Ads by Google Ads by Google

TALA MAI SAMOA

TOE FAAMALOLO FOI LE ISI TAITAI LEOLEO

 

O le aso Faraile o le vaiaso na sei mavae atu nei na faamalolo ai mo se vaitaimi le tumau se isi foi leoleo sinia ina ua faaulu le tagi a se aiga faasaga ia te ia. Na faamaonia e le sui sooupu o le Matagaluega o Leoleo, le susuga Su’a Muliaga Tiumalu, lea tulaga ae na ia faaalia, na te le o iloa le mafuaaga ua faamalolo ai lea alii leoleo sinia (Superintendent). O lea taitai leoleo sa faauluulu i ai le vaega suesue a leoleo i le Faamasinoga. O le lona ono ai lenei o leoleo sinia ua faamalolo le tumau talu ona tofia le alii komesina fou o le matagaluega, le susuga Egon Keil. Na teena uma e leoleo sinia e toalima na faamalolo le tumau i le masina na tea nei o latou moliaga i le Faamasinoga.

 

AMIA E LE ATUA LE TINA O PEATI IUPELI

 

Na amia e le Atua i le vaiaso na tea nei le tina o Peati Iupeli i le maota gasegase o Tupua Tamasese Meaole, i le maea ai o se vaitaimi umi o maua o ia i le faama’i oti o le HIV/Aids. E pei ona silafia, o Peati o le faletua o le alii o Malaki Iupeli, o se tasi o sui o le Manu Samoa i tausaga ua tuanai lea foi na maliu i lea faama’i. Na pesia o ia i lea faama’i i lona toalua ma e toatasi lo la alo na maliu ai foi. O le tina o Peati sa galue muamua i se tasi o faletupe i le taulaga ma sa ia faalauiloaina le maua o ia i lea faama’i i le 1998 ma amata ai ona avea o ia ma amepasa a le Matagaluega o le Soifua Maloloina i taumafaiga e aoaoina le atunuu i auala e tetee atu a i lea faama’i. Ae le gata i lea, o taumafaiga a le matagaluega ina ia taofia faiga faailoga tagata sa mafatia ai tagata ua maua i lea faama’i. E tele faasalalauga i luga o TV, leitio ma nusipepa sa faaaoga ai e le Matagaluega le tina ia Peati na te momoliina lea feau. O lo o soifua pea lona alo tama matua o Natal Iupeli, lea na faaigoa i le nofoaga sa faia ai se tasi o taaloga a le Manu Samoa ao taalo ai lona tama. O le alii o Natal o se tasi o alii iloga foi i le taaloga o le lakapi e pei lava foi o si ona tama.

 

TOE SOLA TOLOTOLO O TAMA ULI MA LE MUA

 

Ua toe sola foi le sa o le Tolotolo o Tama Uli ma le tulaga muamua o faagatama o le tai o le Tutoatasi o lenei tausaga e pei ona molimauina e le toatele i le aso Toonai na tea nei. Na tau fai feeli apefoe a le Tolotolo ma le sa o le Segavao Don Bosco ina ua pa le fana i le amataga o le tuuga i gataifale o Faleula, ma sa manaia lava miliga a sa e lua. Peitai o gataifale o Vaiusu na iloa ai le malolosi atu o le auvaa a le Tolotolo ina ua amata sesee i luma ma iu ai lava ina motu mamao ai i luma i le pe a ma le fautasi ma le afa seia oo lava i le tini. Na motu ese lava isi fautasi e toatolu i le pito i tua ma sa vevela foi a latou miliga seia oo lava i le tini. Na tulaga tolu le sa o le Telefoni o le Vainuu mai Manono, tulaga fa le Little Rina mai Apia ae tulaga lima le Aviivii mai Toamua.

 

AMATA GALUEGA MO LE FALE E TEU AI VAILAAU

 

E $12.9 miliona tala le tau atoa o le fale teu oloa faapitoa mo vailaau tau le soifua maloloina ua amata fausia i Motootua. O le vaiaso nei na asuina ai le palapala e faailoga ai le amata aloaia o galuega mo lenei poloketi a le malo o lo o i tua o ofisa a le Matagaluega o Tautua tau le Soifua Maloloina. I lana saunoaga autu, na faafetaia ai e le alii palemia, le susuga Tuilaepa Sailele Malielegaoi, le fesoasoani a malo Niu Sila ma Ausetalia lea o lo o la faatupeina lea galuega tele e tauala i se fesoasoani a le Faletupe o le Lalolagi. Na saunoa Tuilaepa, o le fausia o lenei fale teu oloa, o le faaauauina lea o polokalama a le malo e faaleleia atili ai tautua tau le soifua maloloina ma na ia faaalia foi le faamuamua ua ave e le faigamalo i le soifua maloloina o le atunuu lautele e pei ona faaalia i le Tala Faatatau o le Tupe 2015/2016. Fai mai a ia, o le fausia o lenei fale teu oloa faapitoa o le a faamautinoa ai le lelei atoatoa o vailaau ma fualaau tau le soifua maloloina e auina mai fafo, aua o le a ola le ea malulu ua faatulagaina faapitoa i le malulu e tatau ona i ai e saogalemu ai vailaau ma fualaau. Na saunoa foi le tamaitai Komesina Sili o Ausetalia i Samoa, le susuga Sue Langford, ma ia tautino le lagolago a lona malo mo le faaleleia o le tautua tau le soifua maloloina aua le manuia o tagata o Samoa.