Ads by Google Ads by Google

TALA MAi SAMOA

TUUAIA I LE TAUMAFAI E FASiOTI LANA PA’AGA FAAPOULIULI

 

Ua tulai i luma o Faamasino Sili Patu Tiavaasue Falefatu Sapolu se alii sa avea ma Fesoasoani Katoliko e tali i le moliaga o le taumafai e fasioti se tagata. O lea alii o Lafaele Suluape Talatonu, e 45 tausaga o Faleaseela, Lefaga, o lo o tuuaia i lona susunuina o se taavale na ono uma ai le soifua o le tamaitai sa la nonofo faapouliuli, o Sui Tuiafiso o Foaluga, Savaii, i le tausaga na tea nei. Na molimau le ua molia, o Sui o se tagata fua tele ma e ita pe a alu o ia e asi lana fanau i lona toalua faaipoipo.

 

Sa la vevesi foi i le isi aso ina ua faalogo Sui i le la talanoaga ma lona uso o Masina, ma sa fai atu Masina ia te ia e tiai lea fafine ae toe foi i lona toalua ma lana fanau. O le aso na sosoo ai sa ia faalogo ai ia Sui o talanoa i le telefoni ma sa tau atu e Sui ia te ia mulimuli ane, sa talanoa o ia i ona tuagane ma o le a omai i laua ma laau malsoi e fasioti ai le ua molia. Sa fefe o ia ma sa fai atu Sui ia te ia la te o i se nofoaga e le iloa e ona tuagane.

 

O lea sa la o ai loa i Saanapu-tai ma la momoe ai. ina ua o i le aso na sosoo ai, sa manao le ua molia la te o i le aiga o lona tina i Siufaga, Falelatai, ae sa fai atu Sui o lo o faatali mai ai ona tuagane. Sa faapea loa ona la o i Samatau. Na molimau Sui, sa ia vaaia o tuu e le ua molia se fagu penisini i totonu o le taavale. Fai mai a ia, sa faataga moe o ia, ae tei ua ia faalogoina le pa o se mea ma faafuasei le sasao ane o le afi. Na faaalia e ia, sa oso i fafo le ua molia ae tiai o ia i totonu o le taavale, ma o lona toe malosi lava sa ia oso ese ai mai le taavale. O lo o faaauau pea lea faamasainoga.

 

TUILAEPA: “E LE O NI OU FANUA”

 

Na tuusao saunoaga a le alii palemia, le susuga Tuilaepa Sailele Malielegaoi ina ua ia tali atu i faitioga a le taitai o le itu Agai, le afioga Palusalue Faapo ii e faatatau i fanua i Mulivai, Safata lea o lo o faamoemoe e fausia ai e se kamupani mai Saina se casino.

 

“E le o ni ona fanua,” o a Tuilaepa lea. “Ma e le talanoa le malo i ni tagata e leai ni o latou aia i ia fanua.”

 

Na faaalia e Palusalue, e le i logoina muamua e le malo le fono a tamalii ma failauga o Mulivai, Safata e uiga i lea fuafuaga. E le gata i lena, na te le iloa po o fea a maua ai se 500 eka i Mulivai e faatuina ai lea faamoemoe. Peitai o lo o tuuaia e Tuilaepa ia Palusalue i lona taumafai e save’u le filemu. Fai mai a ia, o lo o taumafai le taitai o le itu Agai e faatupu se vevesi ina ia aua ai nei fausia le casino i Mulivai.

 

Na faaalia e Tuilaepa, e le o popole i ai aua ua maea ona la talanoa ma le afioga Leota Su’atele Manusegi, o le faauluuluga o matai o lea vaega o le afioaga ma ua malie atu o ia i lea fuafuaga a le malo. Na ia faaalia foi, e tolu isi nofoaga o lo o faaleoleo mo le fausia ai o lea atinae ma a le taunuu ona faia i Mulivai, o le a faia i se tasi o ia nofoaga.

 

MALIU LE ALII FAIPISINISI ILOGA O POLO

 

O le taeao o le aso Sa na tea nei na tapunia ai se tasi o vaega o le olaga faapisinisi i Samoa ina ua maliu filemu se tasi o alii faipisinisi iloga o le atunuu, le susuga Norman S. Paul. E pei ona silafia, o lea alii faipisinisi sa faatautaia le kamupani pasi o le Gold Star lea sa faavaeina e lona tama o Eugene F. Paul ma e leai se isi sa soifua i tausaga ua mavae i Samoa e le silafia pasi afimutu a Polo e pei ona lauiloa ai.

 

E le gata i lea o le fale tifaga o le Tivoli sa masani ai le atunuu i tausaga ua mavae aua na o le pau lea o le fale tifaga i na aso. Sa taulamua foi lea tamalii i le faatoa faavaeina o le kamupani vaalele a Samoa, le Polenisia ma sa avea foi o ia ma faatonu o le NPF. Sa avea foi o ia ma sui aloaia mo le malo Farani i Samoa seia oo i le tausaga e 2000. Ae le gata i ana mau pisinisi sa faia, o ia foi o se tagata sa fiafia tele i taaloga e pei o le ta polo ma le lakapi.

 

E maliu Norman S. Paul ua 84 tausaga o lona soifua. O lo o soifua pea lona faletua o Frieda Paul, o la alo e toaono, o fanau o la alo e toa 24, ma fanau o fanau o la alo e toa 25. O le aso Tofi na lagomau ai o ia i lona oliolisaga tumau i lona aiga i Vaoala.

 

TOE TOLO LE LAUINA O LE FAASALAGA O LE ALII NA MAUA AI AISA MA MARIUANA

 

Ua le mafai nei e le alii faamasino o Lesatele Rapi Vaai ona faia se faaiuga i le faamasinoga o se alii faipisinisi na molia i moliaga o le umia o ni fualaau faasaina e aofia le mariuana. Na faamanino e le alii faamasino i le taeao o le aso Gafua na sei mavae atu nei lona le mafia ona faia o se faaiuga o lea faamasinoga ona e masani lelei i le ua molia.

 

O le ua molia o Niulevaea Ropati o se alii faipisinisi mai le afioaga o Faleula-uta na molia ina ua osofaia e leoleo lona fale i le tausaga na tea nei ma maua ai fualaau faasaina o le aisa ma le mariuana. Ua savalia nei le ono masina o taofia pea o ia i le toese i Tafaigata. O lo o masalomia e leoleo o le fualaau faasaina o le aisa sa maua ma ni paipa tioata e ula ai, sa gaosia lava i Samoa.

 

Ua toe tolopo nei lea mataupu i le aso 18 o le masina nei ma ua tuuina atu nei le faia o se faaiuga i le afioga Vui Clarence Nelson lea o lo o faimalologa i Niu Sila i le taimi nei.

 

saunia: Lilomaiava Andrew Fa’asau, Naenae Productions