Ads by Google Ads by Google

TALA MAi SAMOA

FAAMAVAE LE FAIPULE O SAGAGA LE USOGA

 

Ua faamavae mai le Palemene le alii faipule o le itumalo Sagaga Le Usoga, le afioga Muatagata Peter Ah Him. Na faateia sui o le Palemene ao faagasolo soalaupulega o le pili taufaaofi o le Sitiseni i le aoauli o le aso Faraile na sei mavae atu nei, ina ua tulai le afioga Muagututagata ma tuuina atu lana faamavaega i se saunoaga e 10 minute. Na faatoese o ia i le alii palemia ma le latou vaega faaupufai o le HRPP ona o le mataupu ua mafua ai lana faamavaega.

 

Na faatoese o ia i lona itumalo i sona sese ao avea o ia ma o latou sui. Ua sefulu nei tausaga o avea le afioga Muatagata ma sui faipule o le itumalo Sagaga Le Usoga. E pei ona lipotia muamua i a tatou tala, e tele ni mataupu na aafia ai le alii faipule i le tulafono amata mai i le vaitaimi ao avea o ia ma peresetene o le faalapotopotoga o le Koluse Mumu, faapea le mataupu na molia ai i laua ma le alii sui palemia ia Fonotoe Nuafesili Pierre Lauofo i le tausaga na te’a nei, ina ua liliu faasolitulafono lana taavale i se magaala i le taulaga. O le mataupu mulimuli na molia ai o ia i le tulafono lea ua faamaonia ai ona moliaga o le faia o faiga taufaasese i se kamupani sa feutagai ma lana kamupani.

 

FAATUPE E IAPANI FALEAOGA A MANUNU

 

Ua tatala aloaia le faleaoga a le aoga tulaga lua a le afioaga o Manunu lea na fausia ma faatupeina e le malo o Iapani i lalo o le polokalame o fesoasoani faapitoa mo poloketi mo le malu puipuia lelei o tagata. Ua talafeagai lenei fesoasoani a le malo o Iapani ma le amatalia o lenei tausaga faaleaoaoga 2015. O le tau aofai o le faleaoga fou e $95,238 tala Amerika e tusa lea ma le $220,000 tala Samoa.

 

I se sauniga faapitoa i le aso Tofi o le vaiaso ua te’a, na faafetaia ai e alii ma faipule o le afioaga le fesoaosani a Iapani ma ona tagata ma na momoli ai foi ma le faamalo a le amepasa o Iapani i Samoa nei, le afioga Tuimaugaoali’i Kazumasa Shibuta i le komiti a le aoga tulaga lua a Manunu ona o le finafinau ina ia lelei ma atoatoa le siosiomaga e aoaoina ai fanau o le afioaga. O le lona tolu ai nei o faleaoga ua faatupeina e le malo o Iapani ua mafai ona tatalina i lenei tausaga. O le tausaga 1991 na faavae ai le faiga paaga a le malo Samoa ma ma le malo Iapani.

 

MOLIA I LE GAOIA O LE $100,000

 

E tolu tausaga lea ua fa’asalaina ai nei e le Faamasinoga Maualuga le alii o Daryl Ah Far ina ua fa’amaonia ona moliaga e lua o le gaoi ao avea ma tagata faigaluega. O lea alii sa galue o se tasi o ofisa sinia o se tasi o faletupe i Apia, sa ia vaaia le potu fa’apitoa o lo o teu ai tupe Samoa uma a le faletupe. E $100,000 tala Samoa na aveesea faanana e lea alii i ni meli puipui ma o lo o masalomia sa fesoasoani i ai nisi tagata i le fa’atinoina o lenei solitulafono matautia.

 

O le fa’atautaia o galuega a le au su’etusi na maua ai le toesea o lenei tinoitupe a le faletupe. Na faaalia, o lenei tinoitupe sa teuina lava i totonu o le potu fa’apitoa sa vaaia e le ua molia, ae sa ave faanana i fafo e Ah Far i le fesoasoani a nisi ua masalomia, e ala i meli puipuia. Mai le $100,000 o lo o tau sailia nei, na o le $7,000 ua ioe lea alii ua ia faaaogaina. Na fa’ailoa mai e le loia o lo o tulai mo le ua molia, le susuga Diana Roma, ua sauni Ah Far - 26 tausaga le matua - e tulai i le Faamasinoga e molimau ma fa’ailoa i latou uma sa aafia i le fa’atinoina o lea soligatulafono.

 

TAUMAFAI E FASIOTI TAGATA I SE LAAU MALOSI

 

E 21 tausaga o se taulealea mai Leone, o Lyndon B. Johnston ua taofia nei e leoleo ona o se fa’alavelave na aafia ai se laau malosi na tulai mai i Matautu-uta i le vaiaso ua te’a. Na faaalia e le sooupu a le Matagaluega o Leoleo, le susuga Le Mamea Su’a Muliaga Tiumalu e faapea, o luma o le fale aisakulimi o le Scoops i Matautu-uta sa agai atu i ai le ua molia e faasua’ava, ma sa fautuaina e ni taulele’a e toalua sa nofonofo ai ina ia alu i le fale ona ua ‘ona tele o ia.

 

Peitai, sa toe foi ane le ua molia ma se laau malosi o le ituaiga o le 12 ma ia tafaina ai ia alii. Na faaalia e Le Mamea, na manunua ia alii ina ua salalau pulu o le laau malosi ao tamomoe ese mai lea nofoaga. Sa faapea foi ona leaga ai ma le fa’amalama o le fale suisui e sosoo ma le Scoops i le ua molia. Ua molia nei Johnston i le taumafai e faaoo le oti i se tagata ma o lo o taofia i le vaavaaiga a leoleo e faatali ai lona fa’amasinoga.