Ads by Google Ads by Google

Tala mai Samoa

MALIU FAAFUASEI SE TINA I LE LAAU MALOSI A LONA TUAGANE

O lo o suesueina nei e leoleo se faalavelave na tulai mai i le faaiuga o le vaiaso na tea nei, na uma faafuasei ai le soifua o se tina ma o lo o tuuaia ai lona lava tuagane. E lei faamautu mai e le ofisa o leoleo lea lipoti, ae i faamatalaga na maua mai i sosia e faapea, sa oo atu lea tina i le fale o lona tuagane o fai gasesega o taumafataga o le afiafi.

Ao talatalanoa i laua, sa uu e le tuagane o le ua maliu se laau malosi ma sa faapea ona pa faafuasei le laau malosi i se gaioiga le fuafuaina a le alii, ma lavea ai lona tuafafine. O le taavale a se aiga tuaoi sa faaaoga e tili atu ai lea tina i le falemai i Leulumoega, peitai e lei manuia togafitiga sa taumafai i ai alii ma tamaitai fomai i le tau faasaoina o le soifua o lea tina. O lo o taofia nei e leoleo le alii e ana le laau malosi na tupu ai le faalavelave ma e lei faalauiloa mai foi po o afea e tulai ai o ia i le faamasinoga.

SELE PO’O LE LAUAO O TUILAEPA I LE ASO 23 O OKETOPA

O le aso 23 o le masina nei ua faaalia e le alii palemia, le susuga Tuilaepa Sailele Malielegaoi, o le a sele po’o ai lona lauao, o sona sao lea i le sailiga seleni a le Sosaiete o le Kanesa a Samoa. O le faaiuga o le vaiaso na tea nei na faia ai lea saunoaga a le taitai o le malo, i se sauniga faalauaitele e tatala aloaia ai se tasi o faamoemoe saili tupe a le Sosaiete o le Kanesa a le atunuu, sa faatautaia i le maota o le Y-Not i Matautu-tai, lea sa faafuga uma ai ao o nisi o tamalii iloga o le atunuu ae maua ai seleni e totogi ane e nisi o kamupani i le atunuu ma e sa lagolagoina lea faamoemoe a le sosaiete.

O le tinoitupe na mafai ona maua i lea po, e $107,000 ma na faaalia e le peresetene o le sosaiete, le susuga i le alii loia ia Daryl Clark lona agaga fiafia tele ma le faafetai ona o le a mafai nei ona faatinoina le tele o faamoemoega lelei a le sosaiete uipuia ma le togafitia o e ua maua i gasegase eseese o le kanesa i totonu o le atunuu. E silia i le toa 20 i latou sa faafugaese uma o latou lauao i lea sailiga seleni e aofia ai nisi o fomai e pei o le susuga Leituala Dr. Ben Matalavea, o alii loia e aofia ai le alii peresetene faapea le susuga Leota Raymond Schuster, o nisi o le pulega o le Blue Sky ma le Digicel ma nisi o le au faipisinisi ma tamalii iloga o le atunuu e pei o le sa avea ma kapeteni o le Manu Samoa, le susuga Papaliitele Pita Fatialofa ma isi.

Na faaalia e le peresetene o le sosaiete e faapea, o lo o talia se famatalaga auiliili mai le afioga i le alii palemia e tusa ai ma lana ofo na faalauiloa i lea po e ala i le faafuga uma o lona lauao, ma le tuutuuga e tasi na ia faaalia o le a faia i le aso Lua o le vaiaso fou, le aso 23 o le masina lava lenei o Oketopa i le itula e fa i le afiafim pe a maea le tauaofiaga a le palemene i lea lava aso. O se finagalo na talisapaia ma le fiafia e le peresetene ma le Soasaiete o le Kanesa a Samoa ma ua latou faaalia le latou faafetai i le tama o le atunuu ona o lona agaga fia fesoasoani moni i le faasaoina o le soifua o o tatou tagata o lo o aafia i le faamai o le kanesa ma e le taumateina le tele o se seleni o le a maua ai. O le faleotiulu o John i Apia ua finagalo le alii palemia e faafuga ai lona lauao.

