MALOLO LE MANU SAMOA, SAUNI IPU O LE LALOLAGI

Na faaalia le fa’anoanoa o le alii faiaoga ulu o le Manu Samoa, le susuga Steven Betham, ona o le faiaina o le Manu Samoa i le la sailiga siamupini ma le au malosi a Fiti i le vaiaso nei, lea na manumalo ai Fiti i ai e 39 i le 29, ma ua siamupini ai Fiti i le ta’amilosaga o le ipu o le Pasefika. Na saunoa Betham, o le fa’atamala lava o le Manu na mafua ai ona sao Fiti i lea taaloga, ma ua manino itu e ao ona toe fa’aleleia i a latou sauniuniga mo le ta’amilosaga o le ipu o le lalolagi ia Setema. Na ia saunoa foi, e ui e lei tau lau ole fa’amoemoe, ae o se avanoa taua lea sa maua e tama taaalo o lo o taumafai mo le au mo le ipu o le lalolagi. Fai mai a ia, e maualuga lona talitonuga e lelei atu le taumafai a le au o le a filifilia a le Manu Samoa mo le ipu o le lalolagi nai lo o le au na taaalo i le ipu o le Pasefika.

TOATELE PAGOTA SOSOLA MAI TAFAIGATA

O le po o le aso Toonai na te’a nei na tulai mai ai se solaaga a pagota e to’asefulu mai le falepuipui i Tafaigata ma o le pagota aupito i laititi sa aofia ai e na o le 13 tausaga. Na faamaonia lea solaaga e le alii komesina lagolago o le Matagaluega o Falepuipui, le susuga Ulugia Niuia Aumua, ma na ia taua, sa mafai ona sosola ese ia pagota e ala i se pu i le puipui o lo latou sela. Na faamatala e Ulugia e faapea, sa faapu e ia pagota le puipui o le sela seia oo ina mafai ona ofi ai le pagota aupito i tino laititi sa i ai. Ina ua oo lea pagota i fafo, sa ia faalauteleina le pu ma sa faapea ona sosola ese mai ai le isi toaiva sa i totonu o le sela. Peitai na faaalia e Ulugia, ua toe maua uma ia pagota. Fai mai a ia, e toatolu pagota sa i ai i totonu o le sela e lei o ai i lea solaaga. Na maua le toafitu i le aso Sa ae na maua le isi vaega i le aso Gafua. Na saunoa Ulugia, e i ai mafuaaga ua tulai mai ai le faigofie ona sosola ese pagota mai le toese. Na ia faaalia, e le lava le latou aufaigaluega i le taimi nei toe leai se pa e siomia ai le lotoa o le toese. Na ia faaalia, e toafitu le latou aufaigaluega o lo o faamalolo le tumau ao faia suesuega i se mataupu o lo o ua i luma nei o le Faamasinoga, ma seiloga lava e maua le faaiuga o lea mataupu faatoa mafai ona toe faafaigaluega nisi tagata.

AUTU O LE ASO O TAMA O LENEI TAUSAGA

“O faiga faavae po o iugafono a nuu, o anofale o faiganuu lelei,” o le manatu autu lea ua ave i ai le faataua ma le faamamafa a le malo mo le faamanatuina o le aso fa’apitoa mo tama o lenei tausaga, e tauala mai le Matagaluega o Tina ma Tamaitai, Atinae o Nuu ma Agafesootai. O le faataua o lenei sini autu, ina ia mafai ai ona faamalosia ma uunaia pulega lelei i nuu ma afioaga e pei ona aiaia i lalo o le tulafono faavae o le Pulega a Alii ma Faipule 2015. O faiga faavae ma iugafono, e le taumateina ma fesiligia le taua tele i le nofo va lelei ai o nuu ma afioaga, ma o se tulaga taua e aloaia ma amanaia tele e le malo, e faataua ai le saofaiga mamalu a alii ma faipule, ona o a latou faaiuga fai, e ogatasi ma faaiuga fai a le malo mo le uunaia o faiganuu ia lelei. O le taeao ananafi la lea na fa’atautaia ai se polakalame taua i le maota o Tooa Salamasina i Sogi e fa’alauiloa ai nisi o galuega mai afioaga e iva ua filifilia, e taimua ai lava i le sini autu. E lima afioaga mai Savaii ae fa afioaga mai Upolu nei, lea ua ave i ai le faataua o lea polakalame. Sa faapea foi ona fa’alauiloa ai ma se lipoti o suesuega a le matagaluega i nisi o mataupu faatauaina tele, e aofia ai le tulaga faataitai o tina ua avea ma matai, ma nisi o lipoti mai suesuega a le matagaluega ma ana paaga, e aofia ai mataupu tau soifua maloloina mo tina ma tamaitai i Samoa nei, faapea mataupu tau aia tutusa.

VAELUAINA O LE ITUMALO SAFATA

Ua toe tolopo i le masina o Novema ia le iloiloga o le talosaga a nisi o matai o le itumalo Safata i le Faamasinoga ina ia toe iloilo le vaeluaina o le itumalo i lalo o le tulafono ua pasia e le malo, mo le faiga palota lautele a le atunuu i le tausaga fou. O lenei talosaga a le itumalo Safata o lo o taulamua ai le alii sa avea muamua ma sui faipule o le itumalo i le paeaiga ua mavae, le afioga Tuia Paepae Letoa. O lea iloiloga sa tuu e faagasolo i le Faamasinoga o Fanua ma Suafa i le aso Lulu na sei mavae atu nei, ae peitai sa fa’ailoa mai e se sui sinia o le Matagaluega o Faamasinoga e faapea, ua toe tolopo le mataupu i le aso 3 o Novema, 2015. Na ia fa’ailoa foi, ua talia e le peresetene o le Faamasinoga o Fanua ma Suafa, le afioga Tagaloa Sale Kerslake, ia le talosaga a Tuia ina ia toe tolopo lea mataupu ona e malaga o ia i fafo i le vaitaimi na faatulagaina e faia ai. E pei ona silafia, o lo o tetee pea le toatele o matai o le itumalo Safata i le vaeluaina e le malo o lo latou itumalo mo le faiga palota i le tausaga fou, lea ua vaeluaina ai ia Alataua ma Sa Tunumafono. O lo o finau le itumalo, e le o tuaoi ia na fa’avaeina e o latou tua’a ua lagomau mai i Tia Sa, ae o Siulepa ma ona Tua faapea Togamau ma ona Tua.