MOLIMAU TAMAITAI FAASAGA I LE FAATONU O LE SAVALI

O le vaiaso ua te’a na faagasolo ai iloiloga o le faamasinoga o le alii Faatonu o le nusipepa o le Savali, le susuga Tupuola Terry Tavita, lea o lo o molia i moliaga o le faaoolima mataga, ma sa molimau ai le tamaitai na faaulu lana tagi faasaga ia Tupuola, o Maria Livisitone Kolio. O lea tamaitai sa faigaluega ai i le Savali i polokalama a le Iunivesete Aoao o Samoa ma le malo ina ia maua ai le avanoa o le fanau aoga e mataitu ai le faatinoina o galuega i matagaluega eseese a le malo. Na molimau lea tamaitai e faapea, sa taumafai Tupuola e tagotago ia te ia i se uiga faafeusuaiga, e ala i le tago i le pito i luga o ona vae. Fai mai a ia, e faalua ona tupu lea tulaga i totonu o le taavale a le Savali, ma sa fesili atu Tupuola ia te ia poo a ni ona lagona i ana gaioiga o lo o fai atu ia te ia. Sa tali lea tamaitai, “na o le inoino lava le lagona e oo mai ia te a’u i au gaioiga o lo o faia.” Na faaalia foi e lea tamaitai i le Faamasinoga e faapea, sa fai atu Tupuola ia te ia ina ua la foi ane mai Aleisa la te o i lona fale la te faiaiga ai. E faalua ona faia e Tupuola o ia gaioiga o le aso sa la o ai e lipotia le saofai a le alii fusu lauiloa o Joseph Parker. Fai mai a ia, sa faatu e Tupuola le taavale ae tagotago atu foi o ia i le pito i luga o ona vae, ae sa ia taofia. Ina ua toe faaauau le la faigamalaga, sa afe Tupuola i faletalimalo e lua ma sa ia taumafai e maua se potu la te malolo ai. I se tasi o ia faletalimalo, sa fai ane le pule e $30 le tau e faaaoga ai se tasi o faleoo. Peitai, na o le $20 le tupe a Tupuola sa i ai, ae sa ia manao i se faleoo e i ai ni pupuni. Ina ua la oo i Lalomanu, sa afe le taavale i se nofoaga i tua o le auala ma sa fai ane Tupuola la te malolo iina. Ina ua faamoe e Tupuola lana nofoa, sa oso ese le tamaitai mai le taavale. Sa iu ina toe faaola e Tupuola le taavale ma sa la toe o ese mai lea nofoaga. Ina ua oo atu i Aufaga, sa tuu ai loa e Tupuola o ia ma le faamatalaga e sue atu sona auala leaga e i ai ana galuega o lo o fia fai i Apia. Sa maua le auala o lea tamaitai i nisi o le au tusitala sa i ai i lena aso i le saofai a le susuga Joseph Parker.

TULIMATAI E INGA FUSUAGA FAAPITOA

O se tasi o fuafuaga o le a atili toatele ai tagata e asiasi mai i Samoa mo le taaloga faitaulia muamua a le Manu Samoa ma le Olopeleki o le a faia i laufanua o Samoa i le masina o Iulai o le tausaga nei, o fusuaga faapitoa i le va o tama taaalo tuai o le Manu Samoa ma le Olopeleki. O lea taamilosaga faapitoa o lo o faamoemoe e faataunuuina i le po o le aso 7 o Iulai, ao loma le taaloga i le aso 8 o Iulai. O lo o tuufaatasia lea faamoemoe e se tasi o tama taalo tuai sa taalo i le Manu Samoa faapea le Olopeleki, le susuga Tuigamala Vaaiga Tuigamala, po o “Inga the Winger” e pei ona lauiloa ai o ia i Niu Sila ma le lalolagi atoa. Ua valoia e Tuigamala, o le a toatele atu tagata e asiasi mai i Samoa nai lo o le vaitaimi o le fono a atumotu laiti tau atiae o le lalolagi, lea sa talimalo ai Samoa i le tausaga na tea nei. Fai mai a ia, o le a faalauiloa mulimuli suafa o tama taalo tuai a ia au e lua o le a iloilo i totonu o le maea ao loma lea taaloga faitaulia. Na saunoa Tuigamala, e le o popole le iuni lakapi ma tagata o Samoa i le aso ua atofaina mo lea taaloga. Pau le mea taua, ua taunuu ona malaga mai le Olopeleki e fetaui ma le Manu i ona laufanua.

FALEPUIPUI I LE FAIAIGA FAASOLITULAFONO

E ui i lipoti lelei mai le Ofisa Faanofovaavaaia o lo o lagolagoina ai ia Uili Kalolo ma Pati Mata’u, ae sa faia le faaiuga a le afioga Faamasino Sili Patu Tiavaasue Falefatu Sapolu, e tatau lava ona tuuina atu ni faasalaga faafalepuipui ia i laua ona o le tuga o a la solitulafono. Mo le silafia, o Uili Kalolo ma Pati Mata’u o lo o molia i lo la ulufale faasolitulafono i le fale o se ulugalii i se tasi o afioaga i le itumalo Fagaloa, lea sa la faiaiga faamalosi ai i le toalua o se tasi o alii o lea afioaga. Na faaalia e faapea, o le tama na aafia, o le tausoga a se tasi o taulelea ua molia. Ua faasalaina nei Uili Kalolo i le 6 tausaga ma masina e 10 i le falepuipui, ao Pati Mata’u e 4 tausaga ma ma masina e luau a faasala a ii le toese.