FUAFUA LE UAFU FAAVAOMALO FOU i LE TOLOTOLO i VAiUSU

O le fonotaga a le komiti o le atinae a le kapeneta i le vaiaso na tea nei na faailoa ai e le taitai o le malo, le alii palemia ia fuafuaga a le malo e faatuina se uafu fou faavaomalo i le tolotolo i Vaiusu, mai le uafu o lo o i ai nei i Matautu-tai.

Na saunoa le susuga Tuilaepa Sailele Malielegaoi, o le uafu o lo o i Matautu-tai i le taimi nei, ua tele ni vaega ua tau feto’i ai le tulaga  o le faalauteleina ma nisi o atinae e faatuina ai, aemaise o vaega e faaputuina ai ia pusa lau oloa tetele. Na faaalia e le alii palemia, ua ia faatonuina matagaluega e fitoitonu i ai mataupu faapenei aemaise o le au inisinia poto masani ma i latou e poto faapitoa. e toe iloiloina se lipoti sa faia i le 50 tausaga talu ai e ni inisinia mai atunuu i fafo, ae lei faatuina le uafu i Matautu-tai lea sa faalauiloa ai lea lipoti. O le tolotolo i le afioaga o Vaiusu, o se nofoaga talafeagai tele e tatau ona faatuina ai lea atinae o le uafu. i lea lava feiloaiga na faaalia ai foi e faapea, o lea nofoaga i Vaiusu ua talafeagai foi mo le faatuina ai o tane tetele mo suauu, aemaise o le le talafeagai o le nofoaga o lo o faatutuina ai i le taimi nei i Sogi.

O se fuafuaga alualu mamao na faaalia e le alii palemia, a amata nei e tatau ona maea i le isi 10 tausaga o lumanai. Peitai na ia faaalia, e tatau ona tatou tepa taulai i le isi 50 po o le 100 tausaga i le lumanai ma le taotoga e tatau ona i ai Samoa i lena vaitau. Ua talafeuga foi lea faamoemoe ma se talosaga a le iunivesete Aoao o Samoa i le Papaigalagala i le fia faavaeina o se aoga mo le au seila ma malini i Mulinuu, ma o se fuafuaga ua talafeagai tonu ma le ono faia o lea suiga o le uafu i Vaiusu. O se tulaga foi ua faamanino atili ai le taua tele ma le aoga, atoa foi ma le sa’o o le faatauina e le malo o le kamupani o le PFL, le Pacific Forum Line, ma taumafaiga a le atunuu e faalauteleina ana faiga faapisinisi i lea foi atinae.

AMATA FAASOASOA LE SUAVAI I LE VAITAU LENEI O MUGALA

Ua amata faasoasoaina nei le suavai taumafa mo aiga e le pulega o le suavai a le atunuu, ona o le utiuti o timuga i lenei vaitau o le tausaga po o le vaitau o mugala, e ui ina vaaia pea le palasi o timuga i nisi o aso.

O nisi o afioaga i le talafatai o le taulaga ma nisi o nofoaga taulalata ane i le agai atu lea i Vailele, Fagalii faasolo ane ai i Tanugamanono agai atu ai i Vailima, ma le agai atu i nofoaga i sisifo e aofia ai Lotopa, Siusega ma Vaitele, e taiono itula e sua ma toe pe atu ai paipa i taimi eseese o le aso, ua fetuunai ai nei le faasoaina o le suavai, ma ua faailoa mai e le pulega, o se faaiuga ua faia ona o le le lava o le suavai faato’a i tanoa e pei ona i ai i Fuluasou, lea o loo faagafua mai ai le suavai mo le taulaga ma afioaga lalata ane.

E le o mafai ona faamautu mai e le pulega le umi o le a faia ai lea tulaga o le taiono o itula ma tape paipa mo nisi o afioaga, ae faaola isi. Peitai, ua sili atu ua i ai le tausaga nei faatusa i le tausaga ua mavae atu, lea na amata faasoasoa mai ai le suavai mai le masina o iuni seia oo i le faaiuga o Novema.

O le fautuaga ua tuuina mai e le pulega mo aiga, ina ia faato’a le suavai ma faaaoga tatau ae taofia le soona faaaoga faaletatau i faiga e pei o le fufuluina o taavale.