LAU IUGA O MUAGUTUTAGATA IA IUNI 2015

Ua maea ona tuuina atu folasaga ma finauga faaiu a loia i le faamasinoga o le afioga i le minisita lagolago po o le faipule o le itumalo Sagaga Le Usoga, le afioga Muagututagata Peter Ah Him. O le aso Faraile ua mavae na faatoa faia ai finauga faaiu a loia, ina ua tolopo lea vaega o le faamasinoga ona sa gasegase le alii faamasino, le afioga Vui Clarence Nelson.

O moliaga o le faia o faamaumauga sese ma le faatino o ni gaioiga faaalatua o lo o molia ai Muagututagata ona o se tagi a le kamupani mai Saina o lo o i ai sona lala i Samoa. O le aso 30 o le masina o Iuni o le tausaga fou o le a aumai ai se faaiuga a le Faamasinoga lea o le a iloa ai, pe faamaonia pe le faamaonia moliaga fa’asaga I le alii minisita lagolago.

MAFUTA I SAMOA TUPULAGA AMERIKA

E to’a 21 tupulaga talavou e aofia ai alii ma tamaitai mai le Iunivesite o Wyoming i Amerika o lo o feagai ai ma se polokalame faamasaniI le soifuaga faasamoa. O se polokalame ua mafai ai ona silasila le au malaga i tu ma aganuu faasamoa, ma le olaga o aso uma.

O le sootaga foi o tagata Amerika i tagata Samoa le isi lea o itu taua ina ia mafai ona fetufaa’i silafia ma maua ai se sootaga lelei e malamalama ai tupulaga Amerika i a tatou tu ma aga. O meaai paleni ma soifua maloloina lelei mo tagata faapea faatoaga le tasi o autu o lo o agai i ai lenei polokalame ona o se tasi lea o vaega o lo o tau faitutusa ai Samoa ma lea atunuu. Ua filifilia mai nisi o tupulaga talavou mai aoga maualuluga i Samoa e mafuta faatasi i le polokalame ma tupulaga mai Amerika.

O le itumalo o A’ana Alofisa faia se faaaloalo faaleaganuu na faafeiloai ai tupulaga Amerika lea sa faatino ai se ava o le feiloaiga. E sefulu aso o le a nonofo ai le au malaga I ni aiga ua filifilia ae e tolu vaiaso o lo o i ai i latou i Samoa.

AGAVAA TIM NANAI-WILLIAMS

Ua agavaa nei le alii o Nanai Williams e taalo mo le Manu Samoa ina ua maea ana taaloga e fa sa taalo ai i le au lakapi taitoafitu a le Manu samoa, e pei ona maea le taamilosaga sa faia i a Aferika i Saute lea na foi fua mai ai le au lakapi fitu a le atunuu e leai se manumalo.

Faaalia e le alii o Nanai Williams lona matamuli ina ua taaalo Samoa ma Niu Sila i Aferika i Sauté ona ua toe taalo fasagasaga i ona uso mai Aotearoa, peitai o le itu sili ona fiafia ai ua agavaa nei e ulufale i le Manu samoa e tusa o aiaiga o tulafono a le pulega o le lakapi ile lalolagi, ao sauni ai le Manu Samoa sefululima i le ipu o le lalolagi.

IPU O LE PASEFIKA I LE LAKAPI LIKI

Ua lipotia mai le i ai o se suiga i le tausaga fou i le tulaga o taaloga faitaulia po o taaloga faitaulia faavaomalo mo au a le Pasefika e aofia ai le au lakapi a le atunuu le Toa Samoa. Ua faatulaga mai o le a lua ni taamilosaga o le a faagasolo e aofia ai le taamilosaga liki i le ipu a atunuu Melenisia ma le ipu mo au mai atunuu Polenisia.

O Fiti o le a aofia i le ipu mo atunuu Melenisia lea o le a fetaui ai ma Papua Niu Kini, ao le Toa Samoa e fetaui ma Tonga i le ipu a atunuu Polenisia. O taaloga faaiu o le a faia i le Gold Coast i le msina o Me ae mulimuli ai ni taaloga mo le taimi o le aso faamanatu o fitafita na maliliu i le taua lona lua o le lalolagi le ANZAC test.

O le taaloga faitaulia mo le ipu a le Pasefika i le lakapi liki na faavaeina i le tausaga e 2013 ina ua faiaina Samoa i le taaloga ma Toga lea sa faia i Penrith, ae na sosoo ai ma le taaloga a Fiti ma Samoa na faiaina ai Fiti ma agavaa ai le Toa Samoa e sao atu i le taamilosaga o le Four Nations.

Saunia: Akenese Ilalio Zec