AMATA FAUSIA LE MALAE VAALELE I ALEIPATA

Ua amata faagasolo galuega mo le faatinoina o se tasi o fuafuaga a le malo ina ia fausia se malae vaalele fou i le itumalo Aleipata aua faigamalaga i le va o Samoa ma Amerika Samoa.  O lea malae vaalele fou e pe a ma le 800 mita le umi ae 50 mita le lautele, i fanua o afioaga o Satitoa ma Malaela. O le vaega e tulaueleele ai vaalele o lo o fuafua e oo atu i le 700 mita le umi ae 18 mita le lautele. O le nofoaga o lo o i ai lenei malae vaalele fou e pe a ma le 26 i le 32 futu le maualuga mai le sami, ma e pe a ma le fitu maila mai le aualatele a le malo o lo o sosoo ma le gataifale, ae pe a ma le lua maila mai le aualatele fou ua fausia i uta. O le 75 pasene o lo o fausia ai le malae vaalele o fanua faaleaganuu, ae 25 pasene o fanua pulea saoloto ma e pulea se vaega e le Ekalesia Katoliko. O lo o faagasolo i le taimi nei ia faatalanoaga ma i latou e ona ia fanua mo le faatagaga e fausia ai le malae vaalele, faapea le faatinoina o suesuega i ni aafiaga o le siosiomaga ma le soifuaga lautele i lea fuafuaga a le malo. I se pepa o faamatalaga mai le malo na taua ai le faamoemoe ina ia faaleleia faigamalaga i le va o Samoa ma Amerika Samoa i lea vaega o le atunuu ina ia manuia ai le atinae tau turisi ma atili faaleleia ai le tamaoaiga o le atunuu.

FAATALANOAGA O LE UAEA O FESOOTAIGA FOU

O le faamoemoe mo le tosoina o se uaea o fesootaiga fou aua le faaleleia atili o fesootaiga i luga o upega tafailagi mo lo tatou atunuu ma so o se atunuu o le lalolagi, o le autu lea o se feiloaiga na faatautaia i le taeao o le aso Gafua i le motu tele i Salafai. O le pulega ma sui o le Matagaluega o Fesootaiga ma Faamatalaga Faatekonolosi, sa gafa ma le faatautaia o lenei faatalatalanoaga i le Kolisi o Tuasivi. Ua valaaulia e le matagaluega sui mai afioaga o Tuasivi, Fogapoa ma Faga, ia o lo o tau lalata ane i lea nofoaga, e aofia ai ma sui o le malo e auai i lenei faatalatalanoaga aua le faamalamalamaina o tulaga uma e faatatau i lea vaega o le faatinoga o fesootaiga lea ua i ai le fuafuaga e faataunuu i se taimi e le o toe mamao i le tausaga nei lava. O lenei uaea o fesootaiga ua faamoemoe e tosoina i le alititai i le va o Savaii agai mai ai i le afioaga o Fagalii i le itumalo o le Vaimauga. O lo o i ai le faamoemoe e faataunuuina foi se faatalanoaga faapea i le aso Lulu mo le motu o Upolu nei, i Fagalii pea maea le motu tele i Salafai.

FAATAU E LE BLUE SKY PEPA MATAMATA

O le aso Gafua na faalauiloa aloaia ai e le Iuni Lakapi a Samoa le tuuina atu aloaia o le faatauina o pepa matamata o le taaloga faitaulia a le Manu Samoa ma le Olopeleki a Niu Sila i le aso 8 o Iulai o le tausaga nei, i le kamupani telefoni o le Blue Sky Samoa. Na faailoa e le alii ofisa sili le tumau o le Iuni Lakapi a Samoa, le susuga Faleomavaega Vincent Fepuleai e faapea, o le taimi nei o lo o ua ave uma le atoatoa a le Iuni lakapi a Samoa ma ana paaga ina ia taunuu ma le manuia le taligamalo a le atunuu i lea uluai taaloga a le Manu Samoa ma le Olopeleki. Ua faamautu mai o le falematamata ogatotonu e tai $500 tala Samoa le tau o pepa matamata, ao fale matamata i le itu Saute ma Matu e tai $300 tala Samoa ma le vaega lautele e amata mai i le tai $40 tala Samoa. O le a amata atu i le aso 6 o le masina fou ona faatau atu pepa matamata i so o se lala o le kamupani telefoni a le Blue Sky Samoa.

FALEPUIPUI MO LE 14 TAUSAGA LE FAIAOGA LE ALOFA

Ua faasalaina i le 14 tausaga i le toese le alii sa aoaoina le gagana e faaaoga ai lima (sign language) mo le fanau e i ai o latou manaoga faapitoa i le aoga o le SENESE, ina ua faamaonia e le Faamasinoga Maualuga ona moliaga o le faia o ni uiga mataga faafeusuaiga i ni teineiti sa aooga ai i lea aoga faapitoa. O le alii o Vaiaoga Leatuvao sa molia i moliaga e fitu o le faia o uiga mataga faafeusuaiga i se teineititi e i lalo o le 16 tausaga, o moliaga e tolu o le faia o uiga mataga faafeusuaiga i se teineititi e i lalo o le 18 tausaga ma moliaga e fa o le faaoolima mataga. O teineiti na aafia sa aooga ia Leatuvao i le aoga a le fanau e i ai manaoga faapitoa o le SENESE i Lalovaea ia Ianuari ma Setema o le 2012. Ina ua alia’e lea mataupu, ua sola atu Leatuvao i Amerika ma alala ai o ia. Peitai, sa faagasolo fesootaiga a le Matagaluega o Leoleo ma le Ofisa o le Amepasa o Amerika i Samoa mo le toe faafoi maia o lea alii, ma o le masina o Aukuso o le 2013 na maua ai e leoleo i Amerika o ia ina ua uma le aoga o le visa na malaga ai i Amerika, ma ua nofo faasolitulafono ai o ia i lea atunuu. O le masina o Iulai o le tausaga na te’a nei na toe faafoi mai ai lea alii i Samoa.

TOFIA PETANA MA KOMESINA O SAMOA I AUSETALIA

Ua tofia nei e le malo le tamaitai o Hinauri Petana e avea ma komesina maualuga fou o Samoa i Ausetalia mo le isi tolu tausaga. Ua sui tulaga nei o ia i le afioga Lemalu Tate Simi lea ua tuumalo. O Petana ua silia i le 30 tausaga o lana tautua i le malo Samoa ma sa avea o ia ma ofisa sili o pulega o le Matagaluega o Tupe a le malo mai le 1999 seia oo i le 2009, i le maea ai ona ia tauaveina le tele o tofiga sinia i totonu o le matagaluega talu mai le 1979. O lo o umia e Petana le faailoga tikeri o le Bachelor of Arfts i Mataupu Tau Upufai o Malo (Political Science) mai le Iunivesete o le Pasefika i Saute i Fiti.