Ads by Google Ads by Google

Tala mai Samoa

LEOLEO:  ANA FUSI LANA FUSIPA’U, SEMANU E FAASAOINA LE OLA

Na fa’aalia e le sui Komesina o Leoleo, le susuga Le’aupepe Fatu Pula, na mafai ona fa’asaoina le ola o se alii 22 tausaga, lea na maliu i se faalavelave tau taavale i le vaveao o le Aso Sa i Vaitele, pe ana faapea na fusi lona fusipa’u.

O Roy Shiloh, o le lona tolu, o se fanau e to’avalu e faasino i le susuga Nanai Laveitiga Tuiletufuga ma le faletua ia Hannah, na maliu ina ua lavea le latou taavale i Vaitele ma ni ana uo se to’alua.  Na taofia se tasi o alii na i totonu o le taavale, ae sa leai ni manu’a o le aveta’avale.

O le susuga Nanai sa avea ma tusitala i le Samoa News i tausaga ua tuana’i, ae e le’i si’i atu lona aiga i Samoa.

Na fa’aalia e Le’aupepe, na maliu “Shiloh” ona o manu’a tuga i lona ulu ma lona fatafata.  Sa ia te’ena foi ni fa’amatalaga e faapea, na maliu lenei alii talavou ona o sa fasia o ia.

Na ta’ua e Le’aupepe, o le alii 19 tausaga mai Toamua lea na faafoeina le taavale, sa ‘ona i le taimi na tupu ai le faalavelave, faatasi ai ma Shiloh ma leisi alii na i totonu o le taavale.  E le gata i lea, sa fa’aalia foi e Le’aupepe, le saoasaoa o le taavale i le taimi na tupu ai le faalavelave.

Na fa’aalia e le susuga Nanai ina ua faatalanoaina o ia e le sui o le Samoa Observer i le amataga o le vaiaso, o lo o i ai sona faamoemoega maualuga, o le a avea le maliu o lona atalii ma se aoaoga taua i fanau talavou, ina ia fa’atauaina o latou ola.

TETE’E FAAMASINOGA TALOSAGA E NANA LONA IGOA

O se alii faipisinisi o lo o molia i ni moliaga e fitu ona o se osofaiga faafuasei na faia e leoleo i lona ofisa, i le masina ua tuana’i, ma maua ai ni fuala’au faasaina o le ‘aisa’, ua teena e le faamasinoga sana talosaga mo le faatulaga o se tinoitupe e mafai ona tatala ai o ia i tua, faapea ma le nanaina o lona igoa mai i faamaumauga a le faamasinoga, po o le le tuuina atu i vaega faasalalau.

O lenei talosaga na faaulu e le loia a Niulevaea Ropati Ioane, le susuga Maiava Visekota Peteru.

Na fa’aalia e Maiava i luma o le faamasinoga, o le mafuaaga o lo o naunau ai le ua molia ina ia nanaina lona igoa, ina ia puipui ai lana fanau ma lona aiga.

Ae peitai na tete’e le ofisa o le Loia Sili le talosaga, e pei ona sa finau ai lo latou sui o Phaedra Valoia, o le toalua o le ua molia sa logoina le ofisa o le malo e tusa ai ma gaioiga a lenei alii ma o lo o i ai se fe’ese’esea’iga i le va o Niulevaea ma lona toalua ma lona atalii.

Na fa’aalia e le alii faamasino sili, le susuga Patu Tiava’asu’e Falefata Sapolu, afai o le fafine lea na logoina le ofisa a leoleo, o lona uiga, o le a avea o ia ma molimau a le itu o le malo.  O lea na ia te’ena ai le talosaga a Niulevaea.

FAUTUA FAAMASINOGA AVE ALII TALAVOU I OLOMANU AE LE O TAFAIGATA

Ua a’e se manatu i le faamasinoga maualuga ma le alii faamasino sili ia Pierre Slicer, e sili atu le ave o Faafeu Alapati Malaga e tuli lona faasalaga i le nofoaga e taofia ai fanau talavou e tausala i solitulafono, i le ‘Olomanu Juvenile Rehabilitation Centre’, nai lo le ave e loka i Tafaigata.

O le Aso Faraile o le vaiaso ua mavae, na faasala ai e le faamasinoga ia Faafeu ina ia tuli lona faasalaga faafalepuipui e tasi le tausaga ma masina e 10, ina ua ta’usala i le moliaga o le fasioti tagata le fuafuaina, ina maliu se tamaloa 39 tausaga, ina ua ta e Faafeu le ulu i se laupapa.

Na ta’ua e le alii faamasino sili ina o tu’uina atu le faasalaga o lenei alii talavou, o lo o manatu mamafa o ia i le a’afiaga o le olaga o lenei atalii talavou pe afai ae avatu o ia e tuli lona faasalaga i Tafaigata faatasi ma tagata matutua.

Na mafua ona molia Faafeu i le tulafono, ona o se fa’alavelave na tupu i lo latou aiga i Maota i Savaii, i le aso 7 o Ianuari, o le tausaga nei.  O se fusuaga i le va o le tua’a o Faafeu ma se faiava o le latou aiga, na oso atu ai Faafeu ma le la’au ua ta ai le faiava ma tau ai i le ulu o le faiava.  Na aveina atu le faiava i le falema’i ae peitai, na maliu i le aso na soso’o ai.

Na ta’ua e le faamasino sili, o le ua maliu o se alii e 39 tausaga, o se tama i se fanau e toafitu i le va o le 3 ma le 13 ma ua tele se aafiaga o lana fanau i lenei faalavelave.

O Faafeu, e tusa ai ma faamaumauga a le faamasinoga, sa tausi aiga ina ua ia tu’ua le aoga i lana tausaga 8 ma e le o se tagata faamisa.  Ma na ta’ua e le alii faamasino, ua maea ona faia se ifoga a le aiga o Faafeu i le aiga o le ua maliu ma ona o se taimi muamua lenei ua tula’i ai lenei alii talavou i luma o le fa’amasinoga, ua avea ma itu ua taga’i alofa ai le faamasinoga i lona faasalaga ma fautuaina ai le aveina atu o Faafeu i Olomanu ae le o Tafaigata.

Source: Samoa Observer