Ads by Google Ads by Google

Tala mai Samoa

TUILAEPA LE PALEMIA MUAMUA UA SELE POO LONA LAUAO E TETEE AI I LE KANESA

Ua avea nei le palemia o Samoa, le susuga Tuilaepa Lupesoliai Dr. Sailele Malielegaoi ma taitai muamua o se malo o le lalolagi, ua ia faafuga uma ese lona lauao e lagolago ai taumafaiga a le Sosaiete o le Kanesa a Samoa, ma fesoasoani ai i sailiga seleni mo le taua o lo o faia nei ma lea faamai oti i totonu o le atunuu.

E $80,000 le tinoitupe na mafai ona tuufaatasia i le vaiaso ua te’a ao faafugaina le lauao o le alii palemia e le susuga i le alii otiulu o John, i le fogafale lima o le maota o le malo i Matagialalua. Na matauina le faatumulia o le maota o le malo e le gata i le fogafale sa faafuga ai le lauao o le alii palemia, ae faapea i latou sa faatalitali atu i lalo i le fia maimoa i le ao o le alii palemia.

Na faaalia le agaga faafetai o le Sosaiete o le Kanesa a Samoa i le fesoasoani a le taitai o le malo i le latou sailiga seleni. O le aofaiga atoa na mafai ona tuufaatasia i lea taumafaiga na amata faagasolo mai i le amataga o le masina nei, lea sa faafuga ai lauao o nisi o tamalii e lata i le toa 30, e $107,00, faaopopo i ai ma le $80,000 mo le faafugaina ese uma o le lauao o le alii palemia, ona maua ai lea o le aofaiga maoa’e e $187,00.

MOLIA I LE TULAFONO SE TUAGANE MA SE TUAFAFINE I LE FAIAIGA MA LE ILOA

Na ioe se alii ma se tamaitai i o la moliaga o le faiaiga ae o lo o la silafia lelei lava, o laua o le tuagane ma le tuafafine moni na fananau mai i matua e tasi. O i laua ia sa tulai i laua i le Faamasinoga Maualuga e tali i moliaga e 14 o le faiaiga faasolitulafono po o le mataifale.

E le i mananao i laua e tulai se loia e fesoasoani ia i laua i lea mataupu. O lenei mataupu sa fofogaina lea i luma o le afioga i le Faamasino Sili, le afioga Patu Tiavaasu’e Falefatu Sapolu. Na faafofoga le faamasinoga e faapea, o nei soligatulafono na amata mai i le masina o Setema 2012 seia oo mai i le aso 3 o Oketopa o le tausaga nei lava. E lei faailoaina i luma o le faamasinoga le tagata na faauluina le tagi i lenei mataupu.

O lo o taofia uma i laua ua molia i lalo o le vaavaaiga a leoleo seia aulia le aso 5 o Novema, 2012 lea ua fuafua e faia ai le faaiuga a le Faamasinoga. Ua poloaina foi e le Faamasino Sili se lipoti mai le ofisa faanofovaavaaia mo le fuaina o le faasalaga.

LUA FAALAVELAVE TAU TAAVALE

O lo o faataotolia i le maota gasegase i Motootua se tina e 39 tausaga, o le faletua o se faifeau AOG o le afioaga o Sataua i le motu tele i Salafai, faapea nai ona alo laiti, ma se tamaititi e 14 tausaga, mo togafitiga i manua na mafua mai i se faalavelave tau taavale i le amataga o le vaiaso ua te’a i le afioaga o Sataua, lea na maliu ai se tama e 54 tausaga le matua o lea lava afioaga, ina ua taia e le taavale se pikiapu sa malaga atu ai lea tina ma lana fanau.

O lo o faia pea suesuega a leoleo i le mafuaaga o lea faalavelave ua oo ai le maliu i se tasi o tama o lea lava afioaga, ma ono faia ai ni moliaga mulimuli ane faasaga i le faletua.

