TALA MAi SAMOA
LE LAVA FAIAOGA SAIENISI I AOGA A LE EKALESIA KATOLIKO
Ua faailoa mai e le faatonusili o aoga a le Ekalesia Katoliko, le susuga Aeau Chris Hazelman e faapea, e ono toe talosagaina ma toe faafaigaluegaina faiaoga ua malolo litaea, e tau fofo ai le faafitauli o le le lava o faiaoga i mataupu tau saienisi.
E lima aoga maualuga a le Ekalesia Katoliko i totonu o le atunuu ae e iva avanoa faigaluega mo faiaoga o mataupu tau saienisi o lo o moomia, e ui ua amataina aoga a le fanau. Na saunoa Aeau, ua loa tausaga o faamoemoe kolisi a le Ekalesia Katoliko ia i latou sa aoaoina i nei aoga, faapea i latou e ofoina fua la latou tautua (volunteers), atoa ai ma le aufaigaluega a le malo e aoaoina mataupu faasaienisi mo se taimi le tumau.
Fai mai a ia, e mafai e le matagaluega ona taitaia le faatinoga o lea faamoemoe, aemaise le faaaogaina o le tele o polokalama e pei ona i ai tagata mai fafo e ofo fua mai lo latou taimi faapea isi sa faiaoga i fafo o lo o toe fia foi mai i Samoa e faigaluega ai. Na faaalia e Aeau, o le taimi nei o lo o faagasolo a latou taumafaiga mo le sailia o se fofo o lea faafitauli faapea le faatumauina o faiaoga o lo o i ai nei.
ASIASI MAI LE MINISITA O LE VA I FAFO A AUSETALIA
Ua faafetaia e le minisita o aoga, taaloga ma aganuu a Samoa, le afioga Magele Mauiiliu Magele ia le minisita o le va i fafo a le malo Ausetalia, o Senatoa Bob Carr i le fesoasoani a lona malo i le faatupeina o aoga a alo ma fanau a Samoa seia oo mai lava i le taimi nei.
O le Aso Gafua na taunuu mai ai i le atunuu le alii minisita i sana asiasiga taamilo i le Pasefika, lea sa ia asia muamua ai le Atu Solomona, le Atu Kiripati ona sosoo ai lea Samoa. O le afiafi lava o lea aso sa faia ai se feiloaiga a le alii minisita ma i latou uma sa faatupeina a latou aoga e le malo Ausetalia i ana polokalama sikolasipi i tausaga ua mavae.
Sa maitauina i lea afiafi le toatele o i latou ia ma sa aofia ai sui mamalu o le palemene, o faauluuluga o matagaluega ma faalapotopotoga a le malo, o le au faipisinisi ma le aufaigaluega i ofisa eseese i le atunuu.
Na saunoa Carr, o se mitamitaga tele i lona malo le toatele o i latou ua faamanuiaina a latou aoaoga ma ua tulai mai nei i tulaga taualoa i le malo Samoa.
Ae lei toe taliu le alii minisita, na ia faalauiloa e faapea, e $7 miliona tala le tinoitupe faaopopo ua foai mai e lona malo e fesoasoani ai i le toe faaleleia o mea na faaleagaina i le afa.
ASIASI MAi LE MiNISITA O FEFAATAUAIGA A NIU SILA
O le Aso Gafua o le vaiaso nei sa talimalo ai le malo Samoa i le malaga asiasi mai a le Minisita o Fefaatauaiga a le malo Niu Sila, le susuga Tim Groser. Na faafetaia e le alii minisita le lagolago a le malo Samoa ia te ia, e pei ona faia ai le palota a le malo mo le avea Groser ma faatonusili aoao o le Faalapotopotoga o Fefaatauaiga a le Lalolagi (WTO).
I le la feiloaiga ma le sui palemia, le tofa Fonotoe Nuafesili Pierre Lauofo, na saunoa Fonotoe, sa silasila lelei malo i agavaa o i latou e toaiva o lo o tauva mo lea tofiga, ma o le lagolagoina e Samoa o Groser, e le gata i le tuufaatasiga o lona silafia i mataupu tau le va i fafo faapea le tomai lautele ma le malamalama i manaoga i atunuu Pasefika.
Sa folasia foi i lea feiloaiga le tulaga ese lava o le mafutaga a Niu Sila ma Samoa e pei ona o lo o faamauina i le la Feagaiga o le Faigauo. Sa faamautu le finagalo o le alii Tim Groser e faapea, afai ae faamanuiaina o ia i lea tofiga taualoa, o le a ia silasila toto’a i auala e atili maua ai ni faamanuiaga mo Samoa i fefaatauaiga faavaomalo i le agai atu i le lumanai.
Saunia: Lilomaiava Andrew Fa’asau, Naenae Productions