Ads by Google Ads by Google

TALA MAI SAMOA

MOLIA I LE TULAFONO MATUA, LE AOOGA LE FANAU

 

O lo o faauau pea ona faatino galuega a le Matagaluega o Leoleo i le faamalosia o le tulafono mo le tuuina atu ole fanau i aoga. E toalima nisi o matua ua faamautu mai e le matagaluega le sala tupe e ta’i afe tala, ona o le le usitaia o lea tulafono a le malo. O i latou nei e toalima, o matua o nisi o fanau laiti o lo o vaaia pea o feoai i luga o alatetele i taimi o aoga, ma o lo o maua foi e le o aooga i latou. O le toe faamalosia ai la e le malo o lenei tulafono, ona o le faataua lava o le aoaoina lelei o le fanau laiti, o i latou o le lumanai manuia o Samoa. Ua aloaia lenei tulafono talu ona fa’avaeina mai le faigapaaga a le malo ma ana paaga fesoasosani e i ai le malo Ausetalia ma le malo Niu Sila, i le tuuina mai lea o fesoasoani tupe mo le faatupeina o pili aoga a le fanau, lea ua mafai ai ona aooga fua fanau o Samoa i aoga tulaga lua uma a le malo, mai le vasega 1-8 faapea le vasega 9-11 i kolisi maualuluga.

 

FAAALIGA OLOA O LE PASEFIKA I MELEPONE

 

Na atili faalauiloaina Samoa i isi atunuu o le lalolagi ma le Pasefika, e ala i le auai atu o le au faipisinisi i le faaaliga o oloa a le itulagi o le Pasefika, ua taua o le South Pacific Tourism Exchange i Ausetalia i le masina nei. E le gata i lea, ae o se avanoa taua tele foi lea ua mafai ai e le vaega o le au faipisinisi mai Samoa nei, ona maua le avanoa e feiloai atu ai i isi au faipisinisi mo itu tau turisi o le a auai i lenei polokalame. I se pepa o faamtalaga na taua ai e faapea, e ui ina ua amata le tau malulu i le aai o Melepone, ae lei mafai ai e le vaega o atinae o pisinisi tau turisi mai Samoa nei, ona nofoai mai le faalauiloaina atu o nofoaga lelei mo tafaoga po o destination, aemaise o nisi o a latou faapitoa po o holiday packages ma isi lava a latou faapitoa, ao sila maimoa le tusa ma le 15 o nisi o atunuu o sui auai o lenei polokalame, faatasi ma le toatele o nisi na maimoaina. Sa fai ma sui o Samoa i lea faaaliga tele le Pulega o Tagata Tafafao Maimoa Mai i Samoa, le Sosaiete o Faletalimalo i Samoa, le faletalimalo o le Insel Fehmarn, faletalimalo o le Toe Fo’i i le Parataiso, Aga Reef Resort ma le ofisa malaga o le Samoa Scenic Tours.

 

VAELUAINA LE FAALAPOTOPOTOGA O LE AU FAIFAATOAGA

 

Ua tulai ese mai le Faalapotopotga o le Au Faifaatoaga a Samoa, le Samoa Farmers Inc. (SFI), ia se vaega o au faifaatoaga ona o le le fiafia i le faatautaiga o le faalapotopotoga e le komiti faafoe o lo o seei nei. O le faaiuga o le vaiaso na tea nei na usuia ai le fonotaga a lea faalapotopotoga, ma na tulai ese ia sui ma ua faalauiloa mai le latou fuafuaga e faatuina se latou faalapotopotoga ua faaigoaina o le Samoa Farmers Federation (SFF). O nisi o i latou ua tulai ese e aofia ai le alii sa avea ma faipule, le afioga Loau Keneti Sio, Papalii Panoa Moala, Seumanutafa Dr. Malcom Hazelman, Saena Penaia Tialino ma isi. O lo o le fiafia ia sui i le komiti faafoe a le SFI i lalo o le taitaiga a le alii peresetene, le afioga Afamasaga Faamatala Toleafoa, ona ua atoa le fa tausaga e lei faia se fonotaga faaletausaga a le faalapotopotoga ma e leai foi se tala o le tupe. I le fonotaga i le faaiuga o le vaiaso na te’a nei, na faia ai le faigapalota ma toe filifilia ai le komiti faafoe sa i ai, ma sa tulai ese le sui sooupu o le vaega ua faavaeina nei le latou faalapotopotoga fou, le susuga Saena Penaia Tialino.

 

SUESUEINA LE PULENUU O AFEGA

 

O lo o fa’aauau pea suesuega a le Matagaluega o Leoleo i le mataupu lea o lo o masalomia ai le pulenu’u o le afioaga o Afega i ni soligatulafono na tulai mai i le vaitaimi o le faigapalota laititi a le itumalo o Sagaga-Le-Usoga ia Aperila o le tausaga nei. E le o manino po o a tonu nei tuuaiga ae na saunoa le sui sooupu o le matagaluega, le susuga Su’a Muliaga Tiumalu, o lo o i ai nisi o fa’amaumauga o lo o latou moomia mai le Ofisa o Faigapalota e fa’aauau ai a latou suesuega. O le maea ai o le faigapalota laititi na fa’ailoa mai ai e le Sui Komesina o le Ofisa o Faigapalota le ono molia ai o le pulenuu o Afega, le tofa Fata Saifoloi, ona o nisi o pepa na ia sainia. Na saunoa Su’a, o lo o faaauau a latou suesuega ae o lo o moomia ia pepa na sainia e le alii pulenuu e aloaia ai se tasi o sui tauva mai Afega, le tofa Fata Paulo Talalelei, mo lea faigapalota laititi. Peitai na toe tuuina atu le tusi mai alii ma faipule o Afega lava ma maua ai, o lo o teena ma fesiligia e alii ma faipule le agavaa o lea sui e tauva, ma o le alii pulenuu ia Fata Saifoloi lea foi o lo o saini ai I lea tusi ma alii faipule o lo latou afioaga.

 

FAAMALOSI E LE TAMA 65 TEINEITITI 16 TAUSAGA

 

E tolu tausaga ua nofosala ai nei i le falepuipui se tama e 65 tausaga ua faaipoipo, ona o lona faiaiga faamalosi i se teineititi e 16 tausaga. Ua taofia e le Faamasinoga le fa’ailoaina o le igoa o lea alii ina ia puipuia ai le teineititi na aafia, ae ua ioe o ia i moliaga e lua o le faiaiga ma se tasi o sui o lona aiga e faalagolago ia te ia. O lea soligatulafono na tulai mai i le va o Aperila ma Iulai, 2014 ina ua momoli ane e le tina o lea teineititi o ia ma tuu ai e nofo aoga ma tausi ai e le ua molia, o se tasi o lona aiga. Ae lei lauina lona faasalaga, na saunoa Faamasino Lesatele Rapi Vaai, e 48 tausaga e va ai le matua o le ua molia ma le teineititi na aafia, ma sa faatuatuaina o ia e le tina o le na aafia na te tausi i lana tama. Peitai, ua nutimomoia lea faatuatuaga ona o tuinanauga o le tino o lea alii.