Ads by Google Ads by Google

TALA MAI SAMOA

KONESULA FOU O SAMOA I AMERIKA SAMOA

 

Ua faamaonia e le Kapeneta le tofia ai o le afioga Auseugaefa Mafaituuga Faatili Tumaifale Vaasatia Poloma Komiti, e avea ma konesula aoao o Samoa i Amerika Samoa mo le isi tolu tausaga o lumanai nei. O le a sui tulaga o ia i le afioga Mataafa Tomasi Esera lea sa ia tauaveina lea tofiga mo le fa tausaga ua tuanai. O le afioga Auseuga sa tautua muamua i le malo i le tofiga o le ofisa sili o pulega mo le Matagaluega a le Palemia ma le Kapeneta mai le tausaga e 1997 i le 2009. Sa galue foi o ia i le Ofisa o le Fono a Atunuu o le Pasefika i Noumea, Niu Kaletonia (South Pacific Commission) mai le 1992 i le 1996. Na amata le tautua a le afioga Auseugaefa mo le malo Samoa i le tausaga e 1974 i le ofisa o le Savali ma le Ofisa o le Va i Fafo. E tofia nei o ia i lona tofiga fou o lo o avea o ia ma sui o le komiti faatonu o le Faalapotopotoga o Inisiua a Samoa, o se tofiga sa ia tauaveina talu mai le 2012. O le afioga Auseugaefa o se tamalii mai le afioaga o Tafitoala, Safata ma Faleu i Manono, ma o ia o se sui o le Ekalesia Metotisi i Fusi, Safata.

 

TOLOPO LAUINA FAASALAGA O MUAGUTUTAGATA

 

Ua toe tolopoina i le aso Gafua o le vaiaso fou le lauina o le faasalaga o le alii sa avea muamua ma faipule o le itumalo Sagaga Le Usoga, le afioga Muagututagata Peter Ah Him, i le Faamasinoga Maualuga. O lea faaiuga na faia e le afioga Faamasino Vui Clarence Nelson i le aso Gafua na te’a ina ua maea le folasaga faaiu a le loia sa tulai mo Muagututagata, le susuga Fepuleai Patrick Fepuleai, lea na ia tuuina atu ai ni molimau e lagolagoina ai le ua molia mai le alii palemia, le susuga Tuilaepa Sailele Malielegoi. Na taua i le molimau tusitusia a le alii palemia le tele o galuega lelei sa faatinoina e le ua molia ao avea ma minisita lagolago. Na tuuina atu foi le molimau tusitusia a le uso a le ua molia, le alii faipule ia Maualaivao Pat Ah Him, o tagata o lona afioaga, o sui o le malo, o le afioga Akiepikopo Alapati Mataeliga, o le Patele o le latou aulotu ma isi. Na finau le alii loia ia Fepuleai, o Muagututagata o se tagata sa tele lona aoga i le atunuu ma le malo, faapea foi o lona itumalo lea sa ia totogiina pili aoga o nisi o fanau o lo latou nuu. Fai mai a ia, ua salamo le ua molia i lana solitulafono na fai. E lua moliaga o le gaoi ma le taufaasese na faamaonia i le Faamasinoga i ni feutagaiga ma se kamupanhi Saina sa fai paaga ma lana kamupani.

 

MANAIA LE KANG KONG I LE TAUMAFA

 

Ua maua i suesuega a le vaega o laau toto ma faatoaga a le Matagaluega o Faatoaga ma Vaomatua i Nuu, se tasi o laau o lo o maua i Samoa ua faaigoaina o le Kang Kong po o le kapisi sosolo, o se fualaau fai sua e tele lona aoga mo le soifua maloloina. O lenei laau o le Kang Kong e lua ona ituaiga o lo o ola ai i Samoa, o le ituaiga e lautetele ona lau ma le ituaiga e lauiti ma e mafai ona ola i nofoaga susu faapea le eleele matutu. Na faaalia e le faauluuluga o le vaega o laau toto i Nuu, le afioga Misa Konelio, o lo o faagasolo a latou suesuega i le taimi nei e faamautinoa ai po le a le ituaiga faiga e mafai ai ona totoina le Kang Kong ina ia mafai ai ona faasafua atu i le atunuu lautele. Na saunoa Misa, e fa itu taua o le Kang Kong po o le kapisi sosolo ua maua i a latou suesuega. Muamua, e tele lona aoga i le itu tau soifua maloloina mo le tagata soifua (nutritional value), lua, e faigata ona aafia le ola o lea laau i faama’i ma iniseti faalafua, tolu, e faigofie ona ola, ma le lona fa, e na o le 30 aso mai le taimi e toto ai, ona fafai loa lea mo le faaaogaina i le gaseseina o taumafa. E le gata i lea, a uma ona tipi ese le vaega o le laau e faaaoga, na o le vaiaso ae toe ola foi lea vaega o le laau ma mafai ona toe faaaoga foi i gasesega o taumafa.  O le vaiaso na te’a nei na faagasolo ai le tofoga o lenei laau ma na toatele i latou sa molimauina lona tofo lelei.

 

MOLIA I LE FAATAU O LOLI SAMI

 

E 49 tausaga o se tama mai le afioaga o Toamua, o Seveli Feliuai, ua ioe i le moliaga o le faatau faasolitulafono o loli mai le sami e aunoa ma se laisene, ina ua ia tulai i luma o le tamaitai faamasino ia Mata Tuatagaloa i le Faamasinoga Faaitumalo i le aso Gafua na sei mavae atu nei.

 

Na faaalia i faamaumauga a le Faamasinoga e faapea, na maua lea tama o ia faatautaia se nofoaga i lona maota i Toamua e faamamago ai loli ma faasuni e faatauina atu e aunoa ma se laisene. E pe a ma le 431 kilokalama o loli ua maea ona faamamago na aveesea faamalosi mai le maota o le ua molia. E ui ina ioe lea tama i lona moliaga, ae peitai na ia faaalia, na te le iloaina e moomia se laisene e faatautai ai le nofoaga sa faamamago ai ana loli. Na ia faaalia foi e faapea, na o le pau lea o le auala o lo o tausi ai lona aiga. Ae na tali le tamaitai faamasino, o lo o ia malamalama lelei i lea tulaga. Peitai, ua iloa i le aofai o loli ua maea ona faamamago na maua i le fale a le ua molia, e le i faatinoina lea tulaga mo lona aiga, ae foliga mai sa ia faia ina ia faatau atu i se isi. E lei faailoaina mai po o ai na taumafai lea alii e faatau atu i ai ia loli.  O le aso Faraile a sau nei o le a lauina ai lona faasalaga.