MALIE LE AIGA SA MALIETOA E TOLOPO I LE KERISIMASI LE LATOU FAIGA FILIFILIGA

O le aso Kerisimasi, aso 25 o Tesema o le tausaga nei ua autasi I ai le paia i ituaiga e tolu o le suafa Malietoa, e toe feiloai ai.Na faaalia, ua malilie ituaiga e tolu o Malietoa Natuitasina, Malietoa Talavou ma Malietoa Moli, mo se feiloaiga e ono maua ai se tasi mo se leleiga aua se e tulai mai e tauavea le suafa Malietoa.

Ua maea ona fili le afa i Poutoa gataiala I le aso 30 o Iuni, o le a faato’a maea ona olo tupe i Poutoa ma Gautaala I le aso 25 o Aukuso, a’o lea o le a fola fala i Pouesi, I le aso tonu o le a afio mai ai le pepe, sa ia taulamua ai I le faaleleiga ma le faafealofaniga o le lalolagi. O lenei feiloaiga o le a oo atu I ai ua maea ona filifili ituaiga e tolu i so latou sui ma o le a fili mai ai loa se tasi e pale I le suafa  Malietoa, lea o lo o avanoa pea talu ona tuumalo le afioga I le Malietoa Tanumafili II.

O le auga atoa lenei o le tolopoina o le feiloaiga e pei ona faailoa mai e le afioga ia Papalii Siliva Taouma, o le taitaifono o le komiti o le ituaiga o Malietoa Talavou ,e aofia ai Papalii Fitisemanu, Sala Pesamino Niupulusu, Taueva Lelevaga Fouina Mupo, Apoua Papalii ma Savali Toomalatai. Na faailoa e Papalii, o lona faanaunautaiga atoa ai ma le auaiga atoa, ia aua nei toe oo I le faamasinoga la latou mataupu, ma ia avea le suafa Malietoa ma faataitaiga e ala lea I le soalaupuleina o le latou lava mataupu I le lotoifale. Ua autasi uma ituaiga e tolu e tuu atu I le aso Kerisimasi e feiloai ai i Pouesi i Sapapalii, e tapenapena mamao atu I ai ituaiga uma e tolu, aemaise i latou o lo o malaga mamao mai i atunuu i fafo.

SUE E LEOLEO ALII VAIUSU SA TAUAI MAA

E fitu taavale leoleo sa oo atu I le afioaga o Vaiusu-uta I le taeao o le aso Sa na sei mavae atu nei, ma e silia ma le toa 20 alii leoleo sa o atu ai e sue I latou mai Vaiusu sa tauaia fale o aiga I Vaigaga I maa I le po o le aso Tofi, lea na faaleagaina ai fale ma mea totino.

O lea tulaga na mafua mai I se feeseeseaiga I le va o tupulaga talavou mai Vaiusu ma Vaigaga I le aso Lulu, ma o le po o le aso Tofi sa faateteleina ai ina ua tauai e alii mai Vaiusu ia fale o aiga I Vaigaga. Sa faaalia e I latou sa aafia I ia tauaiga maa e faapea, o se taimi aupito I taufaafefe lea I o latou olaga ma sa latou matatau uma ina nei aafia o latou soifua. O le alii o Roy Fereti mai Vaigaga o se tasi sa faamanualia I lea feeseeseaiga, ma e 12 filo na sui ai ni manua I lona ao na lavea ina ua tauai o ia e ni alii mai Vaiusu I le po o le aso Tofi. Fai mai a ia, faapea lava ia o lona po mulimuli lena I lenei lalolagi.

Na faamatala e Roy, o ia sa eva i le fale a le isi ana uo, ae ia maua le tala e faapea ua tauai fale o lona aiga e nisi mai Vaiusu. Sa faapea loa ona ia faataalise atu I lo latou fale ona o lona popole I si ona tina e 82 tausaga o lo o I ai. Fai mai a ia, e oo atu o ia ua sosola ese lona aiga, ae pe a ma le toa 50 alii mai Vaiusu o lo o faaleagaina so o se mea e tau I ai I totonu o le fale. Na saunoa Roy, sa ia tei lava ina ua tau se ala I lona ulu ma faapea ona ia pa’u ai loa I lalo ma sa pei e ai lona tino e pi I le tele o maa sa tauai ai o ia e nisi mai Vaiusu sa lalafi solo.

