Ads by Google Ads by Google

TALA MAI SAMOA

6 TAGI O LE PALOTA, 3 TAGI O SOLITULAFONO

 

O le masina fou o le a amata iloiloina ai e le Faamasinoga ia tagi e ono ua faaulu faasaga i sui tauva na manumalo i le faiga palota lautele, faapea i si tagi e tolu faasino i tuuaiga o solitulafono e patino i le faiga palota. O tagi e ono a sui tauva ua le faamanuiaina faasaga i sui tauva na manumalo e aofia ai le tagi a le alii sa faipule o Lafaitele Patrick Leiataualesa faasaga i le sui tauva tamaitai na manumalo, o Aliimalemanu Alofa Tuuau. O Ale Vena Ale lea sa tauva mo le tofi o le itumalo Faleata i Sisifo o lo o ia fesiligia le agavaa o nisi o le au palota, ma o lana tagi e faasaga ia Lealailepule Rimoni Aiafi ma le Komesina o Faiga Palota. O le tagi a le alii sa tulai mai i le tofi o le itumalo Aana Alofi Numera 1 i Sisifo, o Aiono Tile Gafa, e faasaga i le fofoga fetalai o le Maota, le afioga Leaupepe Toleafoa Faafisi ma le Komesina o Faiga Palota. O le afioga Palusalue Faapo II le sa avea ma taitai o le Itu Agai ua faaulu lana tagi faasaga i le sui tauva na manumalo i lo latou itumalo o Safata i Sisifo, le afioga Leaana Ronnie Posini ma le alii sa avea ma sui o le Kapeneta, le afioga Manualesagalala Enokati Posala. O le afioga Maualaivao Pat Ah Him lea sa tulai mai i le tofi o le itumalo o nuu tu taulaga ua faaulu lana tagi faasaga i le sui tauva na manumalo, le afioga Faumuina Asi Pauli Wayne Fong, ma le afioga Anae Misa Pita II o lo o tagi faasaga i le sui faipule o le itumalo Falelatai ma Samatau, le afioga Taefu Lemi. O isi tagi e tolu ua faaulu faasino i tuuaiga o soligatulafono e patino i le faiga palota, e aofia ai le tagi a Tuala Iosefo Ponifasio faasaga i le minisita o Leoleo ma Falepuipui, le afioga Sala Fata Pinati, o Namulauulu Sami Leota faasaga i le tofi o le itumalo Faasaleleaga Nu. 2, le afioga Pa’u Sefo Pa’u, ma le alii sa avea ma sui o le Kapeneta, le afioga Faamoetauloa Lealaiauloto Faale Tumaalii faasaga i le sui fofoga fetalai, le afioga Nafoitoe Talaimanu Keti. E lei faailoa mai po o tonu ia solitulafono.

 

FAATE’A ALII E TOALUA MAI SALELOLOGA

 

E toalua alii ua faate’a mai le afioaga o Salelologa i le maea ai o le faalavelave lea na tulai mai i le po o le aso Tofi o le vaiaso na te’a nei lea na fasia ai ma tauai i maa se alii mai Salelavalu, toe susunu lana taavale i le uafu i Salelologa. O lea tulaga na faamaonia mai e le alii pulenuu o le pitonuu o Saloga, le tofa Tiumalu Tupu, ma na ia faaalia, o lea faaiuga na tasi i ai le fono a tamalii ma failauga o Salelologa i le fono faapitoa na taloina i le aso Toonai. Na saunoa Tiumalu, o alii e toalua ua faate’a e omai mai le pitonuu o Sakalafai. Fai mai a ia, e ui e fai lava pulega a matai i pitonuu e tolu o Salelologa, ae a tulai mai loa ni faalavelave e ta’uvalea ai le igoa o le afioaga pei o le vevesiga na tupu i le po o le aso Tofi na te’a nei, e fono le nuu atoa. “Na o le toalua lava igoa na lipotia atu i le fono a le nuu na faatinoina ia vevesiga ma na tasi ai loa finagalo o matai o le nuu e faate’a i laua ia,” o a Tiumalu lea. Na ia faamaonia foi, o le toatasi o ia alii o se pagota o lo o tuli lona faasalaga i le toese ae sa aso Sa atu i tua mo le Eseta. E pei ona lipotia i a tatou tala o le aso Lua, na laki le alii mai Salelavalu na aafia ina ua sulu i le vaa o le o le Lady Samoa II sa taula i le uafu.

 

TOE FO’I I LE MAEA O LE 9 TAUSAGA NA FAATE’A AI

 

Ua toe foi le susuga Unasa Farani Vili O’Brien ma lona aiga i Faleula ina ua maea le iva tausaga o faate’a i latou e le fono a tamalii ma failauga o le afioaga. Na faaalia e Unasa, na mafua lea tulaga ona o feeseeseaiga i le va o le fono a matai o le nuu ma lona aiga. Fai mai a ia, na tuuaia o ia i lona faaoolima i nisi o le nuu ma lona ave faamalosi o le upega a le nuu. Peitai na ia faaalia, o le upega a le afioaga o Tuanai e le o Faleula. Na tuuaina fua foi lona toalua i le faatupu vevesi i le Komiti a Tina o le afioaga, toe tuuaia lana fanau i le gaoi mai le faletua o le faifeau. Na ave e le nuu le mataupu i le Faamasinoga o Fanua ma Suafa i le 2008 ma na tuuina mai le faaiuga a le Faamasinoga, e faate’a Unasa ma lona aiga mai le nuu. O le 2013 na toe apili ai e le aiga le faaiuga a le Faamasinoga ae lei manuia. Peitai o le masina nei na toe suia ai le faaiuga a le Faamasinoga ma toe faataga ai i latou e toe foi i lo latou fanua. Na faamalamalama mai foi e le Faamasinoga, e leai se aia a le nuu i se tagata o lo o nofo i se fanua umia saoloto i totonu o le afioaga ma e le matai i lea nuu.

 

SAILIA PEA TAGATA FASIOTIA LE TINA I FALEASIU

 

O lo o siomia pea e faailoilo a leoleo (police tape) ia le fale o le tina penisione lea na maua atu ua maliu i Faleasiu, ia le tagata po o tagata na faia lea faiga le alofa. Na maua atu le tino maliu o lea tina ua leai ni lavalava ma e foliga mai sa faamalosi e se tasi, ma sa i ai ni manua tuga i lona ulu. Na faaalia e le sui sooupu o le Matagaluega o Leoleo, le susuga Su’a Muliaga Tiumalu, e leai se tagata ua masalomia i lea faalavelave ae sa auina atu nisi o tagata mai lea afioaga mo suesuega.