ma faiga faavae o lo o i lalo o le tulafono o soligatulafono 1972.

TETEE MILLENIA HOTEL FAUSIA FALESA WORSHIP CENTER

O le vaiaso nei na faagasolo ai i le Faamasinoga Maualuga le mataupu i le va o le pulega a le faletalimalo o le Millenia I Sogi ma le Ekalesia Worship Center, lea o lo o tetee ai le pulega o le Millenia Hotel i le fausia o le malumalu tapuai o le Ekalesia Worship Center i le fanua e tuaoi ma lea faletalimalo i Sogi.

O le 2009 na amata ai suesuega i lea mataupu na mafua ina ua faitio le pulega o le Millenia Hotel i le leoleoa o tapuaiga a le ekalesia ma sa faaalia e le alii pule, le susuga Tuala Oli Ah Him, e le o se tulaga lelei lea mo a latou malo, aemaise i latou o lo o fia maua se malolo. O le vaiaso nei na faia ai le folasaga a Tuala i le faamasinoga e uiga i lana tagi ua faaulu e faasaga i le ofisa o le PUMA po o le Planning and Urban Management Agency, lea sa tuuina atu le pemita e fausia ai le malumalu tapuai a le Ekalesia Worship Center. Ua maea foi ona molimau le taitai o le ekalesia, le susuga i le faafeagaiga ia Viliamu Mafo’e faapea ia inisinia ma i latou o lo o tusia le ata o le malumalu fogafale tolu a le ekalesia o lo o fuafua e fausia, ma ua latou tautino foi le leai o ni aafiaga o le filemu mo malo a le faletalimalo.

Saunia: L.A.F./Naenae Productions