MAUA LE TINO MALIU O SE TAMAITAI

Ua matua faateia se aiga faapea i latou e alala i le afioaga o Faleula-uta ona o le maliu o se tamaitai sa alala ai, na tagatavaleina e se tagata i se agaese i le vaveao o le aso Sa na te’a nei. Na lipotia mai e faapea, na maua le tino maliu o lea tamaitai e 40 ma ona tupu ona tausaga, e ni taulelea sa oo atu i lea nofoaga e tau lauulu mo le gaseseina o le latou suavai o le aso Sa. Na faaalia e se tasi o ia taulelea, e le mamao le nofoaga na maua ai le tino maliu o lea tamaitai ma le fale o le latou aiga, ma sa telenoa lona tino maliu. Na oo atu leoleo ma auina atu ai loa le tino maliu o lea tamaitai i le falemai. O lo o masalomia na fasi faamo’amo’a lea tamaitai e se tagata i le vaveao o le aso Sa. Na faaalia, na matua lavatoto uma le tino ma sa totolia uma e manua e foliga mai sa faaaoga ai ni maa faapea se agaese. Na faailoa e se tasi o molimau, o le ua molia e ese le afioaga e sau ai ae sa nofo i se tasi o ona aiga i Faleula-uta.

SULUFA’I ATU I LEOLEO AE MAUA AI MARIUANA

O se alii na sulufai atu i le ofisa o leoleo i Faleolo e faaulu lana tagi ina ua fasi o ia e nisi, ae na i’u ina maua ai o lo o ia umia le laau faasaina o le mariuana. Na faaalia e le sui sooupu o le Matagaluega o Leoleo, le susuga Su’a Muliaga Tiumalu e faapea, o lea alii na oo atu e faaulu lana tagi ina ua fasi o ia e ni tagata ma ave lana tupe. Na maitauina le faamanu’alia o lea alii ma sa faapea ona auina atu ai loa o ia e leoleo i le falemai mo togafitiga. Peitai, ina ua oo atu i le falemai, sa tamoe lea alii i se nofoaga e lalata i le falemai ma nana ai lana ato faafafa sa i ai. Sa masalomia loa e leoleo ma ina ua latou suesueina le ato, sa maua ai i totonu ni lala mariuana e valu. Sa faapea ona le taunuu ai loa o le mataupu na alu atu ai lea taulealea i le ofisa o leoleo mo le faauluina o lana tagi faasaga ia i latou sa fasia o ia, ae ua molia o ia e leoleo i le umia o le laau faasaina o le mariuana. O le ua molia nei e 29 tausaga mai le afioaga o Satapuala, ma o le aso 14 o le masina nei o le a tulai ai o ia i luma o le Faamasinoga.

FOAI FORD SAMOA MO LE TAUVAGA MISS SAMOA

E $60,000 ua foai atu e le kamupani taavale o le Ford Samoa i le pulega o le Manaia Events lea o lo o faatautaia le sailiga Tausala Lalelei o Samoa, aua tapenaga o lea faamoemoe taua i le masina nei. O lenei fesoasoani o le lagolago a le Ford Samoa i le Manaia Events e tusa ai ma se maliega e tolu tausaga o le faiga paaga, ma o le faatonu o le Manaia Events, le susuga Jackie Loheni, sa talia aloaia lea fesoasoani. O lenei foi maliega e aofia ai ma le tausaga e tasi e faaaoga ai e le e avea ma Tausala Lalelei o Samoa, se taavale a le kamupani o le ituaiga o le Ford FIest ma faapipii ai i le tino o le taavale le faailoilo o le Tausala Lalelei o Samoa, ina ia silafia uma ai e Samoa. O lo o lagolagoina foi e le Ford Samoa ia taavale o lo o feaveai ai tausala e toaono o le tauvaga o lenei tausaga e aofia ai ma taavale mo i latou o lo o tapenaina nei tamaitai ao talia ai se tasi lenei o faamoemoe taua e faatalitali uma I ai le atunuu i tausaga taitasi.

TAUVAGA AUFAILI (ORCHESTRA) A SAMOA

O lo o faagasolo nei le tauvaga a le aufaili faapitoa (orchestra) a Samoa lea ua oo mai i le vaega faaiu o le tauvaga e iloa ai le siamupini i le masina o Oketopa. O lenei tauvaga o lo o lagolagoina e le kamupani a le Samoa Stationery and Books ma o lo o tauva ai vaega e lua ua vaevaeina i ai le aufaili, ua faaigoaina ia Upolu ma Savaii. O le vaega a Upolu na sola ma le tulaga muamua i le aso Faraile i le faaiuga o le vaiaso na te’a nei ma o lea la o le a talia ai loa suega siamupini i le masina fou. O lenei tauvaga ma le aufaili ua tuufaatasia e le alii faiaoga, le susuga PJ Ieriko. Na faailoa e lea alii, talu mai lava le amataina o lenei aufaili faapitoa i le tausaga 2013, ua tele taiala ua mafai ona faaaogaina ina ia mautinoa o lo o atinaeina lenei matata i ona vaega eseese ma o le tausaga nei, sa ia mafaufau lava e faatautaia se tauvaga i totonu lava ia o le aufaili faapitoa a Samoa ina ia siitia ai lenei taleni. I le maea o tauvaga e lua i le va o Savaii ma Upolu, ua malie atoatoa lona loto i le filifilia ma le tosina o sui uma o le aufaili faapitoa a Samoa. E lei leva atu ona maea le faafiafiaga a lenei vaega tuufaatasi o so o se ituaiga meafaili i le faamanatuina o le Aso o Tupulaga Talavou o Malo Aufaatasi lea sa faafiafia ai i Mulinuu, sa faafiafia foi le faamanatuina o le 21 o tausaga o le falemataaga o Ropati Lui Sitivinsione. O lo o taua foi le faafiafia i Taaloga a Tupulaga Talavou a Malo o le Taupulega lea o lo o faagasolo i le vaiaso nei.