FAITIOINA E TUILAEPA IA AIGA FUAFUAINA

Ua faitioina e le alii palemia, le susuga Tuilaepa Sailele Malielegaoi, le faia o aiga fuafuaina a tagata lautele ona fai mai a ia, ua “faalavelave” i le faatupulaia o le faitau aofai o le atunuu. O le faaiuga a matua e faaititia le aofai o le la fanau e le talafeagai ona o lo o moomia e Samoa ni tagata e galueaina le laueleele. O ia manatu o le alii palemia na faaalia i se feiloaiga ma le au tusitala lea na ia taua ai e faapea, o aiga fuafuaina e le manaomia i Samoa. “Ua ou faalogo i nisi fai mai o le mafuaaga o le faia o aiga fuafuaina ona e le gafatia e nisi o matua ona tausi se fanau toatele,” o a Tuilaepa lea. “O faamatalaga na a tagata o lo o alala i atunuu i fafo e malulu le tau, ae mo i tatou iinei, ua tatou masani lava i le tamo’emo’e solo ma le ieie mai le taeao e oo i le po.” Fai mai a ia, o le le faatupulaia o le faitau aofai o le atunuu, e le o fesoasoani i lona atinae. “Ua malosi le tatou tamaoaiga ae ua laiti le aofai o tamaiti ua vaaia i aiga!” o le saunoaga lea a le alii palemia. “Ua ou fiu foi e su’e i le Tusi Paia e leai se mea o taua mai ai ua lava le tasi o le pepe.” Na fesiligia le faauluuluga o le Ofisa o Aiga Fuafuaina, le susuga Liai Siitia, i sona manatu i lenei mataupu. Na faaalia e le tina ia Liai, o lafoga a Tuilaepa o ona lava manatu ia, ae e taua tele galuega a lona ofisa o lo o faagasolo mo le soifua maloloina lelei o aiga.

FAASALA I LE FAATAU O SEA MA LOLI

Ua faasalaina nei e le Faamasinoga se tama i le faia o se pisinisi faasolitulafono o lona faatauina atu lea o figota o le sami e aofia ai sea ma loli, i se alii faipisinisi mai Saina. E le o mafai ona faalauiloaina i le taimi nei lea alii faipisinisi mai Saina. O le uluai mataupu lenei ua oo i le Faamasinoga ua molia ai e le Matagaluega o Faatoaga ma Faigafaiva se tasi i totonu o le atunuu. O le ua molia o le tama o Seveli Feliuai, 49 tausaga o Toamua, ma e $2,100 le sala tupe ua faasalaina ai nei o ia, e tatau ona totogi i totonu o vaiaso e lua, a leai, e tolu masina o le a nofosala ai o ia i le toese. Ua faatonuina nei e le Faamasinoga le Matagaluega o Faatoaga ma Faigafaiva ina ia faatautaia ni a latou aoaoga ma polokalama faapitoa e faalauiloa ai lea mataupu i le mamalu lautele o le atunuu ina ia nofo silafia ai o lo o aiaia i lalo o le tulafono le faatinoina o tulaga talafeagai ae lei faatauina atu so o se figota o le sami.

FAASALA AVE PASI I LE FAI O MILIGA

O le tulai mai pea o mataupu tau faalavelave i luga o alatetele aemaise lava le aofia ai o pasi, o lo o aafia ai le soifua o le mamalu lautele o le atunuu, na fautuaina ai e le Faamasinoga o Mataupu Tau le Aiga mo ave pasi uma o lo o fiafia e fai a latou miliga i luga o le alatele, ina ia fuafua lelei a latou faaiuga fai e le gata mo le soifua saogalemu o le mamalu lautele o le atunuu, ae faapea foi i latou lava. Ua sala tupe ai nei ni ave pasi se toalua i le $600 a le ave pasi e totogi atu i le Faamasinoga ina ua la ioe i moliaga ua molia ai i laua, o le ave pasi saoasaoa. Na maua e le Faamasinoga o nei ave pasi e toalua, e 22 tausaga o le tasi ae 32 tausaga o le isi, na faia lava ma le mautinoa le la solitulafono o le faia o la miliga ao i ai nisi o le mamalu o le atunuu i totonu o a la pasi. O lenei faasalaga e talitonu le Faamasinoga o le a tuuina atu ai foi ma se feau mo isi ave pasi o lo o fiafia e fai lenei solitulafono o le fai o miliga i luga o alatetele, ina ia tuu loa lea tulaga ina nei maumau ai se soifua.

TEENA E LE P.S.C. IA TUUAIGA

O lo o teena e le ofisa o le komisi e pulea tagata faigaluega a le malo ia tuuaiga e faapea, ua toe agai le komisi e suia faamatalaga o galuega faatino mo le tofiga o le komesina o leoleo. “E le sa’o na tuuaiga,” o le tali lea a se tasi o sui ofisa sili o le ofisa. “E le mafai ona toe suia ia faamatalaga o galuega faatino o se avanoa faigaluega pe afai ua maea ona faasalalau, o lona uiga e le sa’o ia tuuaiga.” Na taua e le sui ofisa sili, o le auala tonu mo faamatalaga e uiga i le mataupu ua laga, o le taitaifono o le komisi, le susuga Tu’u’u Dr. Ieti Taulealo. O le suia o faamatalaga mo galuega faatino o le avanoa o le komesina o leoleo lea ua agavaa ai nei tagata e le i galue muamua i le galuega faaleoleo, e le o logomalie i le toatele o leoleo o lo o faigaluega nei faapea i latou ua malolo litaea. O lo o faagasolo foi taumafaiga a le faalapotopotoga a i latou sa leoleo muamua e saili lagolago e taofia ai le faatinoina o lenei fuafuaga a le malo.