FILI LE MANU SAMOA MO LE OLOPELEKI

O lo o faaopopo pea ia suafa o tamafanau iloga a le atunuu i le taaloga o le lakapi i le lisi o tama taaalo o le a fili mai ai le au a le Manu Samoa o le a faatalia le taunuu mai o le Olopeleki a Niu Sila i le masina fou. O le susuga Paul Perez ma Motu Matu’u o nisi o sui aupito i lata mai ua filifilia e le alii faiaoga, le susuga Stephen Betham, i lana lisi e to’a 45 tama taaalo o le a fili mai ai le Manu Samoa mo lea taaloga faitaulia taua i le tala faasolopito o le taaloga i Samoa. Na faaalia e Betham, o le lisi o tama taaalo ua ia taulimaina, o tama taaalo aupito i lelei lea ua avanoa mo le taaloga i le masina fou. Fai mai a ia, e le o se galuega faigofie le tau tuufaatasia o nei tama taaalo ona o a latou konekarate o lo o i ai ma kalapu o lo o taaalo ai. Na faaalia e le alii faiaoga, e i ai nisi o tama taaalo ua faailoa mai lo latou le avanoa mo lea taaloga ona o nisi o mafuaaga e patino lava ia i latou, ma latou te faaaloalogia foi le faaiuga a ia alo o le atunuu. O lisi la lenei o tama taaalo o le a fili mai ai le Manu Samoa. Laina i Luma: Aniseko Sio, Anthony Perenise, Jake Grey, James Johnston, Sakaria Taulafo, Viliamu Afatia, Andrew Williams, Ma’atulimanu Leiatau, Wayne Ole Avei, Motu Matu’u, Teofilo Paulo, Maselino Paulino, Kane Thompson, Iosefa Tekori, Fa’atiga Lemalu, Alafoti Faosiliva, Faifili Levave, Francis Ieremia, Jack Lam, Maurie Faasavalu, Ofisa Treviranus, Oneone Faafou, Taiasina Tuifua, Tala James Ioane ma Vavae Tuilagi. Laina i Tua: Kahn Fotuali’i, Peleifofoga Cowley, Vavao Afemai, Michael Stanley, Patrick Fa’apale, Tusiata Pisi, Faialaga Afamasaga, Faleniu Iosi, George Pisi, Johnny Leota, Reynold Lee Lo, Ah See Tuala, Alesana Tuilagi, Alofa Alofa, David Lemi, Ken Pisi, Paul Perez, Sinoti Sinoti, Faatoina Autagavaia, ma Tim Nanai Williams.

TOE TAUVA LEVAOPOLO I LE FAIGA PALOTA

E le o fia faailoa faalauaitele e le alii faipule o le vaega faaupufai o le Tautua Samoa, le tofa Levaopolo Talatonu Va’ai, lona lumanai faasui o le Palemene. Ma e ui i famatalaga agiga e faapea, e ono sui le itumalo e tauva ai o ia i le faiga palota o lo o loma nei, na saunoa le afioga i le faipule i le au tusitala e faapea, e lei faia sana faaiuga I lea tulaga ma faatoa ia faailoa faalauaitele lea tulaga i le faaiuga o le tausaga. Peitai, na ia faamaonia lona toe tauva ai i le faiga filifiliga a le atunuu i le tausaga fou. O le tofa Levaopolo e mai afioaga o Saleaula, Salamumu ma Fogasavaii ma ua atoa nei le 10 tausaga o avea ma sui faipule o le Palemene. O le tausaga e 2006 na muamua seei ai o ia i le tofi faipule o le itumalo Gagaemauga Numera 2. Na saunoa Levao, ua tele lona malamalamaaga ua maua i le 10 tausaga ua tuanai i upufaiomalo faapea le faafoeina o le malo. Fai mai a ia, e ui e toatele tagata e le fiafia ma faitio malosi i le itu agai, ae talitonu o ia, e tele le aoga o le latou vaega i le faasa’osa’oina o le faafoeina o le malo.

TUUMALO LE PERESETENE O LE S.U.N.G.O.

Ua faamanava e le Atua galuega a se tasi o tamaitai, ua tele tausaga o tulai mai i tofiga faataitai i totonu o le atunuu, le afioga Tafuamaseafa Alalatoa Breda Tipi-Faitua, lea sa peresetene o le Faamalu o Faalapotopotga Tumaoti a Samoa, le SUNGO. O le faaiuga o le vaiaso na faamaonia mai ai le tuumalo o le afioga Tafuamaseafa ona o se gasegase i lona ua. E tuumalo lenei tamaitai ua 53 tausaga o lona soifua ma o ia foi sa faatautaia i le tele o tausaga le nofoaga tutotonu mo tupulaga talavou mai Amerika na aumai i Samoa nei aua le toe fuataina o o latou soifua, lea na faaigoaina o le Better Way. O le afioga Tafuamaseafa , o le faletua o le sui faipule o le itumalo Vaisigano Numera  #1, le afioga Tufuga Gafoaleata Faitua.

GALULUE FAATASI PISIKOA MA LE SPREP

O le vaiaso na sei mavae atu nei na sainia ai e le Faatonu o Pisikoa a le malo Amerika, le tamaitai o Carrie Hessler-Radelet, ia se maliega o le malamalamaaga (MOU) ma le Faalapotopotoga o le Puipuia o le Siosiomaga o le Pasefika, le SPREP i Vailima. O le Faatonu Aoao o le SPREP, le susuga David Sheppard, sa la saini aao i lea feagaiga faavaomalo lea o le a atili malosi ai le tali atu a le itulagi o le Pasefika i faafitauli e mafua mai i le fesuisuiai o le tau, e ala i le auai o sui o Pisikoa i totonu o le SPREP. O atumotu o le Pasefika o nisi ia o motu aupito i aafia i faafitauli eseese e mafua mai i le fesuisuiai o le tau, lea e aofia ai le aafia o alamanuia o ia motu ona o le siisii pea i luga o le sami, o le tetele o timuga faapea afa. I lalo o lea feagaiga, ua i ai nei sui o Pisikoa i totonu o ofisa o le SPREP e fesoasoani i le faatonutonuina o galuega e fesoasoani ai i tagata o le pasefika e foia ia faafitauli. E ta’i 6 i le 12 masina o le a galulue ai sui o Pisikoa i le SPREP i lalo o lea maliega.