FAAILOA LE MANU SAMOA MO LE IPU O LE LALOLAGI

E toatolu tama taaalo e alala ma taaalo i Samoa ua filifilia i le au a le Manu Samoa mo le taamilosaga o le ipu o le lalolagi i le masina fou i Egelani. O le aso Lua o le vaiaso nei na faalauiloa aloaia ai le au a le atunuu ma na momoli le faamalo a le alii palemia, o ia foi o le taitaifono o le Iuni Lakapi a Samoa, le susuga Tuilaepa Sailele Malielegaoi, i ia sui e toatolu ona o lo latou tinou ma finafinau i a latou taumafaiga e laeiina le ofu lanu moana a le Manu Samoa. O i latou ia o Patrick Faapale, Jake Grey ma Vavao Afemai. Na saunoa le alii faiaoga ulu, le susuga Steven Betham, ua tauia le finafinau o ia alii i le taamilosaga o le ipu o le Pasefika lea sa faia i Amerika ma Kanata. Fai mai a ia, e ui e lei tau lau o le faamoemoe i lea taamilosaga, ae ua faamalieina le pulega i le taaalo a sui mai Samoa sa taaalo ai. Na faaalia e Betham, ua sauniuni nei le au e malaga atu i Savaii i le aso Faraile nei mo a latou koleniga ma le avanoa e maimoa ai le mamalu o le atunuu i le motu tele i Salafai i le au, ona toe foi mai ai lea i Upolu e sauni ai mo Niu Sila ma malaga atu ai lava i Egelani mo le faamoemoe. E lua a latou taaloga faasamasamanoa i Egelani ae lei amata le ipu o le lalolagi, lea o le a taaalo ai ma le Barbarians faapea le au a le Wasps. O lo o pulu faatasi le Manu Samoa ma Aferika i Saute, Sikotilani ma Amerika. O le au la lea a le Manu Samoa mo le ipu o le lalolagi: Viliamu Afatia, Jake Grey, Logovi’i Mulipola, Anthony Perenise, Sakaria Taulafo, Wayne Ole Avei, Ma’atulimanu Leiataua,  Motu Matu’u, Fa’atiga Lemalu, Teofilo Paulo, Kane Thompson, Iosefa Joe Tekori, Maurie Fa’asavalu, Alafoti Faosiliva, TJ Ioane, Jack Lam, Vavae Tuilagi, Ofisa Treviranus (Kapeteni), Vavaō Afemai, Kahn Fotuali’i, Patrick Fa’apale, Tusiata Pisi, Mike Stanley, Ray Lee Lo, Johnny Leota, George Pisi, Paul Perez, Fa’atoina Autagavaia, Ken Pisi, Tim Nanai-Williams, Alesana Tuilagi (Sui Kapeteni).

FOAI E LE E.P.C. LE $1 MILIONA TALA I LE MALO

Mo le uluai taimi i le tala faasolopito i le auaunaga a le Faalapotopotoga Malosi Faaeletise, le EPC, ua silia i le $10 miliona tala Samoa ana tupe faasili ma ua manatu ai le pulega ma komiti faatonu o le EPC, e faamatuu atu se vaega tupe e $1 miliona tala Samoa e fesoasoani a i le Tala o le Tupe a le malo o lo o faagasolo nei. O lea foai sa tauaao aloaia atu e le minisita o Galuega, le afioga Manu’alesagalala Enokati Posala, i le taitai o le malo, le susuga Tuilaepa Sailele malielegaoi. Na saunoa le alii palemia ma ia momoli le faamalo i le pulega ma le komiti faafoe i le galulue punoua’i ua ausia ai lea tulaga. Na saunoa Tuilaepa, ua lata nei i le 40 tausaga o tautua i le Palemene, ma o le taimi muamua lenei ua maua ai se tupe a le malo mai le EPC, o se lu’itau ua leva ona faataatia e le malo mo ana ofisa tumaoti. Na saunoa le alii pule, le susuga Tologata Tile Tuimalealiifano, ua alu le tupe faaalu a le malo i le suauu sa masani ona faamoemoe tasi i ai le gaosia o le eletise ona ua faaaogaina le eletise faafouina mai le la, savili ma le vai.

ALOAIA LE TAUTUA A TUPULAGA TALAVOU

E toatolu talavou na faamanuiaina i faailoga taualoa mai le Faalapotopotoga o Leipa Faavaomalo, le International Labor Organization (I.L.O.) i se faiga faapaaga ma le Ofisa o le Amepasa o Amerika i Samoa, e faailoga ai le aso faavaomalo mo tupulaga talavou o le lalolagi. O ia tupulaga talavou na filifilia i a latou taumafaiga e foia ai nisi o faafitauli o lo o feagai ai ma le atunuu. O i latou ia e aofia ai Erna Takazawa, o se tamaitai fomai mata ua i’u mai aoga iunivesete i Niu Sila. O le talavou lona lua o le alii o Alama Muaulu ona o le ofo fua o lana fesoasoani i le faaleleia o laau suisui o komiti a tina mai afioaga eseese i Savaii. Ma le talavou lona tolu o le tamaitai fomai o Dr. Salote Vaai lea sa ia taulamua i se polokalama fesoasoani mo alo ma fanau e faataotolia i le falemai. Na tofu i latou ma le tinoitupe e $1,000 Samoa e fesoasoani i le faatupeina o a latou tautua.

TETEE  MOLIAGA O LE UMIA O AISA MA FANA

Ua teena e i latou e toatolu na molia i se osofaiga a leoleo i le vaiaso na te’a nei i Afiamalu i moliaga ua faaulu faasaga ia i latou. O i latou ua molia o Stewart Webber, Andrea Ah Chong ma Parapet Kaer ma na faailoa lo latou tetee i o latou moliaga e le latou loia, le tamaitai o Rosela Papalii i le aso Lua na te’a nei. E lei faalauiloaina ia moliaga ona e lei maea suesuega a leoleo e faamautu ai ia moliaga. O le vaiaso na te’a nei na faailoa ai e le sui sooupu o le Matagaluega o Leoleo, le susuga Su’a Muliaga Tiumalu e faapea, nao le pau moliaga ua maea ona faamautu o le umia o fualaau faasaina, ae lei maea ona faamautu isi moliaga. Na maua e leoleo i le latou osofaiga i le fale o Webber i Afiamalu ia le fualaau faasaina o le aisa, o paipa tioata e ula ai le aisa, o le laau faasaina o le mariuana, o tupe Samoa, Niu Sila, Ausetalia ma Amerika, faapea laau malosi. Ua talia e le Faamasinoga le talosaga a le loia a e ua molia ina ia tatala i tua tamaitai e toalua o lo o aafia e faatali ai lo la faamasinoga, i lalo o le tuutuuga e nonofo i laua i lalo o le vaavaaiga a le tina o se tasi o ia tamaitai, le tina ia Eseta Ah Chong. O lo o taofia pea Webber i lalo o le vaavaaiga a leoleo e talia ai lo latou faamasinoga lea e amata faagasolo i le aso 18 o Ianuari, 2016.