LE TOE MANANAO TUSITALA A LE SAVALI I LE LATOU FA’ATONU

E to’afitu tagata faigaluega a le nusipepa a le malo o le Savali ua tusi i le ali’i Palemia, e fa’ailoa i ai lo latou le toe manana’o e toe fa’afo’i atu le sa avea ma Fa’atonu, ona o uiga na te fa’aalia i totonu o le galuega e le manaia i se vaai. O le vaiaso na tea nei na faia ai le fa’aiuga a le Kapeneta e fa’amalolo le afioga a Tupuola Terry Tavita mai lana galuega ae maua pea lona totogi, i le mae’a ai lea ona faila e le malo o tu’uaiga fa’asaga ia te ia, i lona taumafai lea e fa’amalosi se tama’ita’i.

O ni isi o mafua’aga o lo o taua i le tusi talosaga sa saini e le aufaigaluega a le Savali, o uiga le mafaufau e fa’aali e latou Fa’atonu i tagata faigaluega i taimi e ita ai, e aofia ai le palauvale i le aufaigaluega ma luma o tamaitai faigaluega pe a ita. O le lua vaiaso talu ai na taofia faapagota ai Tupuola i le toese i Tafa’igata, ina ua faila e se tama’ita’i o lo o a’afia sana tagi i le ofisa o leoleo, e tusa ai o ni gaioiga sa faia e Tupuola. O le aso 19 Ianuari, 2015 lea ua faatulaga e tula’i ai Tupuola i luma o le fa’amasinoga mo le taimi muamua, ae ua tofia nei e le kapeneta le afioga a Mamea Ulafala e avea ma Fa’atonu le tumau a le Savali.

SI’ITAGA TOTOGI KOMITI FA’AFOE L.T.A

O si’itaga e 92% i totogi o totino o le Komiti Fa’afoe a le Ofisa o le L.T.A po o le ofisa o Fela’uaiga a Samoa, ua vaaia ai le fa’asi’usu’i mata i ai o le to’atele, ina ua manino i le ripoti o le tala o le tupe fa’aletausaga sa tu’uina atu i luma o le Palemene. I se vaega o lea ripoti o lo o taua ai e fa’apea, e $60,498 le tupe sa fa’aalu i totogi mo sui o le komiti fa’afoe i le tausaga tupe 2011-2012, ae i le tausaga tupe 2012-2013, e $65,448 le tupe sa fa’aalu i totogi. Na taua e sui o le Tautua Samoa e faapea, e le talafeagai le soona faaalu o tupe i totogi o tagata o lo o maualuga le tamaoaiga i le atunu’u, ae o lo o fa’aauau pea ona pagatia tagata lima vaivai.

SUI TAUSAGA AE TUMAU PEA FA’AFITAULI I SAMOA

E ui o lea ua sui le tausaga peita’i o lo o maitauina pea fa’afitauli masani i totonu o Samoa, le Parataiso o le Pasefika, i le to’atele pea lea o tagata aisi tupe o lo o vaaia solo i le taulaga i Apia i aso ta’itasi, ma ua avea lea masani o se auala e saili ai tupe mo latou ma o latou aiga. Na taua e ni isi o tagata aisi tupe i tusitala i Samoa e fa’apea, talu ai ua le maua ni a latou galuega e maua ai ni tupe mo latou, ua latou manatu ai e avea lea auala o le aisi tupe o se auala e maua ai tupe mo latou ma o latou aiga.

Na taua e ni isi o i latou le o o atu i le $200 le tupe e mafai ona latou maua i le vaiaso, pe afai e lima foa’i le atunu’u, ae afai e fa’aletonu le sailiga o le aso, pe a ma le $100. O lo o finau pea le Itu Agai i le Fono a le Palemene, ina ia saili e le malo se auala e fesoasoani ai i tagata o lo o aisi tupe solo i le taulaga, peita’i na saunoa le ali’i Palemia, o le ta’itai fo’i lea o le atunu’u ia Tuilaepa Lupesoliai Sa’ilele Malielegaoi, e le tatau ona maua se tagata aisi tupe i Samoa, o lo o tele le fa’i, ulu, talo ma le koko e toto ona maua ai lea o tupe e tausi ai o ia ma le aiga.

FA’ATETELEINA AOFA’I TAGATA A’AFIA SIAMA CHIKUNGUNYA

I ripoti ua tu’uina atu e le Falema’i i le atunu’u, ua taua ai le fa’atupulaia pea o le aofa’i o tagata o lo o a’afia i ‘auga o le siama o le chikungunya, e ui ua aga’i i lalo le aofa’i o tagata e a’afia i le fa’ama’i mata. Na taua e le Pulesili o le vaega o le Soifua Maloloina a Samoa ia Leituala Dr. Ben Matalavea e fa’apea, ua mafua ona toe fa’atupulaia le aofa’i o tagata ua a’afia i le gasegase, ona o le vaitau susu sa i ai le tau i Samoa i ni nai vaiaso e le i mamao atu, lea na tele ai namu na tau tu’ufua solo i nofoaga e to’a ai le suavai. Ua lapataia le atunu’u e fa’amama tafatafa o maota ma laoa, ma ia taumafai e tu mama i totonu o aiga ina ia mautinoa e puipuia le atunu’u mai le a’afia i ‘auga o lenei fa’ama’i leaga.

fa’aliliu: AF