TUUAIA LE MALO i LE MALIU O SE TINA FAIFAATOAGA

O le maliu o se tina fai faatoaga mai Safata ona o aafiaga o le mugala, timuga ma le pefu i le maketi le tumau i Fugalei lea sa faatau ai ana tau talo i le tele o aso, ua mafua ai le toatamai tele o sui o le Itu Agai o le palemene. Na saunoa le sui taitai, le afioga Aeau Peniamina Leavaise’eta, ua tatau ona avea le maliu o lenei tina ma mafuaaga e faavavevave ai e le malo le fausiaina o le maketi i Fugalei.

Ua finau isi sui o le Itu Agai, ua tatau lava i le malo ona tapunia loa le maketi le tumau i le fanua o le alii faipule, le afioga Toleafoa Faafisi i Fugalei, ina ia o uma ai le au faifaatoaga i le maketi fou i Vaitele. Na faaalia e Aeau, na maliu lea tina i lona aiga ma o le tuga tele o aafiaga sa ia feagai ai i le maketi le tumau i Fugalei na mafua ai lona maliu.

SOLOFUA MOLIAGA O LE FAIAIGA FAAMALOSI FAASAGA i SE ALII SA FAIFEAU

Na solofua moliaga o le faiaiga faamalosi faasaga i se alii sa faifeau i se tasi o ekalesia autu i totonu o le atunuu ma sa tuua e ia le Fale Faamasino Maualuga o se tama saoloto i le aso Faraile na sei mavae atu nei.

O lea alii e 63 tausaga o lona soifua ma sa tuuaia o ia i lona faiaiga faamalosi i se teineititi e le atoatoa le malosi o lona mafaufau. Sa iloiloina e faatonu o le faamasinoga ia folasaga a le sa molia faapea molimau sa valaauina ma tuuina atu ai le latou faaiuga e le faamaonia moliaga faasaga i le sa molia ona e le lava molimau e faamaonia ai. Sa faapea loa ona faaleaoga e Faamasino Vui Clarence Nelson moliaga faasaga i lea alii.

Na faaalia le agaga faafetai o le sa molia i le faaiuga a le au faatonu o le faamasinoga ona o aafiaga o lona aiga i lenei mataupu. Fai mai a ia, e tele aafiaga o si ana fanau i lenei mataupu ona o le ulagia i a latou aoga ma fale faigaluega, ae o lea ua iu ma le manuia.

TOE MOLIA FOI JONATHAN PATRICK CRICHTON i LE FASIOTI TAGATA

Ua faauluina le tetee a le alii o Jonathan Patrick Crichton i le isi moliaga o le fasioti tagata faasaga ia te ia e pei ona ua tuuaina ai nei o ia i le maliu o le alii Niu Sila o Hans Dalton i le toese i Tafaigata, i le aso na sosoo ai ma le aso Kerisimasi o le tausaga na sei mavae atu nei.

Na tulai i luma o Faamasino Sili Patu Tiavaasue Sapolu ia Crichton i le aso Gafua ma ia faaulu lana tali tetee tauala atu i lana loia, le susuga Rosela Viane Papalii. O le tetee ai o lea alii ua tolopo ai nei le fofogaina o lana mataupu mo le iloiloga a le Faamasinoga i le aso 17 o le masina o Iuni o le tausaga nei lava, lea ua faatulaga e faia ai folasaga a molimau mo itu e lua. E pei ona silafia,

o Jonathan Patrick Crichton ua faasalaina i le soloatoa i le toese ona o lona tagatavaleina o se alii ave taxi i se tamai laau malosi i le tausaga na tea nei.

TOA 43 SEILA UA FAAUU, LAPATAI E TUILAEPA INA IA AMIO PULEA

Ua lapataia e le alii palemia, le susuga Tuilaepa Lupesoliai Sailele Malielegaoi ia alo ma fanau seila a le atunuu ia ua faamanuiaina nei i avanoa faigaluega i luga o vaa tetele ma meli laupasese i atunuu i fafo e faapea, o le a le toe i ai lava se avanoa e tuuina i soo se tasi e lipotia mai le faia o ni amioga le taupulea i luga o ia vaa.

Na saunoa Tuilaepa, soo se gaioiga latou te faia i le faatinoina o o latou tiute, o le a silafia uma e le malo ona o le lelei o ma le vave o fesootaiga ua i ai i lenei vaitau, ma e faigofie lava le faaiuga o le toe faafoi mai lea i Samoa o i latou ua faaletonu, toe faaleaogaina uma taumafaiga uma na maua i tusi pasi i lea matata.

O le popolega o le malo ona o le tulai so o mai o faafitauli e aafia ai tagata Samoa ua auina atu e galulue i luga o vaa tetele i atunuu i fafo, ma afai ae faaauau pea lea tulaga, e ono aafia ai faiga faapaaga a le malo ma kamupani tetele ia mai atunuu i fafo ma faaletonu ai avanoa faigaluega mo isi fanau o lo o taumafai mai. O lea lapataiga a le alii palemia na tuuina atu i lana saunoaga autu i le sauniga faapitoa e faamavae atu ai i seila e toa 43 ua maua avanoa e faigaluega ai i luga o vaa tetele ma meli laupasese i atunuu i fafo.

MALIU SE TAMA MAI MULIVAI, SAFATA MASALOMIA PULE i LE OLA

O lo o suesueina nei e leoleo le mafuaaga o le maliu o se tama mai le ututau o se laau malosi. O lea faalavelave na tulai mai i le faaiuga o le vaiaso na sei mavae atu nei. Na faailoa mai e le sooupu o le Matagaluega o Leoleo ma Falepuipui, le afioga Leaupepe Fatu Pula, o lo o talia nei a latou suesuega e patino i lenei mataupu.

Peitai, o lo o masalomia i le taimi nei le pule o lea tama i lona lava soifua e faaaoga ai le laau malosi. E le o mafai ona faailoa mai le suafa o lea tama ua maliu, ae 53 tausaga o lona soifua mai le afioaga o Mulivai, Safata. E le iloa le umi o suesuega o lo o faagasolo nei.

Saunia: Lilomaiava Andrew Fa’asau, Naenae Productions