MAUA E LEOLEO VAILAAU E GAOSI AI FUALAAU FAASAINA

Ua taofia faamalosi e leoleo se pusa teu oloa tele po o se container e 40 futu le tele, o lo o latou masalomia o lo o auina faanana mai ai vailaau e moomia i le gaosia o fualaau faasaina. Na maua ai e leoleo i totonu o lea container ia fana e faaaoga e militeri, o mea tuupulu ma naifi e faaaoga e vaegaau a militeri. Na faamaonia e le komesina o leoleo, le susuga Egon Lincoln Keil, lea tulaga ma na ia faaalia, sa logoina lo latou ofisa e se tagata i mea o lo o i totonu o lenei container. O le taimi nei e toatasi le tagata o lo o taofia e leoleo a o faagasolo suesuega i lenei mataupu. Ua auina atu nei ia vailaau na maua ai lea e masalomia e faaaogaina i le gaosia o fualaau faasaina, i le ofisa o suesuega faasaienisi le SROS, mo le suesueina pe faamaonia. Na saunoa Keil, o le tulaga o lo o popole i ai o le ono faaaogaina lea o Samoa ma nofoaga e gaosi ai fualaau faasaina e pei o le aisa, ona auina faanana atu ai lea i maketi i fafo atu o Samoa. Fai mai a ia, o lo o latou galulue malosi e tineia le faatupulaia pea o lea fualaau faasaina i totonu o le atunuu.

TOATOLU UA MOLIA I LE OSOFAIGA A LEOLEO

Na molia ma pueina e leoleo ni alii se toalua ma se tamaitai i se latou osofaiga o le faletalimalo o le Hidden Garden Accomodation i Faatoia i le lua vaiaso talu ai, ma o lo o masalomia i latou i lo latou umiaina o fualaau faasaina. O le vaiaso nei na tulai ai i latou ia i luma o Faamasino Sili Patu Tiavaasue Falefatu Sapolu, ae ona o le le auai o le latou loia, le susuga Iuni Sapolu, ua toe tolo ai lea mataupu i le aso 13 o Iulai, 2015. O ia alii o Eti Sapolu ma Aleki Mulitalo o lo o i lalo o le vaavaaiga a leoleo, ae ua tatala i tua i le tupe totogi ia le tamaitai o Ana Simi, e faatali ai le taimi e toe tulai ai i le Faamasinoga. Na faaulu ai lava i lea aso le talosaga a le alii o Eti Sapolu ina ia tatala o ia i tua e faatali ai lo latou faamasinoga, ona na o ia o lo o faigaluega ma o ia foi o lo o tausia lona aiga. Fai mai a ia, talu ona taofia o ia e leoleo, e le o ola moli o le latou fale ona ua uma le cash power. Sa faapea ona faatonuina o ia e le afioga i le Faamasino Sili ina ia faaulu lana talosaga i le Faamasinoga e ala i lana loia. E lei faailoaina e i latou ua molia pe ioe pe tetee i o latou moliaga.

SAUNI LE MANU SAMOA MO LE OLOPELEKI

O le aso Lua o le vaiaso nei na faalauiloa aloaia ai le lisi o tama taaalo e to’a 27 a le Manu Samoa o le a faafetauia le Olopeleki a Niu Sila i le aso Lulu o le vaiaso a sau. O lea faamoemoe sa faataunuuina i le faletalimalo o le Orator Hotel i Tanuamalala, i se taumafataga na talimalo ai le Iuni Lakapi a Samoa. I lana saunoaga, na faamalosiau ai le alii palemia, le susuga Tuilaepa Sailele Malielegaoi, i tama taaalo ua filifilia ina ia taalo malosi, taalo ma le poto e manumalo ai. “Ua i o tatou lima se fuafuaga o le a faamauina i le tala faasolopito o le tatou atunuu,” o a Tuilaepa lea. “O le a matou tu’i le mulipapaga i lo outou alofaiva. Ia pogisa o outou tino ae malamalama o outou mata, ma ia tafe toto o outou ala.” O le lisi o le au e to’a 27 a le Manu Samoa: Wayne Ole Avei, Maatulimanu Leiataua, Viliamu Afatia, Census Johnson, Anthony Perenise, Sakaria Taulafo, Kane Thompson, Teofilo Paulo, Iosefa Tekori, Faatiga Lemalu, Alafoti Faosiliva, Jack Lam, Ofisa Trevarinus (Kapeteni) Maurie Faasavalu, TJ Ioane, Khan Fotualii, Peleifofoga Cowley, Tusiata Pisi, Michael Stanley, Alofa Alofa, Ken Pisi,  Alesana Tuilagi, Faialaga Afamasaga, Johnny Leota, Paul Perez, Tim Nanai Williams, Ah See Tuala.

TULAFONO ASETA E FAAAOGA I SOLIGATULAFONO

Ua mataituina e le Ofisa o le Loia Sili le faamalosia o le tulafono na pasia i le tausaga e 2007 lea e mafai ai e le malo ona aveesea mai se aseta e maua ma fa’amaonia o lo o faaaogaina faasolitulafono. Na faamalamalama mai e le loia sili, le afioga Tuatagaloa Aumua Ming Leung Wai e faapea, afai e maua ma fa’amaonia mo se faataitaiga sa faaaoga se taavale la’u pasese po o se taxi e la’u ese ai ni oloa gaoi mai se fale’oloa po o ni fualaau faasaina e pei o mariuana, e i ai le aia a le malo e mafai ona aveese ai lea aseta. Fai mai a ia, e talosaga le Ofisa o le Loia Sili i le Faamasinoga mo se faatagaga e ave ai ia aseta ma afai ae pasia mai e le Faamasinoga lea talosaga, ona ave faamalosi lea e lona ofisa lea aseta ma faatau tu’i. O le tupe e maua mai ai, e teu i se fa’aputuga tupe i le Faletupe Tutotonu o Samoa ma e faaaogaina e fa’aleleia ai le auaunaga a le Matagaluega o Leoleo. E le gata i lea, e i ai foi le aia a le malo e tapunia ai so o se atinae po o se pisinisi e maua ma fa’amaonia na faavaeina ma faagaioia i tupe e maua mai i soligatulafono.