FAASA E SAMOA SUI TAAALO MAI SIERRA LEONE

O lo o lagolagoina e le Faalapotopotoga o Taaloga a Malo o le Taupulega, ia le faaiuga a le malo Samoa ina ia faasaina le ulufale mai i le atunuu o le au taalo a tupulaga talavou mai le atunuu o Sierra Leone, e tauva i Taaloga a Tupulaga Talavou a Malo o le Taupulega lea e tatala aloaia i le aso Toonai nei. Na faaalia i le fono a le komiti faafoe o ia taaloga i Aukilani i Niu Sila i le vaiaso nei e faapea, e i ai le aia tatau a le malo Samoa i lona tulaga faavaomalo, e teena ai le auai atu o le au taalo a Sierra Leone i ia taaloga ona o popolega i le ono ulufale atu ai o le vairasi o le faama’i oti o le Ebola. Na saunoa le fa’auluuluga o le komiti, le susuga David Grevemberg, o le aia tatau lava a le palemia o Samoa na ia faia ai lea faaiuga mo le lelei o le atunuu atoa i le itu tau saogalemu mo ona tagatanuu, ma ua faaaloalogia foi e le latou komiti lea faaiuga. Na faaulu le faatu’iese a le au taalo mai Ghana, se tasi o atunuu i le konitineta o Aferika, ma talosagaina le faia o sala faavaomalo faasaga ia Samoa ona o le teena o le auai o le au a Sierra Leone. Peitai na teena e le komiti lea talosaga. Na saunoa Grevemberg, ua alagatatau atugaluga o le malo Samoa i le saogalemu o ona tagata, ona na aafia muamua foi i faama’i mai fafo, lea na maliliu ai le 22 pasene o le faitau aofai o le atunuu i le faama’i o le 1918 na aumai e vaa la’u pasese mai fafo.

TAUNUU SUI O LE AMI FAALEOLEO A AMERIKA

Na taunuu mai i le atunuu i le faaiuga o le vaiaso mulimuli o Aukuso le vaega muamua o le vaega o fomai tomai fa’apitoa ma tausi soifua e to’a 40 mai le Ami Faaleoleo a Amerika, le 9th Mission Support Command. Ua malaga mai lea vaega e fesoasoani i le aufaigaluega a le Matagaluega o le Soifua Maloloina a Samoa i le tali atu i ni tautua moomia ao faagasolo Taaloga a Tupulaga Talavou a Malo o le Taupulega lea e tatala aloaia i le aso Toonai nei. O le vaiaso nei na fesoasoani ai lea vaega i tapenaga a le aufaigaluega a le matagaluega faapea le Koluse Mumu e ala i le faatautaia o aoaoga fa’apitoa mo le faatinoina o galuega laveai mo i latou e muamua taunuu i nofoaga o faalavelave faafuasei. O le vaiaso lenei o lo o faamoemoe e auina atu ai sui o lea vaega i nofoaga o lo o api ai au taaalo e faatino so o se togafitiga moomia. A maea taaloga, o le vaiaso o le aso 14 o Setema ua fuafua e tufa ai sui o le vaega i falemai faaitumalo i Faleolo, Poutasi, Lufilufi faapea le falemai i Motootua e galulue ai i le togafitia o le atunuu lautele e saili fesoasoani atu. O lo o i ai foi le fuafuaga e malaga atu i le motu o Manono. O le tausaga na tea nei lea foi na malaga mai ai se vaega mai le Ami Faaleoleo a Amerika e fesoasoani i sui o le matagaluega i le vaitaimi o le fono a atunuu laiti tau atiae o le lalolagi.

TULIMATA’I E LAUFALI TAMA TAAALO MAI LE PASEFIKA

Ua faaalia e le faiaoga ulu a le Manu Samoa ia Stephen Betham e faapea, ua ia fautuaina alii taaalo ina ia pulea a latou amioga i taimi o taaloga, ona e foliga mai, o au a le pasefika lea o lo o tele ina tulimataia e laufali o le taamilosaga o le ipu o le lalolagi i lea tulaga. O le alii o Kane Thompson, o le loka a le Manu Samoa lea o lo o faasala i le taimi nei, ina ua tuli i tua mai le taaloga ma le au a le Barbarians, ona o lona tu’iina o le hooker a le au, le alii Toga o Saia Faingaa i le taaloga i le faaiuga o le vaiaso talu ai. Ua faasalaina nei Thompson e le taalo mo vaiaso e lua. O lona uiga o le a le mafai ona taalo o ia i le taaloga faasamasamanoa ma le au a le Wasps, faapea le taaloga muamua o le taamilosaga o le ipu o le lalolagi ma le au a Amerika. Na faaalia e Betham o le pa vaeloto o lo o fai ma lu’itau mo nisi o le au taaalo o le gagana. Na ia faaalia foi e le nao le Manu Samoa o lo o maua i lea faafitauli peitai e aofia ai foi ma i si au e i ai Toga ma Fiti. Ma o le faafitauli lea o lo o samala ai pea le Manu Samoa ma ia au, aemaise lava foi i taimi o taamilosga o le Ipu o le lalolagi. O le itu lea o le a matua faia i ai le galuega i le taimi nei, o le taumafai lea e pulea amioga i totonu ma fafo o le malae. Ua tusa ma le 11 suiga ua faia i le au filifilia o le a taaalo ma le au a le Wasps i le faaiuga o le vaiaso, o se taumafaiga ina ia tafiesea le faamoega lea o lo o tulai mai ai le faaletonu, ae taulai agai i le taaalo ai i vaega ua faatulaga mai i le Ipu o le lalolagi.

GAOI E LE PAGOTA LE SILIA I LE $50,000

O se pagota e lei toe foi i le toese mo tupulaga talavou i Olomanu i Mulifanua ina ua aso Sa mai i tua i lona aiga, sa ia ulufale faamalosi i le supamaketi a Farmer Joe i Vaitele i le vaiaso na te’a nei ma ia gaoia ai le tinoitupe e silia ma le $50,000. Na faamaonia lea tulaga e le sui sooupu o le Matagaluega o Leoleo, le susuga Su’a Muliaga Tiumalu, ma na ia faaalia, ua maua nei lea pagota.