AUINA LEOLEO E TO’A 10 E FESOASOANI I LE TOESE

Ua faamautu mai e le Matagaluega o Leoleo le tuuina atu o lana fesoasoani mo le toese i Tafaigata, e ala i alii ma tamaitai leoleo e to’asefulu lea ua auina atu e fesoasoani i le leoleoina o le lotoa o le toese ina ia tau foia ai le faafitauli o lo o tulai mai pea, o le sosola ese o pagota. E to’asefulu pagota na sosola ese mai le toese i le faaiuga o le vaiaso na te’a nei. Na saunoa le sui sooupu o le matagaluega, le susuga Su’a Muliaga Tiumalu e faapea, o lea faafitauli e mafua mai ona e fou le toatele o le aufaigaluega faapea le pulega, toe to’agaogao. E le gata i lea, o le leai o se pa e siomia ai le lotoa atoa, ua atili faafaigofie ai i pagota ona sosola ese. Na faamalamalama e Su’a, o ia malu o le malo e to’asefulu e mo nao se vaitaimi e galulue ai i le toese. Fai mai a ia, e pe a ma le masina o lo o fuafua e galulue ai i latou ia i le toese.

TOE TULAI MAI FOI FUSUAGA TAMITI AOGA

Ua toe alia’e mai foi fusuaga i le va o tamaiti aoga i totonu o le taulaga i Apia ma o se tulaga e le o toe tuu avanoa lava i ai le Matagaluega o Leoleo. Na saunoa le sui sooupu le susuga Su’a Muliaga Tiumalu, e to’a 16 tamaiti aoga na taofia mai le vaiaso na te’a nei ona o fusuaga i nofoaga faitele i le taulaga aemaise lava i le fili maketi i Savalalo. Mai lea aofaiga e to’a 10 mai le aoga o matata eseese a le Ekalesia Katoliko, le Don Bosco, ae toaono tamaiti mai le Kolisi o Avele. O ia tamaiti aoga na taofia e leoleo i le aso Faraile o le vaiaso na te’a nei ae tatala i tua i le aso Gafua o le vaiaso nei, ma o le a tutulai i luma o le Faamasinoga i le aso 18 o le masina nei. Fai mai a ia, o tamaiti aoga uma sa faasua’ava i le taimi na tupu ai ia fusuaga ma ua molia i le tau’ai maa ma le faatupu vevesi i nofoaga faitele.

FALEPUIPUI LE AUSO FAIAIGA MA LO LA TUAFAFINE

Ua faasalaina e le Faamasinoga Maualuga se auso e toalua ina ua ioe i lo la faiaiga ma lo la tuafafine. Na faia ia solitulafono a o 15 tausaga o le la tuafafine i se afioaga i Savaii. Na faaalia i faamaumauga a le Faamasinoga e faapea, e faalua ona tulai mai lea solitulafono i le lua tausaga ua tuanai. O le uso matua e 21 tausaga ma e sefulu tausaga ua faasalaina ai o ia i le falepuipui ina ua faamaonia moliaga e lua o le faiaiga faamalosi faasaga ia te ia, ao le uso laititi e 19 tausaga ma ua faasalaina o ia i le 12 masina i le falepuipui ina ua faamaonia le moliaga o le mataifale. Ua tuuina atu nei le teineititi na aafia i lalo o le vaavaaiga a le Toomaga mo e Puapuagatia. Ae lei faalauiloaina lana faaiuga, na saunoa Faamasino Vui Clarence Nelson, ua manino i gaioiga a lea auso lo la solia o lo la va tapuia ma lo la tuafafine. Fai mai a ia, ua talafeagai faasalaga faafalepuipui mo i laua ina ia auina atu ai le feau ma se lapataiga i le mataga o lea solitulafono.

MOOMIA NISI SUI TAMAITAI I LE PALEMENE

O le vaiaso nei o lo o faagasolo ai ni aoaoga faapitoa i Apia mo le au tusitala, o le fanau aoga i le Iunivesete Aoao o Samoa, faapea nisi o tina ma tamaitai o lo o sauniuni e tauva i le faiga palota lautele a le atunuu i le tausaga fou, e aotauina ai i auala e faatino ai lo latou tiute e faatupulaia le fuainumera o sui faipule tamaitai i totonu o le Palemene. E lua aso na faafoeina ai ni aoaoga faapitoa mo le fanau o lo o aotauina i vasega faatusitala i le iunivesete, i metotia e lipotia ai taualumaga o le faiga palota i le tausaga fou i se auala talafeagai e talia gofie e alii faapea tamaitai. Na sosoo ai ma se aoaoga faapitoa mo le au tusitala o lo o galulue nei i nusipepa, leitio ma TV. Sa auai tina ma tamaitai o lo o fuafua e tauva i le faiga palota i le tausaga fou i se aoaoga faapitoa e tasi le aso e faamalamalama ai ia faiga faaupufaiomalo, faapea le teuteuga i le Faavae na faatuina i le 2013 ina ia faamalosia ai le nofoia e sui faipule tamaitai o nofoa o le Palemene I so o se paeaiga. O ia aoaoga faapitoa o lo o faatupeina e itutino o Malo Aufaatasi e patino mo tina ma tamaitai (U.N. Women) faapea le polokalama atinae (UNDP) i se faiga faapaaga ma le malo Samoa faapea le malo Ausetalia.