I se isi mataupu, ua taofia nei foi e leoleo se alii 19 tausaga le matua mai le afioaga o Toamua i le ave taavale faatamala ua mafua ai le maliu o se alii e 22 tausaga le matua mai le afioaga o Apia, e aoga i le iunivesete aoao o Samoa i le Papaigalagala.

TATALA ALOAIA LE LEITIO FOU A LE IUNIVESETE O SAMOA

O le aso Faraile ua te’a na tatala aloaia ai le leitio fou a le vasega tau tusitala ma le au faasalalau i le Iunivesete Aoao o Samoa i le Papaigalagala, o le 105-FM. Na o nofoaga lalata ane i le aoga o loo mafai ona maua manino ai faasalalauga a lea leitio fou e pei o Vaivase, Faatoialemanu, Magiagi ma Toomatagi.

O lea alaleo na faamatuu atu e le ofisa o le pule faatonu, e le mafai ona soo ai Samoa, ae nao le nofoaga lava o lo o i ai le aoga, ina ia mafai ona aoaoina ai alo ma fanau o le atunuu i le faatinoga o polokalama ma faasalalauga tau leitio, ae lei agai atu i tua mo galuega mo le lumanai.

O lo o aoaoina ai foi le tulaga o le pueina o ata i le televise, tusitusiga o tala ma le pueina o ata mo le lolomiga i luga o nusipepa. O le 10 tausaga talu ai na faatuina ai le polokalama lenei a le malo i le iunivesete i se talosaga sa tuuina atu i luma o le alii palemia mo le faaleleia atili ai o le matata tau tusitala ma faasalalauga i Samoa.

TATALA ALOAIA IA MAOTA O LE VAAIMAMAO A LE APTC

Ua maea tatalaina aloaia nei ia maota o le Vaaimamao a le Kolisi o le Matata Eseese a Ausetalia I Samoa, le Australia Pacific Technical Institute (APTC), i le laumua o le Iunivesete Aoao o Samoa i le Papaigalagala. O le taitai o le atunuu, le afioga I le alii palemia, le susuga Tuilaepa Lupesoliai Sailele Malielegaoi na saunoa i le saunoaga autu e tatala aloaia ai lea faamoemoe i le vaiaso ua te’a.

O le maota o le Vaaimamao po o se tasi o mataupu fou ua faaopopoina i mataupu aoaoina a le APTC, e aoaoina ai i latou o le a avea ma faiaoga e gafa ma le aotauina o alo ma fanau o lo o i ai manaoga faapitoa i totonu o le atunuu. Ua mafua lea tulaga ona o lo o moomia lea matata i le tele o aoga ma faalapotopotoga o lo o gafa ma le aotauina o fanau ma manaoga faapitoa.

I lana saunoaga autu, na faaalia e le alii palemia lona lagolagoina malosi o lea aoga, ma lona naunautaiga ina ia faailoa atu ia Ausetalia le taua tele o le faatuina o lea ituaiga aoga i totonu o Samoa faapea isi atunuu o le Pasefika. Ua momoli atu ai foi le agaga faafetai a le malo i le galuega taua a le APTC o lo o faia i totonu o le atunuu.

Na saunoa Tuilaepa, o ia se tasi sa muai lagolagoina malosi le faatuina o le APTC i totonu o le atunuu ina ua faatuina e se tasi o palemia o Ausetalia i le fono a taitai o malo o le Pasefika. Fai mai a ia, o lea ua fua mai ai nei le tele o taua o lea aoga ua manuia ai le tele o alo ma fanau o le atunuu.

O le itu sili o tusi pasi o lo o faauuina ai alo ma fanau o lo o aotauina ai aua e aloaia foi i totonu o Ausetalia ma isi atunuu o le lalolagi pe a saili galuega ai i atunuu i fafo.

Saunia: L.A.F./Naenae Productions