Ads by Google Ads by Google

TALA MAI SAMOA

FAAMANINO LEOLEO I LATOU FAASA ONA FAATAU SAVALI OLOA

 

Ua tali mai le afioga i le alii komesina lagolago o le Matagaluega o Leoleo ma Falepuipui, e faapea, e le o faasaina e le matagaluega i latou o lo o faatau savali a latou oloa, e pei o se vaaiga masani i le talafatai i Apia i aso uma. O le vaiaso na tea nei na saunoa tuusao ai le afioga i le alii palemia i luga o lana polokalame ma le 2AP, ma ia fautuaina ai leoleo, e leai se mea o le a faasaina ai fua i latou o lo o faatau a latou oloa, aua le sailiga o tupe mo le tausiga o latou aiga.

 

Na faamanino mai e le afioga ia Leaupepe, latou te le o faasaina i latou o lo o faatau savali a latou oloa, seia vagana ai i latou o lo o faatau savali oloa e le o faatagaina i lalo o le tulafono e pei o apainu, pepa kuisi ma isi oloa gaosi mai fafo.

 

FAAOPOPO SELENI EFKS MO ONA SUI NA MAFATIA AFA

 

O le a i ai le faaopopoga o le seleni a le Ekalesia Faapotopotoga Kerisiano i Samoa e faamatuu atu i aiga o le ekalesia na aafia i le afa o Eveni i le faaiuga o le tausaga ua tuanai. Na faailoa mai e le failautusi aoao o le ekalesia le susuga Rev. Dr. Iutisone Salevao e faapea, e $80,000 tala le tinoitupe ua maea ona faasoa atu i sui o le ekalesia i nuu ma afioaga faapea nisi o atinae a le ekalesia mo galuega toe faaleleia i le taimi na faatoa uma ai le afa.

 

Peitai na faaalia e le susuga i le faafeagaiga, e le mafai ona sili atu le seleni e faamatuu atu mo sui o le ekalesia o lo o moomia le fesoasoani, seiloga e auina atu se talosaga mo se seleni faaopopo i luma o le Fono Tele ia Me e pei ona masani ai i tausaga taitasi. Na saunoa le failautusi aoao, o le aofaiga o le seleni faaopopo o le a talosagaina e $1.8 miliona tala

 

 

FUAFUA FAUSIAINA CASINO LONA LUA I MULIVAI, SAFATA

 

Ua faailoa mai e le alii palemia, le susuga Tuilaepa Sailele Malielegaoi le nofoaga o le a faatuina ai le faletalimalo a le ETG po o le  kamupani o le Exhibition Tourism Group mai Saina, lea o le a faatautaia le isi casino e ese mai le casino o le a faatautaia e le faletalimalo o le Aggie Greys Resort i Mulifanua. Na saunoa le alii palemia, o lea atinae tele o le a faatuina lea i le afioaga o Mulivai, Safata.

 

E pei ona silafia, na o le lua laisene tau casino e pei ona aiaia i lalo o le tulafono ua faamatuu atu nei e le pulega o petipetiga a le atunuu i le faletalimalo o Aggie Greys ma le kamupani lenei o le ETG mai Saina. Na faaalia e le palemia, ua maea ona faamautu tulaga moomia uma mo le faatuina o lea atinae tele lea o le a fausia i luga o le 500 eka o fanua o Mulivai, Safata.

 

TOE MAUA PAGOTA NA SOSOLA

 

Ua toe maua e leoleo ni pagota na sosola i le faaiuga o le vaiaso na tea nei. Na faaalia e le komesina lagolago, le afioga Leaupepe Fatu Pula e faapea, o ia pagota o ni alii se toalua ma na toe maua lava e leoleo i le aso na sosoo ai. O lea tulaga na ia faaalia le tulai mai pea i le tele o taimi, ma e ui o lo o saogalemu ma malu puipuia le toese i Tafaigata i le taimi nei, peitai e i ai lava i latou e le usitaia faatonuga ma taiala o le toese. O nisi foi o pagota o lo o mafaufau pea i taimi uma e sosola, peitai o lo o lelei faatinoina galuega tau le puipuiga a malu o le malo.

 

FA’AMALAMALAMA FAILAUTUSI EFKS FILIFILIA O TUIASAU

 

Ua tali mai ma faamanino e le failautusi o le Ekalesia Faapotopotoga Kerisiano i Samoa, le susuga i le faafeagaiga Rev. Dr. Iutisone Salevao, le filifilia ai o le afioga Tuiasau Leota Uelese Petaia, lea sa faafalepuipuiina i moliaga o le gaoi, e avea ma faauluuluga o le leitio ma le TV a le ekalesia lea o le a faatuina nei.

 

Na fesiligia le susuga i le alii failautusi i le mafuaaga na filifilia ai le afioga Tuiasau ma na ia faaalia, e le o toe po malae ile mea na tupu ao avea Tuiasau ma faauluuluga o le LauTV, ma o lona silafia, e lei matuia tele moliaga na faafalepuipuiina ai o ia. Fai mai a ia, o le faaletonu o le tulaga o le faatinoga o tupe o lana pisinisi na mafua ai le faafitauli. Na ia faamalamalamaina foi e faapea, o le a le loteina foi e Tuiasau le itu tau seleni i le leitio ma le TV a le ekalesia o le a faatuina, aua o le TV o lo o faatuina fua foi e aunoa ma se tupe a le ekalesia o lo o faaaluina ai I se fesoasoani mai fafo.

 

SAUNIA: Lilomaiava Andrew Fa’asau, Naenae Productions