SII TOTOGI O FAIAOGA A AOGA EFKS

Ua amata i le tausaga nei le siitaga e 30 pasene i totogi o faiaoga o aoga uma a le Ekalesia Faapotopotoga Kerisiano i Samoa mo le umi e tolu tausaga. E 10 pasene le siitaga mo le tausaga nei, ma o le a faapea foi ona faia i leisi lua tausaga o i luma.

O le itu tau aoaoga a le ekalesia o lo o tele se vaega tupe o lo o faaaluina ai, pe tusa ma le sili laititi atu ma le tasi vae tolu o faiga taulaga atoa e faaaluina ai.

O le siitaga mo totogi o faiaoga ua maea pasia e le Fono Tele ma o se tasi o faamuamua a le ekalesia o le itu lea tau aoaoga mo le fanau, aemaise o le faatupulaia o le fuainumera o tamaiti aoga e le gata o alo ma fanau lava a le ekalesia, ae faapea foi tamaiti mai i isi ekalesia.

Na faaalia e le taitaifono o le Komiti o Tupe a le ekalesia, le afioga i le minisita ia Le Mamea Ropati Mualia e faapea, e sili atu i le $10 miliona tala le seleni o faiga taulaga Samoa a le ekalesia i le faaiuga o le tausaga faaletupe, ma e ese mai lea i isi faiga taulaga e pei o le Au Leoleo ma Nuu Ese, ma o le aofaiga a toa e $14 miliona tala.

E le i mamao atu le asiasiga a le komiti i aoga uma a le ekalesia lea e aofia ai kolisi e lima o le Kolisi o Tuasivi i Savaii, Kolisi o Leulumoega Fou, Kolisi o Nuuausala, Maluafou ma Papauta. O lo o faagasolo foi galuega mo le faaleleia atili o ia aoga. O le siitia o totogi o faiaoga a le ekalesia o lo o faamoemoe le a uunaia ai le tulaga o aoga mo le fanau toe faatosina atu ai faiaoga lelei.

ILOILO PE RESITALA MO SOLIGATULAFONO MATAGA PE TALAFEAGAI

O le vaiaso nei o lo o i ai le fuafuaga a le Komisi o le Toe Fuataina o Tulafono e tatau maea ai le tuufaatasiga o pepa talafeagai mo le faatalanoaina lautele o le mataupu e uiga i le faia o se resitala  faalauaitele o i latou ua faamaonia le faia o solitulafono tau feusuaiga ma faaoogalima mataga. O lea mataupu na faatuina e se faamasino sinia o le Faamasinoga Maualuga ona o le faatupulaia pea o ia ituaiga solitulafono i totonu o le atunuu ma aafia ai le ituvai o tamaitai aemaise o le fanau teine laiti.

O lea manatu faatu na lagolagoina e le toatele o le atunuu e aofia ai taitai o nisi o ekalesia, ma o lea na tuuina atu ai loa e le loia sili i le komisi aua sana iloiloga ae lei tuuina atu lea mataupu i luma o le Kapeneta mo sana faaiuga. Na faaalia e le faatonu o le komisi, le tamaitai loia o Leilani Tuala, o le a tatala le avanoa mo folasaga mai le atunuu lautele e faaali ai o latou finagalo i lea mataupu, ma o le a aoao manogi le latou komisi ma silasila i itu uma o lenei mataupu ma ona aafiaga ona o se mataupu maaleale tele.

TAUAAO LE FOAI A LE BLUE SKY NA AOINA I AMERiKA SAMOA

E $21,236.00 tala Amerika le seleni na tauaaoina atu e le kamupani o le Blue Sky Samoa i sui o le malo Samoa e fesoasoani ai i galuega toe faaleleia i mea sa faaleagaina i le afa o Eveni. Na faaalia e le susuga Toleafoa Tiafau Douglas Creevy o le Blue Sky e faapea, o lea seleni na maua i se latou sailiga seleni na amata mai i Amerika Samoa ina ua faatoa maea le afa o Eveni i le tausaga na tea nei. E $11,236 tala Amerika le seleni na maua mai i le ma’au ma le milomilosia, aemaise le alofa tulai a le mamalu o le atunuu i Amerika Samoa.

Sa faapea ona faaopopo i ai e le kamupani o le Blue Sky Samoa le tinoitupe e $10,000 tala Amerika e tusa ai ma se latou poloaiga sa faia ao faagasolo lenei sailiga seleni i le teritori ma maua ai loa le aofaiga e $21,236 e pei ona foaiina atu i le malo.

MANUMALO TUALA PONIFASIO FAAMASINOGA MA LE SOSAIETE LOIA

Ua manumalo le alii loia o Tuala iosefo Ponifasio i le faamasinoga ma le Sosaiete o Loia a Samoa lea sa faagasolo i le Faamasinoga Maualuga i le vaiaso na tea nei. i le faaiuga na lauina e le afioga Faamasino Sili Patu Tiavaasue Falefatu Sapolu, na ia faailoa ai e faapea, e le i amiotonu le faaiuga a le sosaiete a loia lea na faamalolo ai mo le lua tausaga le laisene loia a le susuga Tuala Ponifasio.

O lea faaiuga na mafua mai i ni tuuaiga e faapea o lo o masalomia le faaaogaina faasolitulafono e Tuala o tupe a se faalapotopotoga. Na ioe Tuala i se tasi o ia moliaga e lua i luma o le Faamasinoga a loia. Na oo atu lenei mataupu i luma o le Faamasinoga o Apili lea sa toe poloaina lona toe iloiloina i luma o le Faamasinoga Maualuga.

Lilomaiava Andrew Fa’asau, Naenae Productions