Na uma faafuasei le tauaiga o ia ina ua taufetuli mai nisi o le aiga latou te tuaoi e laveai o ia, ao le taimi lena ua matua tiga uma lona tino, ma e lua foa I lona ulu. E tele isi aiga I Vaigaga na faaleagaina o latou fale ma mea totino, e aofia ai le taavale a le faifeau EFKS sa paka I le fale o se tasi o le aulotu. Na lipotia mai e faapea, ua aveese le laau pese o le taavale toe taei uma faamalama. Na faaalia e se tasi o matai o Vaiusu, o Ulugia Poe e faapea, ua uma ona faalelei lea feeseeseaiga I se fono sa auai alii ma faipule o Vaigaga, ma sa amia foi alii talavou sa tauai maa. Na saunoa Ulugia, ua uma ona faatoese ia alii I matai Vaigaga ma o le vaiaso fou o lo o faamoemoe e toe faia ai se isi fonotaga I Vaigaga mo le faaleleia lava o lenei feeseeseaiga.

Na faaalia e le sooupu o le ofisa o leoleo, le susuga I le komesina lagolago ia Leaupepe Fatu Pula e faapea, o le a faaauau pea a latou suesuega seiloga e maua uma I latou sa auai I ia tauaiga maa ma e faasalaina uma I latou I le faamasinoga. Fai mai a ia, e pe a ma le toa 20 alii mai Vaiusu I le va o le 10 I le 20 ma ona tupu tausaga sa pueina e leoleo I le taeao o le aso Sa ma o lo o taofia uma nei I latou ao faagasolo a latou suesuega I lea mataupu.

TATALA TUSI TALOSAGA MO LE FAAAOGAINA O LE MAOTA FOU O LE NPF I APIA

Ua tatalaina nei tusi talosaga mo le faaogaina o le maota fou o le NPF lea ua lamalama faaiu galuega I le fasusiaina I le talafatai o le taulaga o Apia. Faailoa mai e le tamaitai pule, le susuga ia Petra Chan Tung, o le taimi nei lava ia, o lo o sologa lelei galuega ma o lo o i totonu foi o taimi faatulagina e tatau ona maea ai, ma amata ai loa ona faaaoga lenei maota fou.

O le tausaga na tea nei, lea sa amata amai ai galuega mo le faaleleia o lea poloketi, e I ai ni fogafale maualuluga se lua mo le mamalu o le aufaipisinisi aua le faatauina atu o a latou oloa, faapea le isi fale ua fausia faapitoa lava mo pakaga o taavale. E faitau miliona tala le tinoitupe lea o lo o faatinoina ai lenei galuega ma na faailoa e Petra, e le o mautinoa I le taimi nei se aso o le mafai ai ona tatala aloaia lenei galuega.

Ae mo le taimi nei lava ia, ua taulimaina e le ofisa le tusi talosaga mai le au faipisinisi e fia faaogaina ni vaega o le maota mo le faatauina o a latou oloa. O le a iloa la  i se aso e le o toe mamao le aso tonu e tatalaina ai lenei galuega tele, pe a maea lenei masina.

FESOASOANI AUSETALIA I LE MATAGALUEGA O LEOLEO A SAMOA

Ua atili siitia le tomai ma le silafia o malu o le malo I le faatinoga o galuega suesue, I le maea ai o se aoga faapitoa na tuufaatasia e le matagaluega o leoleo ma falepuipui ma le vaega a leoleo o le malo a Ausetalia.

Ua faaalia le agaga fiafia tele o le afioga i le komesina o leoleo, le afioga ia Lilomaiava Suemalo Taioalo, I le faauuina ai o malu o le malo e toa 15 I ni tusi pasi, I le vaega 4 o le mataupu tau suesuega ma le toe aoaoina ane o galuega faaleoleo. O le afioga I le  komesina maualuga o Ausetalia i Samoa, le susuga ia Dr. Steven Henningham, na tauaaoina tusi pasi mo malu o le malo ua faamanuiaina ma ia faamautu atili ai le agai pea i luma o le faiga faapaaga a malo e lua, o Samoa ma Ausetalia, ma o le a fesoasoani mai pea le malo o Ausetalia i galuega faatino a le matagaluega a leoleo ma falepuipui a Samoa.

O le isi itu sili i tusi pasi ua tauaaoina, o lo o amanaiaina i isi atunuu faavaomalo aua o le maualuga lava o aoaoaga i Ausetalia, o lo o I ai le fatinoga o ia aoaoga, O i latou na faauuina ai, na faatinoina a latou aoaoga mo le masina atoa. Na tauaaaoina ane foi e le afioga i le komesina maualuga o Ausetalia I le komesina o leoleo ,ni masini komipiuta laptops faapitoa mo le vaega o aoaoga a le matagaluega aua le uunaia malosi ai pea o lea vaega taua e le gata I le aoaoina o i latou faatoa ulufale atu I le matagaluega ae faapea foi mataupu faaauau mo le matagaluega atoa.

Saunia: LAF/Naenae Productions