FAAOOLIMA MATAGA I LE TAMAITAI PERETANIA

Ua faaulu nei i le Matagaluega o Leoleo le tagi a se tamaitai mai Peretania e aoga i le Iunivesete o Cambridge i Ausetalia ae o lo o i Samoa nei i se vaega taua o aoaoga, e faamasani ai i le faatinoina o galuega po o le “working experience,” lea o lo o galue ai nei i le vaega e faatoai atu i ai i latou e aafia i faalavelave tutupu faafuasei, i le falemai tele i Motootua. O le tagi a lea tamaitai e faasaga i se alii sa faigaluega i le fale e fai ai fofo o le tino (massage), lea o lo o ia tuuaia i le faaoolima mataga. Na faaalia e le sooupu a le Matagaluega o Leoleo, le susuga Su’a Muliaga Tiumalu e faapea, sa alu atu lea tamaitai e 23 tausaga i le fale o le Touch of Samoa Spa i Tanugamanono i le aso 21 o le masina nei mo sana fofo (massage). Na faaalia e lea tamaitai, sa totogi le tau o le fofo i le pito i luma o le fale, ona faasino lea o ia e le ua molia i se potu e fai ai lana fofo. Ina ua oo o ia i totonu, sa tape e lea alii moli ma e lei fofoina o ia e lea alii, ae sa ia tagotago i ona itutino sa. Na saunoa lea tamaitai, o lona fefe tele sa le mafai ai ona ia ‘e’e ma ua le mafai foi ona ia tuua le ptou ona o le pogisa. Ina ua uma ona faia tagotagoga a lea alii sa alu sao loa lea tamaitai i le ofisa o leoleo ma faaulu ai lana tagi. O lo o taofia nei i lalo o le vaavaaiga a leoleo lea alii mai afioaga o Vaitoloa ma Iva, Savaii ma o le tulai i le Faamasinoga i le aso 17 o Aukuso.

FAIAIGA MA LONA LAVA AFAFINE MONI

O lo o suesueina nei e leoleo se tama e 50 tausaga mai le afioaga o Luatuanuu ona o tuuaiga o lona faiaiga ma lona lava afafine moni i se mafutaga faapouliuli. Na lipotia atu lenei mataupu i le Matagaluega o Leoleo e sui o le faalapotopotoga o le Toomaga mo e Puapuagatia, lea o lo fesoasoani i le teineititi na aafia e ala i faatalatalanoaga. Na faaalia, na lipotia lenei solitulafono e le tina o lea teineititi i le Toomaga ma faapea ona logoina ai loa ma leoleo. O lo o faagasolo nei suesuega a leoleo i lenei mataupu ma e lei faamautuina foi moliaga e faaulu faasaga i le tama ua molia, lea o lo o taofia nei i lalo o le vaavaaiga a leoleo. Na faaalia, sa faia se mafutaga faapouliuli a lea tama ma lona afafine moni e aofia ai faigaaiga amata mai ia Tesema o le tausaga na te’a nei seia oo mai ia Me o le tausaga nei.

MAUA AISA, TUPE MA FANA I LE OSOFAIGA A LEOLEO

O le vaveao o le aso Tofi na sei mavae atu nei na osofaia ai e leoleo se fale i Afiamalu ma latou maua se nofoaga e gaosia ai le fualaau faasaina o le aisa. E le gata i lea, e silia ma $20,000 tala Samoa e ese mai i tupe Amerika, Ausetalia ma Niu Sila na maua ai. Na faaalia e le alii komesina, le susuga Egon Keil, ua leva ona latou mataituina lea fale ma latou maua ai, e le gata o lo o gaosia ai le fualaau faasaina o le aisa, ae o lo o i ai foi le laau faasaina o le mariuana faapea ia laau malosi e le fa’atagaina i totonu o le atunuu. E toafa i latou ua molia ma taofia nei e leoleo, o se tagata Samoa ma le isi vaega e toatolu o ni tagata malaga mai i atunuu i fafo e aofia ai se tamaitiiti e 17 tausaga le matua. O lo o suesueina nei foi e leoleo le tulaga o le nonofo ai i Samoa o ia tagata pe le silia aso faatulagaina o lo o fa’atagaina e alala ai i totonu o le atunuu. E lei faamautuina mai le aso e tutulai ai i latou ia luma o le Faamasinoga faapea moliaga faasaga ia i latou.

TATALA OFISA FOU IUNI MUAMUA O TAGATA FAIGALUEGA

O le aso ananafi na tatala aloaia ai le ofisa fou o le a faafoe ai galuega a le Iuni Muamua o Tagata Faigaluega i Samoa le Samoa First Union, e pei ona uluai faavaeina i le masina na sei mavae atu nei. O lenei faalapotoptoga e pei ona faatuina i Samoa, e afua mai i le Iuni o tagata Faigaluega i Niu Sila. Na faaalia e le susuga ia Jerome Mika, o lo o gafa ma le faamaopopoina o lea faalapotoptoga i le atunuu, i le taimi nei, o lea faatoa tasi le masina talu ona faavae le Iuni, ao lea ua tusa ma le tasi le afe le aofai o ona sui auai ua maea ona resitara. Ae i le sauniga ananafi na saunoa ai le failautusi aoao o le Iuni mai Niu Sila ia Robert Reid e faapea, i totonu o Niu Sila e tusa ma le 27,000 sui auai o lenei iuni, ae pe tusa o le 5,000 i le 6,000 o lea aofaiga o tagata Samoa, ma e i ai foi le komiti o tagata Pasefika i totonu o le Iuni. O lea komiti sa taulamua ai tagata Samoa i le faia o fonotaga, ma o le malaga mai la i Samoa o nisi o sui ma talanoaina lenei mataupu i le faatuina lea o se faalapotoptoga e gafa faapenei a tagata faigaluega e gafa ma mataupu tau tagata faigaluega i Samoa, lea na mafua ai ona oo mai le Iuni i Samoa nei.