TEENA LAMATIA LAUTELE I LE MU TANE SUAUU

O lo o teena malosi e le kamupani o lo o aumaia le suauu ma le penisini mai fafo i le atunuu, le Petroleum Products Supplies Ltd (PPS), ia manatu faaalia o nisi e faapea na semanu e pa salalau le tane na mu i le uafu i Matautu, ma faaleagaina ai se vaega tele o faleoloa ma ofisa a le malo o lo o faasaga i gataifale o Apia, ma lamatia ai le tele o soifua . Na faaalia e le pule faatonu o le kamupani o le PPS, le susuga Fanene Samau Sefo, i se feiloaiga ma le au tusitala i le aso na sosoo ai ma le faalavelave e faapea, e leai se mea faapea na ono tulai mai. Na saunoa Fanene, na fausia faapitoa lava ia tane ina ia aua nei faaleagaina i se mu e tulai mai ma e siomia le tino o le tane o lo o i totonu, i le sima. Fai mai a ia, ana i ai se liki o le kiso sa i totonu o le tane, e mimiti uma e le sima o lo o siomia ai le tane. Na saunoa foi le alii pule o le PPS i popolega sa faaalia e nisi i le ono sosolo o le mu i le paipa o lo o auina atu ai le kiso i tane a le kamupani i Sogi i Mulinuu ma na ia faaalia, o ia paipa e ono futu i lalo o le alititai, ma sa poloka lea paipa ina ua tulai mai le faalavelave. Na faaalia foi lona agaga faanoanoa ona o le maliu ai o se tasi o le latou aufaigaluega i lea faalavelave ma sa ia faamaise i le aiga o le ua maliu. Ae na ia faamamafa, o galuega sa faatinoina e le latou aufaigaluega, o galuega e masani lava ona faatinoina ma o lo o faatagaina lava foi i lalo o le tulafono.

AMATAGA GALUEGA UAEA O FESOOTAIGA

O le vaiaso nei na sainia ai le maliega aloaia i le va o kamupani o lo o fesoasoani i le faatupeina o le uaea o fesootaiga o lo o toso mai i lalo o le alititai (Samoa Submarine Cable Company), ma le malo i lalo o le polokalama mo le ausia o fesootaiga televavave faaneionapo mo Samoa. Na viia e le alii palemia, le susuga Tuilaepa Sailele Malielegaoi, lea polokalama ma sa ia faaalia, o se faamoemoe na faafailele e Samoa, e umia e Samoa, ina ia faamanuaiaina ai ona tagata. “O le uaea fou o fesootaiga a le atunuu o le ki lea e mafai ai ona faamautu atu faamanuiaga e tele i le itu tau aoga, soifua maloloina, pisinisi ma le atinae o tagata tafafao maimoa mai fafo, mo le tele o tausaga o lumanai,” o a Tuilaepa lea. “E le gata i faamanuiaga tau tamaoaiga, ae o le a faapea foi ona faaleleia ai le soifuaga lautele o tagata o le atunuu i fesootaiga televavave toe taugofie i luga o upega tafailagi, e fesootai atu ai i aiga ma uo i so o se atunuu o le lalolagi.” O le tau atoa o lenei poloketi e $49 miliona tala Amerika ma o se faiga faapaaga a le malo ma kamupani tumaogti o lo o faatupeina e le Faletupe o le Lalolagi, Faletupe o le Atinae o Asia, Matagaluega o le Va I Fafo ma Fefaatauaiga a Ausetalia, ma le kamupani ua faatoa faavaeina, le Samoa Submarine Cable Company. O lea kamupani ua tuufaatasia ai kamupani tau fesootaiga i le atunuu e pei o le Bluesky, Digicel ma le CSL, ma faalapotopotoga tumaoti a le malo e pei o le NPF, UTOS ma le SLAC. O lea uaea o fesootaiga o le a fesootai ai Samoa i le isi uaea o fesootaiga i Fiti i le mamao e 1,300 kilomita, ma o lo o faamoemoe e maea tosoina i le ogatotonu o le 2017.

MOLIA I LE TULAFONO FAIPULE FOU

Ua molia i le moliaga o le ave taavale faatamala ua mafua ai ona oo le manua i se tagata, ia le alii faipule fou o le itumalo Falealili I Sisifo, le afioga Aumua Isaia Lameko. O lea moliaga e mafua mai i se faalavelave na tulai mai i le masina o Ianuari o le tausaga nei i Malaemalu, Falealili, lea na lavea ma manua ai se teineititi e valu tausaga i le taavale na uliina e le alii faipule. Ua tolopoina e le Faamasinoga Faaitumalo lea mataupu i le aso Lua o le vaiaso a sau ona o le talosaga a le itu a leoleo ina ia tuu atu se vaiaso se tasi e toe tagai lelei ai i moliaga faasaga i le alii faipule. O le a faailoa ai foi i lea aso le tali a le alii faipule pe ioe pe tetee i lona moliaga. O le afioga Aumua o le alo o le afioga Tuiloma Pule Lameko, lea ua avea nei ma sui o le Fono a Sui Tofia.