MAUA E LEOLEO MARIUANA MA FANA I FALEATIU

E pe a ma le 600 laau mariuana ma laau malosi e 30 na maua e leoleo i se latou osofaiga na faatinoina i fanua o le afioaga o Faleatiu i le faaiuga o le vaiaso na te’a nei. O lea osofaiga na taitaia e le alii komesina, le susuga Egon Lincoln Keil, ma e toafa ni tagata na pueina ma molia ai. Na saunoa Komesina Keil, e fai si maomao i uta i luga o mauga o le nofoaga sa latou maua ai laau mariuana ua aveesea nei ae sa latou sopoina lava lea nofoaga. Na ia faaalia, e le o mautinoa po o se aiga e tasi e ana fanua na maua ai laau mariuana. E to’a 60 leoleo sa auai i lea osofaiga lea na faaaoga ai taavale e 17 a le matagaluega. Na ia faafetaia le onosai a sui o le matagaluega sa feagai ai ma suesuega ae lei alu le osofaiga faapea le loto toa o i latou sa faatinoina le osofaiga, ona o le le saogalemu o ia ituaiga gaioiga lea na aafia ai soifua o nisi o sui o le matagaluega i tausaga ua tuanai. E pei ona silafia, e le o le taimi muamua lea ua osofaia ai e leoleo le afioaga o Faleatiu ona o masalosaloga i le totoina ai o le laau faasaina o le mariuana. O le vaitausaga e 1970 na maliu ai se alii leoleo i manuaga mai se laau malosi ao faia se osofaiga a leoleo, faapea foi nisi o leoleo na manunua ai i tausaga e lei mamao atu ona o taugafana sa faia ai, lea na maliu ai se tasi o le aiga i ia lava taugafana.

MALIU SE TAMA AOGA AO LOMA AFELETI A AOGA

Na faatumulia i le faanoanoa le au afeleti a le aoga Alofi-o-Taoa mai Savaii sa tauva i le sailiga siamupini o afeleti a aoga i le atunuu i le aso Faraile o le vaiaso na te’a nei, ona o le maliu faafuasei ai o se tasi o o latou sui sa faamoemoe i ai le latou au mo se latou mua. Na maliu le alii o Faatau’u Enoka i le amataga o le vaiaso i se faalavelave tau taavale. O lea alii sa vasega 11 ma na maliu o ia ina ua pa’u mai tua o se taavale pikiapu sa malaga ai i le va o Letui ma Aopo. Na faaalia e se tasi sa i ai i lea aso e faapea, sa taumafai lea alii e logo le ave taavale ina ia faaalualu lemu le taavale e ala i le pop o le tino o le taavale. Peitai o le saoasaoa tele o le taavale na pa’u ai o ia ma maliu ai lava.

FAAMANUIAINA TASI I LE MALAGA I EGELANI

O se tamaitai e 12 tausaga e aoga i le Ah Mu Academy School e suafa ia Tasi Grey lea ua faamanuiaina i le malaga o lo o moomoo i ai tamaiti uma i Samoa – o le malaga faatasi lea ma le Manu Samoa e auai i le taamilosaga o le Ipu o le Lalolagi i Egelani i le masina fou. Ma e taua tele le matafaioi faapitoa o le a faatinoina e Tasi i lea taamilosaga. O Tasi ua filifilia mai le faitau selau o tamaiti e i le va o le 7 ma le 13 tausaga sa tauva e maua le avanoa e malaga faatasi ai ma le Manu Samoa i Egelani, ma o le a ia tamoe foi i luga o le malae e tauaao aloaia le polo ae lei amatalia le taaloga a le Manu Samoa ma Aferika i Saute. O le avanoa ua faamanuiaina ai Tasi o se vaega o le polokalama a le komiti faafoe o le Ipu o le Lalolagi, ina ia aofia ai le fanau iti i atunuu o lo o tauva.

TULAGA 10 AU NETIPOLO A SAMOA I LE LALOLAGI

Ua faaalia e le faiaoga ulu o le au netipolo a Samoa ia Marcia Hardcastle e faapea, e talitonu o ia, e tele se lumanai lelei mo le au a le atunuu, lea ua tulai mai i le tulaga 10, ina ua maea le taamilosaga o le ipu a le lalolagi sa tausinio ai. Na malolo le au a Samoa i le la taaloga ma Trinidad ma Tobago, i le sailiga lea o le tulaga iva, ma na faateia ai foi le au a Fiti i le tulaga na i ai le finau a Samoa i le la taaloga, ao lei feiloai ma Trinidad ma Tobago. Faaalia e Hardcastle, o le faaiuga o lea taaloga ma Fiti, e taua tele, ona o le tasi lenei o au lelei tele i le taamilosaga o le Oceania i le masina o Ianuari faatasi ai ma taaloga a le Pasefika i Papua Niu Kini i le masina na tea nei. Na faaalia foi e le faiaoga, ua fai si umi pe tusa o le valu i le sefulu tausaga, talu ona toilalo pea le au a Samoa i le au a Fiti. E ui ina o latou taumafai e suia ma latou galulue ai i totonu o le malae, peitai, e nao le afa o nei suiga sa mafai ona faatino i kuata uma o le taaloga, seia vagana ai le kuata mulimuli lea na suia ai loa le taumafaiga a Samoa, ma e faafetaia ai tamaitai sa finauina lea taaloga.