Ads by Google Ads by Google

TALA MAI SAMOA

MAUA FAIAOGA FOU MANU SAMOA TAITOAFITU

 

Ua faamautu mai e le ofisa sili o pulega o le Iuni Lakapi a Samoa, le tofa Faleomavaega Vincent Fepuleai, le filifilia ai lea o le faiaoga lagolago o le au taitoafitu a Egelani, le susuga Damian McGrath, ma faiaoga ulu o le Manu Samoa Taitoafitu. Na faaalia e Faleomavaega, ua talia aloaia e McGrath le avanoa ma le faatuatuaga ua tuuina atu na te tau’aveina ai le tofiga o le faiaoga ulu mo le au taitoafitu a le atunuu mo le isi lua tausaga o lo o lumanai. Fai mai a ia, o McGrath ua tele lona tomai fa’apitoa i tulaga tau taitaiga e pei ona o lo o avea ai o ia ma faiaoga lagolago a le au taitoafitu a Egelani. E to’a 29 i latou na tusi talosaga mo lea avanoa ina ua faalauiloaina e le Iuni Lakapi a Samoa le sailia o se faiaoga o le au taitoafitu a le atunuu, i le maea ai o le faamavaega a le alii faiaoga sa i ai, le afioga Fuimaono Titimaea Tafua. Mai le to’a 29 sa tusi talosaga, e toavalu i latou sa filifilia mo fa’atalatalanoaga ma faia i ai le faaiuga mulimuli a le iuni. Na saunoa Faleomavaega, ua maea ona logoina le susuga McGrath i le fa’amanuiaina o ia i le avanoa, ma ua faaalia foi e lea alii lona agaga fiafia i lea tulaga ua ia maua aemaise o le avanoa e galulue faatasi ai ma le Iuni Lakapi a Samoa e toe faafoi le tulaga lelei o le au taitoafitu a le atunuu e pei ona siamupini ai i le lalolagi i le 2010. O le galuega tele o le a muamua feagai ai ma le alii o McGrath, o le taumafai lea ina ia maua se avanoa o le Manu Samoa i taaloga o le Olemipeka i le tausaga fou i Rio de Janeiro, Brazil.

 

SUI NOFOAGA O LE TOESE IA MATI 2016

 

Ua i ai le fuafuaga a le malo e oo atu i le masina o Mati o le tausaga fou ua sii le toese i Tafaigata i lona nofoaga fou i Tanugamalala. O lea tulaga na fa’amaonia e le komesina lagolago o le falepuipui, le susuga Ulugia Niuia Aumua. Na ia faaalia, o lo o faamautu i le taimi nei le tulaga tau maliega i fanua o le a faaaogaina, ma e mautu loa ia feutagaiga ona amata loa lea o le fa’amoemoe mo le siitia atu o le toese i lea nofoaga fou. Fai mai a ia, e 100 eka ua uma ona faaagaaga mo lea fa’amoemoe ma o le a si’omia atoa lea fanua i se pa. O le 50 eka o le a fausia ai le falepuipui, ao le isi 50 eka o le a faaaoga e pagota e fai ai a latou maumaga ma mea toto. Na fa’amaonia e Ulugia le fausiaina e le malo Saina o le pa o le a si’omia ai le toese, ma o lo o uunaia e le malo ina ia oo atu i le faaiuga o le tausaga nei ua maea ona fausia lea pa. Na ia faaalia, ua amatalia galuega i le faamamaina o lea nofoaga faapea le totoina o meatoto e pei o talo ma fa’i ina ia oo atu i le taimi e amata ai galuega mo le fausia o le toese ua i ai ni meaai e faaaoga e le aufaigaluega.

 

TATALA ALOAIA LE CT SCAN I LE FALEMA’I

 

O le a sefe le faitau miliona o tupe a le malo e toe auina atu ai ni gasegase i atunuu i fafo mo faata ma isi togafitiga, ona o lea ua taunuu ma ua faaaoga foi le masini faata fa’apitoa o le CT Scan, mo le auaunaga faalesoifua maloloina. O le aso Tofi o le vaiaso nei na faataunuuina ai se sauniga fa’apitoa i le maota gasegase o Tupua Tamasese Meaole i Motootua, e tauaao aloaia atu ai lea masini faata fa’apitoa i le auaunaga faalesoifua maloloina. O le afioga i le alii palemia, le susuga Tuilaepa Sailele Malielegaoi, na saunoa i le saunoaga autu ma na ia faaalia ai, o lea masini ua faaigoaina o le Generation Three po o le augatupulaga lona tolu o ia ituaiga masini ua fausia, ma ua siitia foi matafaioi e mafai ona faatino e lea masini pe a fa’atusatusa i le masini sa i ai muamua lea na foaia mai e le malo Saina. O le tau atoa o le masini e $2.3 miliona tala Samoa. O le $1.5 miliona tala o lea aofai na faatupeina i se faiga faapaaga i le va o le Faalapotopotoga o Taui ma Faalavelave Faafuasei ma le Auaunaga Faalesoifua Maloloina. O le amataga o le masina o Iulai o le tausaga nei na taunuu mai ai lea masini ma o inisinia o le kamupani o le Philips lea na fausia le masini, sa faapipiiina ma sa faapea ona faagasolo ai ma aoaoga o le faigaluega i le faaaogaina o le masini. O le tau o le faata mo le tagata e toatasi i Amerika Samoa po o Niu Sila e tusa ma le $800 tala Amerika. Peitai ua fa’ailoa mai, na o le $50 tala Samoa e totogi mo le tagata e moomia le faaaogaina o lea masini i ona togafitiga.