MASII LE MANU SAMOA I AMERIKA MA KANATA

Ua filifilia e le faiaoga ulu a le Manu Samoa, le susuga Steven Betham, ia tama taaalo o lo o taaalo faakonekarate i fafo faapea nisi o tama taaalo o lo o taaalo ma faamutu lava i Samoa nei, i le au e to’a 31 na tuua Samoa i le aso ananafi mo le taamilosaga o le Ipu o le Pasefika (Pacific Nations Cup) lea e amata faagasolo i le faaiuga o le vaiaso nei i Amerika ma Kanata. O lo o kapeteniina e le susuga Alesana Tuilagi le au ona o lo o faamalolo le alii kapeteni ia Ofisa Treviranus, ona o manuaga i lona ua mai le taaloga ma le Olopeleki i le vaiaso na te’a nei. Peitai na faaalia e Betham, o lo o i ai le faamoemoe e oo atu i le vaitaimi o le Ipu o le Lalolagi ua toe malosi atoatoa le alii kapeteni. Na saunoa Betham, o le taimi nei ua taula’i le latou silasila i le taamilosaga o le PNC ma o lo o tagai foi i vaega na faaletonu i le taaloga ma le Olopeleki ina ia toe faaleleia. O le au la lenei ua malaga atu. Laina i luma; Andrew Williams, Maatulimanu Leiataua, Motu Matuu, Viliamu Afatia, Jake Grey, James Johnston, Anthony Perenise, Sakaria Taulafo, Faatiga Lemalu, Maselino Paulino, Teofilo Paulo, Joe Tekori, Oneone Faafou, Francis Ieremia, TJ Ioane, Jack Lam, Faifili Levave, Vavae Tuilagi. Laina i tua; Vavao Afemai, Pele Cowley, Patrick Faapale, Michael Stanley, Faialaga Afamasaga, Johnny Leota, Paul Perez, Alofa Alofa, Faleniu Iosi, Sinoti Sinoti, Alesana Tuilagi (kapeteni), Faatoina Autagavaia, Ah See Tuala. O le taaloga muamua a le Manu Samoa i le taamilosaga o le PNC o le a fetaui ai ma le au a le Aeto mai Amerika i le aso Toonai nei i San Jose, Kalefonia.

GAOI MAI LE KAMUPANI O LE BLUEBIRD

O le faaiuga o le vaiaso na te’a nei na tulai ai i luma o le Faamasinoga Maualuga se alii sa faigaluega i le kamupani o le Bluebird Lumber & Hardware, ma ia ioeina ai moliaga e fa o le gaoi ao avea ma tagata faigaluega faasaga ia te ia. O lea alii o Laloata Timo. Na faaalia i fa’amaumauga a le Faamasinoga e faapea, o le va o le aso tolu o Oketopa ma le masina o Novema o le tausaga na te’a nei na tulai mai ai ia solitulafono ma e eseese uma lava taimi na fa’atinoina ai. E oo atu i le $3,315 le tau aofai o laupapa ma isi oloa eseese a le kamupani na ave faagaoi e le ua molia. Ua toe tolopoina nei e Faamasino Elizabeth Aitken lenei mataupu i le aso 27 o le masina nei mo se lipoti mai le Ofisa Faanofovaavaaia. Ua tuuina atu foi le mataupu ia Faamasino Vui Clarence Nelson mo se faaiuga. E leai se loia o tulai mo le ua molia.

FONOTAGA A MINISITA O LE VA I FAFO I AUSETALIA

O le vaiaso na te’a nei na talimalo ai le malo Ausetalia i le fonotaga a minisita o le Va i Fafo mai atunuu e 16 o le Pasefika o lo o fai ma sui o le fono a atunuu o le Pasefika po o le Forum, e soalaupule ni laasaga mausali e faaleleia ai le pulea o galuega fesoasoani i taimi e tutupu ai faalavelave faafuasei faalenatura. O le alii sui palemia o Samoa, le susuga Fonotoe Nuafesili Pierre Meredith sa fai ma sui o le atunuu i lea fonotaga ma sa la faatasi ai ma le Amepasa o Samoa mo atunuu o le Pasefika, le susuga Leiataua Dr. Kilifoti Eteuati. I se pepa o faamatalaga mai le malo Ausetalia, na faaalia ai e le minisita o le Va i Fafo a Ausetalia, le susuga Julie Bishop, le faatauaina e Ausetalia o lea fonotaga a minisita ina ia atili vavalalata ai sootaga tau upufaiomalo, tamaoaiga, tala faasolopito, fesoasoani faapea nuu ma afioaga.

TATALAINA MALAE TAALO MO LE FANAU I SOGI

O le faaiuga o le vaiaso na sei mavae atu nei na tataaloaia ai le malae taalo fou mo le fanau i Sogi, faafesagai ma le faletalimalo o le Tanoa Tusitala Hotel. O le malae taalo muamua lea ua tatalaina e aofia ai i le galuega tele mo le faaleleia o le talafatai o le taulaga o Apia. O lea malae taalo ua faaigoaina nei o le Malaefatu Play Space ma sa fausiaina i le tau atoa e $518,277 na faatupeina e le malo Niu Sila. Na fetaui lelei le tatalaina o lea malae taalo ma le asiasi mai o le alii palemia o Niu Sila, le susuga Toasavili John Key, e maimoa i le taaloga faitaulia a le Olopeleki ma le Manu Samoa i le vaiaso na tea nei ma sa auai o ia i lea faamoemoe. O lea malae taalo ua fausiaina ma le faamoemoe ina ia taaalo ai le fanau iti faapea le tupulaga talavou, faapea foi ona tafafao ai aiga. O lea malae taalo e aofia ai mea faasee mo le fanau iti, ma isi mea taalo e fiafia i ai tamaiti, faapea malae basketball mo tupulaga talavou e taaaloai.