GAOI LE $50,0000 SOLA I NIU SILA

Ua lipotia mai le sola i Niu Sila o se tamaitai o lo o masalomia lona aafia i le gaoia o le silia ma le $50,000 o tupe a le Ofisa o Auaunaga Tau le Soifua Maloloina. O lenei solitulafono na tulai mai i le lala o le ofisa i Savaii ma e i le va o le $50,000 ma le $60,000 le tupe ua leiloa. E oo atu i le toa sefulu i latou o lo o masalomia o lo o aafia ai i lea soligatulafono ma o lo o faagasolo suesuega a le matagaluega.

Na faaalia e se sosia mai lea ofisa, e le o mautinoa pe faapefea ona tuua e lea tamaitai le atunuu ae o lo o i ai le tusi taofi mo ia e faasa ai ona ia tuua le atunuu. Na ia taua, o le tupe ua leiloa nei sa faaaoga e sui o le ofisa e aunoa ma se faatagaga i se faiga faanonogatupe a ua le teua i teugatupe a le ofisa i le faletupe e pei ona sa tatau ona faioa, ma na alia’e ia faiga faasolitulafono ina ua maua e se sui fou o le ofisa e faoigaluega i le vaega o tupe a le ofisa, ma sa ia lipotia loa lea solitulafono.

AMATA LE POLOKALAMA O LE 8 ASO O LE KERISIMASI

O le itula e fitu i le afiafi o le aso Gafua na sei mavae atu nei na amatalia ai le polokalama o Pesepesega o le Valu Aso o le Kerisimasi a le Ekalesia Katoliko Puleaga Samoa Apia i le maota o le Tuutuu i le Loloto i Apia. E pei ona silafia, o lenei polokalama a le ekalesia e faia i tausaga taitasi i le vaitaimi lenei ao loma le Kerisimasi. O le afiafi nei o le a tatalaina le polokalama i se sauniga lotu puupuu e taitaia e le afioga Akiepikopo Alapati Mataeliga, ona pepese ai lea o aufaipese ua lautogia e tatalaina le polokalama i lenei tausaga, o le aufaipese a le Ekalesia Katoliko mai Tiavea-uta, Aleipata, o le aufaipese a le Kolisi Telosia i Moamoa, ma le aufaipese a le Kolisi Telosia i Logoipulotu.

O aufaipese uma o le a pepese i lea polokalama, o le a faia a latou taavale teuteu e auai i le solo a taavale teuteu ua faatulagaina mo le aso Faraile o le vaiaso nei e amata mai i Vaisigano, agai mai ai faataamilo i le uati i le taulaga ma agai atu i le maota o le Tuutuu i le Loloto. A maea ona faagasolo pesepesega a aufaipese eseese ua filifilia mo le valu aso o lumanai nei, ona fa’aauau ai lea Matagaluega eseese a le ekalesia seia oo i le aso Kerisimasi. O le a faasalalau sao le polokalama o le 8 Aso o le Kerisimasi i le TV a le Ekalesia Katoliko.

LAVEVEA LE ULUGALII MA LE LA FANAU, MALIU LE TINA

O le aoauli o le aso Toonai na te’a nei i le pe a ma le afa o le lua i le aoauli na tulai mai ai se faalavelave tau taavale i le afioaga o Faleaseela i Lefaga na maliu ai se tina. Na lipotia mai e faapea, o se taavale e tali tutusa ma le ituaiga taavale Suzuki, sa malaga atu ai se ulugalii ma le la fanau e toalua mai Apia e agai atu i Lefaga.

O le saoasaoa tele o le taavale na faapea ona tifa i tua ma taavalevale ai. Na maliu le tina sa nofo i talaane o lona toalua lea sa aveina le taavale, ae na faasaoina le la fanau e toalua ma le tama o le aiga. Ina ua suesueina e leoleo le tama, sa iloa ai e faasua’ava o ia. Na lipotia mai e faapea, sa feula e lea tama le masini e iloa ai le aofai o le ava malosi o lo o i le tino o le tagata, ma iloa ai e 93 micrograms o le ava malosi o lo o i lona tino, ae o le aofai faatagaina o le ava malosi e 40 micrograms. O lo o talia nei ni moliaga faasaga ia te ia e faaulu e leoleo i le Faamasinoga.

MAUA LEOLEO SAMOA I SUDAN FAAILOGA TAUALOA

E toatasi se leoleo Samoa o lo o aofia ai i sui e toatolu o vaegaau a Malo Aufaatasi i le atunuu o South Sudan, ua maua faailoga taualoa mai le taitaiau o le Ami a le atunuu o Mongolia ona o le le fefe i le faatinoina o o latou tiute e ui i le lamatia o o latou soifua. O lea alii leoleo Samoa e suafa ia Khamtahn Tsui Daniel Stanley, ao isi sui e toalua ua latou maua nei faailoga taualoa e omai mai Zambia ma Nigeria. Na lipotia mai e faapea, sa asiasi atu se taitaiau mai se tasi o itumalo o le atunuu o Sudan i Saute i se nofoaga i fafo ifo lava o le lotoa a Malo Aufaatasi o lo o latou api ai.

Na faaalia, o le uso o lea taitaiau o lo o i totonu o le lotoa a Malo Aufaatasi ma sa ia talaiina i tagata i totonu o le lotoa o ia o le uso o lea taitaiau, o se tulaga le talafeagai ona o nisi o tagata e alala ai i totonu o le lotoa e lagolagoina vaega faaauupegaina o lo o fetauai ma fitafita a le malo. O lea sa lama ai loa e nisi o tagata i totonu o le lotoa ia le uso taitaiau o lea alii. O le popole tele la o le susuga Stanley ma isi fitafita e toalua ua amanaiaina i faailoga taualoa, sa latou o atu sao ai i le uso o le taitaiau ma lapataia o ia, e fai i lona uso e aua nei ulufale atu i le lotoa O Malo Aufaatasi o lo o latou api ai, ina nei tupu ai se faalavelave. Sa faapea ona usitaia e lea alii le lapataiga ma sa ia auina atu se feau i lona uso e aua nei ulufale atu ina nei afaina lona soifua.

Lilomaiava Andrew Fa’asau, Naenae Productions