FAALAUILOA LE MENIFESO A LE TAUTUA SAMOA

O le amataga o le vaiaso ua te’a na faalauiloa ai le menifeso a le vaega faaupufai o le Tautua Samoa faapea a latou sui tauva e to’a 26 o le tauva i le faiga palota lautele i le masina fou, i se sauniga sa faia i le maota o tupulaga talavou a le EFKS i Sogi. I lana saunoaga autu, na faaalia e le taitai o le vaega, le afioga Palusalue Faapo II, le moomia o le suia o le faigamalo. Na ia taua le aitalafu e $1.2 piliona tala a le faigamalo o le HRPP ma ona aafiaga i tagata lautele. “Talofa e i le atunuu pe afai ae toe tulai mai le HRPP i le taitaia o le malo,” o a Palusalue lea. Na ia faamalamalamaina foi ia fuafuaga alu mamao a le Tautua Samoa mo le isi lima tausaga o lumanai, ma ia talosagaina ai le atunuu ina ia palota mo se suiga ma se lumanai manuia. Na ia faapupulaina vaega e fa e faataua e le latou vaega mo le atinae o tagata ma le atunuu. O ia vaega e aofia ai avanoa tutusa ma tomai faapitoa mo tagata uma,o le pule a le tulafono ma le tuliloaina o le amiotonu, o le faasoasoa tutusa o le tamaoaiga, faasaoina o le siosiomaga i auala e gafataulimaina. I le itu tau aoaoga, o lo o faataua le faavaeina o se faaputugatupe e fesoasoani i matua i pili aoga a le fanau ma le sii o totogi o faiaoga. I le itu tau soifua maloloina, o lo o fuafua le vaega e faavaeina se polokalama tau inisiua, ae sii le totogi o penisione i le $270 e maua faalua i le masina, faapea le faavaeina o se komisi suesue e suesueina faiga le amiotonu e tutoatasi mai le malo. O lo o fuafua le Tautua e sii i le $3 le totogi amata mo tagata faigaluega. Na faamamafa e Palusalue le faamuamua o tagata lautele o le atunuu.

ASIASI MAI TAMAITAI SOKA AMERIKA LORI LINDSEY

Na asiasi mai i Samoa i le vaiaso ua te’a le tamaitai sa taalo i le au soka a tamaitai a Amerika lea sa tauva i le ipu o le lalolagi ma taaloga a le Olemipeka, o Lori Lindsey. O le malaga mai o Lori o se vaega o se polokalama mo le uunaia o taaloga i le fanau aoga na tuufaatasia e le Ofisa o le Amepasa o Amerika i Samoa. O lea sa asiasi atu ai Lindsey i aoga eseese i le talafatai o Apia ma faia ai ni ana folasaga i lona olaga taalo, faapea foi ona faataitai i le fanau le fa’atinoina o le taaloga o le soka. O le tamaitai o Lindsey e 13 tausaga o taalo soka faapolofesa ma o le tulaga aupito i maualuga sa ia ausia, o le filifilia lea o ia e taalo i le aufili a tamaitai a Amerika lea sa tauva i le tauvaga o le ipu o le lalolagi ma taaloga o le Olemipeka. E tele ni fa’ailoga taualoa na maua e lea tamaitai ao taalo ma o le taimi nei ua malolo litaea o ia ma ua faiaoga nei i au a tupulaga talavou Uosigitone DC.

MANU’A TIGAINA SE ALII AOGA FITI

E tuga manuaga o se alii aoga mai Fiti e aoga i le aoga o matata eseese o le APTC (Australian Pacific Technical College) i Vaivase-tai, ona o se vevesi na tulai mai a o tafafao lea alii ma ni ana uo i le falekalapu o le RSA. O lo o teena e leoleo ni lipoti e faapea ua uma le soifua o lea alii aoga. Na faaalia e le sui sooupu o le Matagaluega o Leoleo, le susuga Su’a Muliaga Tiumalu, e le moni ia lipoti. Fai mai a ia, o le maea ai o le tafaoga a lea alii Fiti ma ana uo i le RSA i le lua vaiaso talu ai na faaoolima ai nisi ia te ia ma e matua tuga manuaga o lea alii. O lo o taoto nei o ia i le potu mo gasegase tigaina i le falemai i Motootua a o faaauau suesuega a leoleo ia i latou sa faia lea tulaga le alofa.