MU TANE SUAUU UAFI I MATAUTU, TOATASI UA MALIU

O le pe tusa o le ta o le 10 i le taeao o le aso Gafua na tulai mai ai se faalavelave i le uafu i Mataututai ina ua mu se tasi o tane tetele e tolu o lo o teuina ai le kiso ma le penisini, ma e toatasi se alii sa faigaluega ai ua faamaonia mai ua maliu ina ua pa le tane kiso na mu. O le ua maliu ma isi alii e toalua na lipotia mai sa fai se latou galuega i le tane ma o ia galuega na mafua ai le mu. Na mafai ona faasaoina mai isi alii e toalua ma sa auina atu i laua i le falemai. Na auina atu foi nisi o le aufaigaluega a le vaega o le tinei mu i le falemai ona o aafiaga mai le aasa faapea le manavaina o le asu oona o le mu. Peitai na faamanuiaina taumafaiga a le vaega o le tinei mu i le taofia lea o le mu mai le sosolo atu i isi tane e lua. O lea faalavelave na faatonuina ai aiga, aoga ma ofisa a le malo e lalata atu i le uafu ina ia tuua o latou maota ma ofisa mo le saogalemu. Sa faapea foi ona vave manava ai ofisa a le malo i isi vaega o le taulaga, ma sa tapunia ai ma le aualatele e agai atu i Matautu ao faagasolo taumafaiga a le vaega o le tinei mu e tineia le mu. Faatoa mafai lea tulaga i le pe tusa o le ta o le fa i le afiafi.

SAUNI LE MANU SAMOA 7s MO HONG KONG

O lo o tumau pea le au e toa 10 lea sa manumalo i le ipu mafolafola i le taamilosaga i Vancouver, Kanata i le masina na te’a nei, mo le vae i Hong Kong i le faaiuga o le vaiaso nei. Na faaalia e le alii faiaoga ulu, le susuga Damian McGrath, ua toeititi lava atoatoa le malosi o lana au o lo o i ai nei. Na ia faailoa mai, e ui i talosaga a le Iuni Lakapi a Samoa i kalapu lakapi o lo o taaalo ai alo o le atunuu o lo o ia manao e auai i le au e pei o Alafoti Faosiliva, Tim Nanai-Williams ma Paul Perez, ae e le o mananao a latou kalapu e faamautu mai. Peitai na saunoa McGrath, e ui i lea tulaga, o lo o tele lona faatuatuaga i le au ua i ai nei ma e tatau ona lelei se latou tulaga i le vae o lo o loma nei i Hong Kong. Ua toe avanoa nei le alii o Tila Mealoi lea sa le mafai ona taalo i le vae o le taamilosaga i Vancouver ona o le maliu o si ona tina, lea na toe foi mai ai i Samoa. O le alii o Siaosi Asofolau lea sa toe faafoi mai i Samoa ina ua maea le vae i Ueligitone ona o lona le usitaia o tulafono a le au, lea ua toe filifilia mo Hong Kong. O le au la lenei ua sauna atu mo Hong Kong. Faalemiga Selesele (kapeteni), Alefosio Tapili, Siaosi Asofolau, Savelio Ropati, Ed Fidow, Phoenix Hunapo-Nofoa, Alex Samoa, Tomasi Alosio, Tila Mealoi, Samoa Toloa, Belgium Tuatagaloa ma Alamanda Motuga.

MAILOGA TINO O SE TAMAITAI I MANUA O KERISO

O lo o talanoa pea le atunuu e le gata i Samoa ae faapea foi i atunuu i fafo, i le tulaga ofoofogia na tupu i se tamaitai talavou mai le afioaga o Siufaga, Falelatai lea na molimauina le mailoga o ona lima, vae, o lona itu ma lona ulu, i manua o lo tatou Alii Faaola e pei ona taua i le Tusi Paia, i le aso na faasatauroina ai o Ia. O lea tamaitai o le alo o le susuga i le Faafeagaiga o le Ekalesia Faapotopotoga Kerisiano i Samoa i Siufaga, Falelatai, le susuga Opapo ma le faletua. O le tamaitai o Toaipuapuaga Opapo, 23 tausaga, e fai lona toalua ma e toatasi lo la alo. Na faaalia e lea tamaitai, e faalua ona ia maua ni faaaliga ae lei oo i le Aso Maliu, ma o le sauniga o le Aso Maliu sa avea ai o ia ma Iesu i le tala sa faatinoina, na maitauina ai e le faapotopotoga le mailoga o vae ma lima o lea tamaitai i manua e pei ona iloga ai le tino o le Alii Faaola. Na molimauina foi le tafe mai o le toto i lona tino ina ua sasa e alii sa avea ma fitafita Roma faapea le taimi na tutui ai lona itu i le tao. E le gata i lea, na vaaia foi le mailoga o lona muaulu i faailoga e pei o se pale tuitui sa ia paleina.