Ads by Google Ads by Google

Tala mai Samoa

Ua toe tolopoina le iloiloga a le alii 24 tausaga o Tasi Pepe, lea o lo o molia i se faalavelave le fuafuaina, ina ua pa le fana sa u’u i lona lima, ma maliu ai lona tuafafine. 

O lenei faalavelave na tula’i mai i le masina ua tuana’i, i Olo, Mulifanua, i le vaiaso tonu lava o le Lotu Tamaiti.  O le ua maliu, le tuafafine o le ua molia, o Olive.

O le amataga o le vaiaso, na tula’i ai Tasi i luma o le Fa’amasinoga Maualuga ma le afioga Lesatele Rapi Va’ai, e aunoa ma se loia, ae o le talosaga mo le toe tolopoina o lenei mataupu, na faaulu e le loia a le malo, o Precious Chang.

O le aso 19 o Novema, 2012 lea ua toe tu’u i ai e Lesatele, e toe fa’aauauina ai lenei mataupu.

O lo o taofia pea Tasi i le toese.

TE’ENA E SE ULUGALII MOLIAGA O LE UMIA O FUALAAU FAASAINA

Na tutula’i i luma o le Faamasinoga Maualuga i le Aso Gafua, se ulugalii na molia i le tulafono, ina ua maua ai e leoleo i sa latou osofaiga faafuasei, ia se vaega o fualaau faasaina, o mariuana, ma se a’upega e leai se laisene.

Na tutula’i i luma o le alii faamasino ia Lesatele Rapi Va’ai ia le ulugalii o Paulo ma Tricia Afamasaga ma ua o la teena o la moliaga, tauala atu i le la loia o Fepuleai Ameperosa Roma.

Na talosagaina e Fepuleai se tupe faatulagaina mo Paulo lea na talia e Lesatele ma se faatonuga ina ia faaoo atu ana pepa malaga, e aofia ai lona tusi folau, i le Faamasinoga ma ia ripoti i le Ofisa o Leoleo i Aso Gafua ma Aso Tofi o vaiaso uma.

O le aso muamua o Aperila, 2013 lea ua fuafua e toe faaauau ai lenei amtaupu.

TOLOPO ILOILOGA A LE ALII NA FANAINA LE AVE TAXI

Na tula’i i luma o le Faamasinoga Maualuga i le Aso Gafua ia Jonathan Patrick Crichton, lea o lo o molia i lona fanaina o Faiumu Ete, 26 o Lotopa ma Taga, Savaii ma maliu ai.  Na fesiligia e le alii faamasino o Lesatele Rapi Vaai ia Jonathan po o mana’omia se fesoasoani tau loia, na tali le ua molia, ‘ioe’.

Na talosaga e le loia a le malo, o Precious Chang, ia le toe fa’aauauina o lenei mataupu ae se’i faamae’a suesuega a leoleo ma faamautu moliaga e faasaga i le ua molia.  Na talia e Lesatele le talosaga ma ua toe fa’atulagaina ai le toe fa’aauauina o lenei mataupu i le aso 19 o Novema, 2012.

Ina ua pu’eina e leoleo ia Jonathan, sa ia faamatala i leoleo, na mafua le faalavelave ona o lona to’atama’i ina ua faauma e lana uo teine le la faigauo ma sa mafaufau ai e faauma lona ola.  Sa ta’ua ae Jonathan, sa mana’o e ave le taavale e soa i se mea.

ESE LE TAAVALE NA OKA, AE ESE LE TAAVALE NA LAFO MAI

Ua fa’aalia le pagatia o se tama matua ia Fa’amausili Morris Scanlan ona o sana taavale sa oka mai i Iapani, e fai o le umi na faatali, ae taunuu mai le taavale, e ese lava le taavale na oka, ese le taavale na lafo mai.   O lea ua fia faasoa mai ai e Faamausili i le mamalu lautele lenei feau taua, ina ia nofo uta ai tagata lautele e tusa ai ma tagata le faamaoni, aemaise le okaina o ni oloa mai i luga o le initeneti.

Na faamatala e Faamausili e faapea, na amata mai ona mafatiaga i le ono masina ua tuana’i, ina ua na okaina se taavale (BMW 2001) i luga o le initeneti mai i se kamupani Iapani e ta’ua o le “Car Bridge” ma e $5,000 (tupe Amerika) na fa’aalu e si nei tama mo le faatauina o lana taavale.

Na ta’ua e Faamausili, e tasi le vaiaso na ta’u mai e le kamupani Iapani e taunuu mai ai lana taavale, ae peitai, na atoa lelei le tolu masina ae faato’a taunuu le taavale.

Ae na matua’i toatama’i Faamausili ina ua taunuu mai le taavale, e le o le taavale lea na ia okaina.  Na fai o le eseese o maila o le taavale ae o’o lava i le numera (VIN #), ma le tulaga na i ai le taavale, sa ta’ua e Faamausili le matuai eseese o le taavale na oka ma le taavale na lafo mai.

Na amata loa se fetusia’iga a Faamausili ma le alii o Shibuya Hitoshi, le pule o le kamupani taavale i Iapani.  I se tusi mai ia Hitoshi, na ia faailoa mai ai ia Faamausili, e lafo mai lana taavale e le o i ai o ia i Iapani ae na faailoa atu e lana aufaigaluega ia te ia, e le mafai ona lafo mai le taavale na manao ai Faamausili, ona sa aafia le taavale na manao ai Faamausili i ni aafiaga faaniukilia ona o le galulolo lea na aafia ai Iapani.  O le mafuaaga lea ua sui mai ai lana taavale.

Na ta’ua foi e Hitoshi, na faailoa atu e lana aufaigaluega, o lo o lelei le taavale lea na lafo mai.

I le faaiuga o le fetusia’iga a Faamausili ma Hitoshi, na ioe ai Hitoshi, o le a toe faafoi mai le $800 a Faamausili, e ui ina sa mana’o Faamausili e toe totogi mai le $1600.

O le masina o Aokuso o le tausaga lenei na i’u ai le fetusia’iga a Faamausili ma Hitoshi, ae faatasi Faamausili mo lana tupe.  Peitai, e o’o mai lava i le amataga o lenei vaiaso, e le’i maua lava e faamausili lana tupe.

Source:  Samoa Observer