SAUNI AOGA E TATALA ALOAIA TAALOGA A TUPULAGA

Ua toe nei o nai aso ona tatala aloaia loa lea o Taaloga mo Tupulaga Talavou a Malo o le Taupulega lea o lo o talimalo ai Samoa, ma ua sauni foi fanau aoga mai kolisi ua filifilia i totonu o le atunuu e faafiafia ma faafeiloai le au taaalo e ala i a latou faafiafiaga eseese ua tuufaatasia e ni tamalii o Samoa ua iloga i siva faaleaganuu ma pesepesega, le afioga Tuilagi Seiuli Alan Alo ma le afioga Tuilagi Igelese Ete. E pei ona silafia o le afiafi o le aso Toanai nei o le a tatala aloaia ai lenei faamoemoe ma ua tapena le ausiva faaleaganuu a faiaoga, o puleaoga ma faiaoga mai aoga e 13 ua filifilia e faafiafia le aofia. O taaloga lona lima o tupulaga talavou a malo o le taupulega o se avanoa taua lea e faailoa atu ai tu ma le aganuu a Samoa, aemaise o le taleni faaonaponei o lo o i le toatele o fanau aoga o le a faafiafia i le tatalaina ma le tapunia o nei taaloga. O nei aoga e aofia ai le Kolisi o Samoa, Kolisi o Avele, Kolisi o Leifiifi, Kolisi o Vaimauga, Kolisi o Pesega, Kolisi o Sagato Maria, Kolisi o Papauta, Kolisi o Faleata, Kolisi o Maluafou, Kolisi o Faatuatua, Aoga Matata Eseese a Don Bosco, Kolisi o Anoama’a ma le Kolisi o Levaula. O le itula e valu i le afiafi o le aso toanai nei ole a tatala aloaia ai taaloga mo tupulaga talavou a malo o le taupulega i le malae o le Apia Park.

IOE LE TOALUA MAI FALEATIU AE TETEE LE TOATASI

Ua tali i latou e toatolu na maua i le osofaiga a leoleo i le masina na te’a nei i Faleatiu i o latou moliaga, ina ua tulai i le Faamasinoga i le amataga o le vaiaso nei. O lo o tetee le toatasi, o Talimataua Taualai, i le moliaga o le umia o le laau faasaina o le mariuana, e pei ona molia ai o ia i le umia o fatu mariuana e 1,040. Na talosaga o ia i le afioga Faamasino Sili Patu Tiavaasue Falefatu Sapolu, ina ia tatala o ia i tua e faatali ai lona faamasinoiga, ma sa fa’atonuina e Patu ina ia tuuina atu sana talosaga tusitusia e fa’amatala atu ai i le Faamasinoga mafuaaga e tatau ai ona tatala o ia i tua. O lea talosaga o le a iloiloina i le aso Gafua a sau ae o lo o taofia o ia i le taimi i lalo o le vaavaaiga a leoleo. O le isi toalua, o Enosa po o Gata Enoka ma Iosua Lalomanu, ua ioe i moliaga faasaga ia i laua. O lo o molia Enosa i le umia o mariuana e 550, o lau mariuana e 450, o tamai laau mariuana ua toto i totonu o tamai ulo e 59, 250 lala mariuana, 1,438 kalama o lala mariuana mata, 20.4 kalama o lau mariuana ma fatu mariuana e 6,588. O lo o tetee o ia i le totoina o laau mariuana e 65 i totonu o tama’i ulo. O Lalomanu o lo o ioe i le umia o fatu mariuana e 76, 15 lau mariuana ma le 14.2 kalama o mariuana. O le aso 5 o Oketopa o le a toe tulai ai i laua i le Faamasinoga.

FASI FAAMO’AMO’A LONA TOALUA

Na fa’aigoa e le afioga Faamasino Vui Clarence Nelson ia le alii o Falaniko Sefo Mano, 35 tausaga o Utualii, o se “manu faasua’ava” na matua le mafai ona taofiofia, ao ia fasi faamo’amo’a lona toalua e 6 masina o lona ma’itaga seia oo ina matapogia o ia, ma ia fa’atonuina nisi sa i ai ina ia tuu ai pea e oti. O lea sauaga na tulai mai i le aso 28 o Mati o le tausaga nei i Utualii. Na faaalia i fa’amaumauga a le Faamasinoga e faapea, na alu atu le ua molia e faasua’ava ma se pepa mo’a ma fa’atonu lona toalua e fai sana meaai. Peitai na ita lea alii ona o le tuai ona vela o lana mea taumafa ma sa faapea ona ia taina le ulu o lona toalua i se ulo. O le ta lona lua na tau i lona mata ma na pa’u ai o ia i lalo ma matapogia o ia. Peitai na toe te’i o ia ina ua fekiki e lea alii ma sa sola ese o ia ma sulu i le fale o le latou tuaoi. Peitai sa alu atu lea alii ma toso mai o ia i fafo, ma ia taina lona ulu i se atigifagu ma na lavea ai lona taliga agavale ma lona ua. Na sola ese le tina i le aualatele ma taofi se taavale na pasi ane ma alu ai loa i lo latou aiga. Mulimuli ane sa auina atu o ia i le falemai. Sa fa’asalaina o ia e Faamasino Vui i le tolu tausaga i le falepuipui e ui i talosaga a lona toalua mo se fa’asalaga mama.

SIAMUPINI FAATOLU LE TANIFA O LE VAO

O le aso Lulu na te'a nei na faataunuu ai le suega saimupini o le taamilosaga kilikiti o le Teuila o lenei tausaga, ma ua toe tulai mai ai le au kilikiti a le Tanifa o le Vao mai le afioaga o Sili i Salafai i le siamupini o lenei Teuila. Tulaga lua le isi au mai Salafai o le Posiulai mai le afioaga o Foailalo, tulaga tolu le au o le Tulimatala mai le afioaga o Faleula, ae tulaga fa ai le au o le Povi Poa mai Leauvaa. O le sosoo ai lenei o tausaga e tolu talu ona siamupini le au a le Tanifa i le taamilosaga o le kilikiti faasamoa o le Teuila. O le 2011, na siamupini ai le au a le Buffalo mai le afioaga o Toamua, ao le 2012 na sola ai ma le au a le Tosua mai Lotofaga le siamupini, ao le 2013, 2014 seia oo mai i le tausaga nei lea o lo o siamupini sosoo ai le au a le Tanifa.

Ua i ai le faamoemoe o le a sauni atu au nei e fa a Samoa na sue siamupini e taaalo ma au mai Ueligitone, Aukilani, Melepone ma le au mai Faleniu i Amerika Samoa i le taamilosaga faavaomalo o le kilikiti faasamoa o le Teuila 2015 lea e amata faagasolo i le vaiaso fou.