TETEE TANUGAMANONO i LE FAAIUGA A LE FAAMASINOGA

Ua teena e le pulega a alii ma faipule a Tanugamanono le iuga a le faamasinoga maualuga ua tuuina mai i le vaiaso na tea nei. O lea faaiuga ua faatonuina ai le afioaga e totogi atu le seleni e lata i le miliona tala i le tina ia Afu Faumuina Tutuila, lea sa feeseeseai ma le afioaga ona o fanua ma iu ai ina susunuina ma faaleagaina fale o lea aiga seia oo ina oo atu lea mataupu i le faamasinoga.

O le aofai atoa o le seleni ua faatonuina e le faamasinoga le afioaga o Tanugamanono e totogi atu i lea tina ma lona aiga e $982,295. Sa auai i lea feioaiga le loia a le nuu, le susuga Rosella Papalii aua le faapupulaina o lea iuga ma faamalamalama nisi o auala faaletulafono e mafai ona uia e le afioaga. i se pepa o faamatalaga o lo o taua ai e faapea, ua auau faatasi le fono a alii ma faipule o Tanugamanono e tuuina atu lenei mataupu i le faamasinoga o apili. Ua tapa foi le tamaitai loia ina ia faagaioi loa pepa o le apili.

E faavae lenei faaiuga a alii ma faipule i le talitonuga maumaututu, e le o amiotonu le faaiuga a le susuga i le alii faamasino o Pierre Slicer. Ma o lenei iuga e lutia ai le pulega mamalu a alii ma faipule, solipala faiga faamatai ma oia faiga faavae o nuu ma afioaga. Ua tapa foi le tamaitai loia ina ia faaulu se talosaga i le faamasinoga o apili, e tofia se faamasino Samoa fainuu, i le iloiloga ma taualumaga uma o lenei mataupu.

O le finagalo o le afioaga e taua lea tulaga ona o lo o taoto i le moa o lea mataupu ia aganuu ma agaifanua ma faiga faavae o nuu ma afioaga, e matua manaomia ai se faamasino e silafia ma malamalama lelei i tulaga e pei ona taua.

TOLOPO LE FAAMASINOGA ULUGALII TUUAIA FAIA PISINISI FAATALITANE

O le aso 27 o Iulai lea ua toe tolopoina i ai le faamasinoga o se ulugalii o loo tuuaia i le faia o se la pisinisi faatalitane, o Mekala James ma Sanele Sanele.

O lea ulugalii sa molia i luma o le faamasinoga i le faaogaina lea o ni tamaitai, e foai atu o latou tino i ni alii ma le faamoemoe e maua mai ai ni taui tupe ma e 13 moliaga faasaga i lenei ulugalii o loo molia ai. i le faagasologa o lea faamasinoga, sa tutulai ai ni molimau e toavalu ma sa latou faailoa, o tupe e maua e muamua lava ona tapa e le ulugalii. Sa molimau foi se tasi o tama, e masani ona ia ave tupe i le ulugalii pe a o atu le ulugalii ma tamaitai.

O le tele lava la o tamaloloa e feusuai ma tamaitai sa nonofo i le fale o le ulugalii lenei, o i latou mai Saina, lea o loo galulue faakonekarate i le fausia o nisi o galuega tetele a le malo.

MOLIA LE FAIAOGA FAAOOLIMA

Ua faamaonia e le faamasinoga faaitumalo le moliaga o le faaoolima faasaga i se tamaitai faiaoga ona o le faalavelave sa ia faaoolima ai i se teineititi o lana vasega, ae ua faaleaoga le faasalaga faasaga i lenei tamaitai faiaoga. O lenei faalavelave na tulai mai i le aoga tulaga lua a Vaie’e, Safata lea na maliu ai se teineititi na o le 8 tausaga le matua. Na maua i le taimi o le faamasinoga, na fasi e le tamaitai faiaoga ua molia nei lea teineititi e faaaoga ai se vase laau.

