$1.5 MILIONA LE GAU TALIGAMALO I LE OLOPELEKI

O le tala fiafia ua oo mai le au a le Olopeleki i laufanua o Samoa ma e lei faigofie le latou manumalo i le Manu Samoa, ma sa fiafia tagata uma i lea taaloga faapea le pati sa talimalo ai le Iuni Lakapi a Samoa i le au mai Niu Sila. Peitai o le tala fa’anoanoa, e $1.5 miliona tala Samoa le gau a le iuni i lea taligamalo. O lea tulaga na fa’amaonia mai e le taitaifono o le iuni, le alii palemia, le susuga Tuilaepa Sailele Malielegaoi, i se feiloa’iga ma le au tusitala. Na fa’ailoa e le alii palemia e faapea, o le aofaiga atoa o le tupe a le iuni na alu i lea taligamalo, e $3.4 miliona tala Samoa. O lea aofaiga atoa na totogi ai tapenaga uma sa faia faapea alauni o tama taaalo. O le tupe na aoina e le iuni i le Apia Park i le aso o le taaloga faapea tupe na maua mai kamupani sa lagolagoina lea taaloga (sponsors), e $1.9 miliona tala Samoa.”O lona uiga, e $1.5 miliona tala le tupe a le iuni na gau,” o a Tuilaepa lea. “Ma o le a fa’amoemoe foi le iuni i itutino o le malo e pei o le Pulega o Tupe Faavaomalo (SIFA), e fa’atumuina le pu lea. O le mea moni, e moomia e le Iuni Lakapi a Samoa le pe a ma le $10 miliona tala i tausaga uma e faatupe ai malaga a le Manu Samoa i atunuu i fafo.”

TAOFIA TINA INITIA MA LANA TAMA OSOFAIGA A LEOLEO

O lo o aofia ai i tagata e toafa na molia ma taofia e leoleo i le latou osofaiga lea na faatinoina i le aso Tofi o le vaiaso na te’a nei i se fale i Afiamalu, ia se tina Initia ma lana tama tama e i va o le 13 ma le 19 tausaga le matua. O le isi toalua o se alii e 45 tausaga ma se tamaitai e 26 tausaga, o le tama teine a se tasi o tina faipisinisi iloga i le atunuu. O lea tina Initia e 42 tausaga o se tagata faigaluega a lea tina faipisinisi, ma ua faigaluega nei o ia mo le tamaitai e 26 tausaga na maua i le osofaiga. Na faaalia e le sooupu o le Matagaluega o Leoleo, le susuga Su’a Muliaga Tiumalu e faapea, o le a tulai tagata matutua e toatolu na maua i lea osofaiga i le Faamasinoga i le aso Tofi o le vaiaso nei, ae ua tuuina atu le tamaititi e suesueina i le Faamasinoga a Tupulaga Talavou. Ua molia nei tagata matutua e toatolu i lea mataupu i moliaga o le umia o fualaau faasaina, ae o lo o faamautu suesuega a leoleo i laau malosi na maua ai ona faaulu ai lea moliaga faasaga ia i latou ua molia. O laau malosi na maua e aofia ai se laau malosi e faaaoga i mea mamao (sniper gun) faapea se fana laititi o le ituaiga o le 45 semi-automatic. E le gata i lea, na maua foi le tinoitupe e silia i le $30,000 tupe Samoa ma tupe mai fafo. O fualaau faasaina na maua o le aisa ma le mariuana.

TO’A 121 UA PESIA I LE DENGUE FEVER

Ua oo atu nei i le to’a 121 tagata Samoa ua fa’amaonia lo latou tau’aveina o le vairusi o le faama’i o le fiva o ponaivi po o le dengue fever, e pei ona faaalia i fa’amaumauga lata mai a le Matagaluega o le Soifua Maloloina, lea o lo o mataituina le pepesi o lea faama’i i totonu o le atunuu. Na faaalia foi i ia fa’amaumauga le aafia ai o Samoa i le ituaiga lona tolu o le fiva o ponaivi lea na amata alia’e mai i le amataga o le masina o Iulai. O le toatele o i latou o lo o ua aafia nei e mai i alaalafaga i le itu i matu i sisifo o Upolu, e ui ua fa’amauina foi nisi ua aafia mai i isi vaega o le atunuu. O i latou e i le va o le 25 tausaga le matutua o lo o matele ina aafia i lenei faama’i. I fa’amaumauga lata mai a le matagaluega na taua ai, e to’a 12 i latou ua faataotolia i le maota gasegase ma le to’alua ua oo i auga ogaoga o lenei lava faama’i. Mai le to’a 437 tagata na faia i ai suesuega faasaienisi fa’apitoa, e to’a 60 i latou ua fa’amaonia le aafia i lenei faama’i.

FESILIGIA LE FAAIUGA A LE KAPENETA

E lei maua lava e le alii sa avea ma komesina o faiga palota, le afioga Papalii Malietau Laietoa se fa’aaliga aloaia mai le malo e logoina ai o ia i le faamalolo tumau o ia mai lona tofiga. O lea tulaga na fa’amaonia e nisi e vavalalata ma Papalii ona e lei fia talanoa Papalii i le au tusitala i lea mataupu. O le vaiaso na tea nei na saunoa ai le minisita o Pisinisi Lautele a le malo, le afioga Lautafi Selafi Purcell e faapea, o le faaiuga e fa’amuta le konekarate a Papalii sa faia lea e le kapeneta i le aso 24 o Iuni, ina ua maea suesuega a le komisi e pulega tagata faigaluega a le malo, le PSC, i tuuaiga o faiga le talafeagai sa tuuaia ai o ia. Peitai o lo o manino i lalo o le laina 3 o le vaega 87 o le Faavae, o ia ituaiga faaiuga e tatau ona fa’amaonia e le Ao o le Malo, le afioga Tui Atua Tupua Tamasese Efi. Sa fesiligia le ofisa o le Ao o le Malo pe na maua atu se fa’aaliga aloaia i le faamalolo tumau o le komesina o faiga palota mai lona tofiga, ma sa fa’ailoa mai e le failautusi, e lei maua atu se fa’aaliga aloaia i lea mataupu. O lo o talia nei se gaioiga a Papalii e tali atu ai i le faaiuga a le kapeneta, ma e le o mautinoa pe oo i le Faamasinoga lea mataupu.