O le lua i le tolu aso talu ona sasa lea teineititi ae tulai mai ai loa se faalavelave i totonu o lona aiga ma sa faapea ona tili atu ai o ia i le falemai. Peitai na maliu ai lava o ia. i suesuega faapitoa a fomai sa faatinoina i le tino maliu o lea teineititi, na maua ai e leai se aafiaga o le sasaina e le faiaoga o lea teineititi ma lona maliu. Sa faapea ona faamautu ai e faapea, o le maliu o lea teineititi na mafua mai i ma’i o lo o aafia ai lona fatu. Sa faapea foi ona faaleaoga ai ma le moliaga o le fasioti tagata faasaga i lea tamaitai faiaoga ae suia i le faaoolima. E ui ua faamaonia le moliaga o le faaoolima faasaga i lea tamaitai faiaoga, peitai e lei faia i ai se faasalaga faafalepuipui ona tulaga lelei e lagolagoina ai o ia, e pei o le uluai taimi lenei ua molia ai o ia i le tulafono, atoa ai ma lipoti lelei mai le aoga sa faiaoga ai ma lona afioaga. Ua maea foi ona faatino e lea tamaitai ma lona aiga se ifoga ma ua talia foi e le aiga o le ua maliu.

Na faailoa e lea tamaitai faiaoga lona agaga faafetai i le faaiuga ua tuuina atu e le faamasinoga ma ua sauni foi o ia e toe foi i lana galuega. Fai mai a ia, ua tele se lesona ua ia maua i le faatinoina o le galuega ona o lea faalavelave.

MANAO LE TAUTUA SAMOA E SAUNI E LE MALO SE NOFOAGA MO LE AU FAIPISINISI

Ua finagalo le taitai ma le vaega faaupufai o le Tautua Samoa, e tatau i le malo ona fuafua lelei se nofoaga e agai i ai le au faipisinisi i le Maketi i Fugalei, a o sauni le toe fausia o le Maketi o lo o i ai i le taimi nei. i se feiloaiga ma tusitala i le vaiaso nei, na saunoa le afioga ia Palusalue Faapo II, faapea le afioga ia A’eau Peniamina Leavai, o le nofoaga o lo o latou faatuina mai e agai i ai le au fai poloka i le maketi, o le nofoaga faasao lea e i luma ane o le maota talimalo o le Tanoa Tusitala i Sogi, e faatu ai ni faleie.

E pei ona silafia, o le vaiaso faaiu lenei e tatau ona tapena uma ese ai le au faipisinisi laiti i le maketi i Fugalei, a o le i amatalia galuega i le toe faaleleia o le maketi, ma o se mataupu ua tele ai foi tala aave i peau o le ea a le au faipisinisi o loo i ai, ma lo latou faagaulemalie i le leai o se nofoaga e agai i ai.

O le Faalapotopotoga o Taui mo Faalavelave Faafuasei, le ACC, o loo gafa ma le faatinoga o lea faamoemoe a le malo, ma na tapa se finagalo o le afioga i le alii pule, le tofa ia Malaeulu Lose Niumata i le mataupu ua laga mai e le Tautua Samoa. Peitai na saunoa Malaeulu, e le o mafai ona ia tali i lea mataupu, ona ua maea ona oo atu le mataupu i le palemene, ma le taitai o le malo, e pei ona i ai le savali a le au fai pisinisi na faia a o tauaofia le fono aoao faitulafono i Tiafau. Na faaalia e Malaeulu, e faigata tele la ona toe faaali sona finagalo i lea tulaga, e ui ua laga mai e le Tautua Samoa, ae o se mataupu ua manino ona faamalamalama mai lava i le amataga, o loo avanoa le maketi i Vaitele e agai i ai le mamalu o le au faipisinisi.

E ui i lea, na faaalia e le taitai o le itu agai, o se mataupu e patino tonu lava i le afioga i le palemia peitai, o lo o malaga le afioga i le palemia i fonotaga faavaomalo i atunuu mamao.