FALEPUIPUI LE TOATOLU E AOFIA AI LE AUSO TOALUA i LE FASIOTI TAGATA

Ua maea nei le faamasinoga o le fasioti tagata na maliu ai se taulealea mai le motu tele i Salafai o Tui Mareko, i se faalavelave na tulai mai i Vaitele-uta i le tausaga 2010 i luga o le magaala o le Papata Street. O le iuga o lea faamasinoga ua faamaonia ai nei moliaga o le fasioti tagata pa’ivalea faasaga i le auso e toalua o Tavita ma Felise Sanele.

O Felise Sanele, sa 19 tausaga i le taimi na tupu ai le faalavelave, ua faasalaina nei i le lima tausaga ma masina e 10 i le falepuipui, ao lona uso o Tavita ua faasalaina i le fa tausaga ma masina e 10 i le falepuipui. O Tavita sa aoga o ia i le iunivesete aoao o Samoa i mataupu tau saienisi i le taimi na tulai mai ai lea faalavelave, ma sa taofia mo se taimi le tumau ana aoaoga ao talia le iuga o lona faamasinoga. Ua faasalaina foi i lenei lava mataupu se alii e igoa ia Paulo Fosi ona o lona auai ma ua solo atoa nei o ia i le toese.

O le faasalaga aupito i mamafa lea mo lea ituaiga moliaga. O le ua maliu o Tui Mareko, 20 ona tausaga, na malaga mai Savaii e momoli mai se tasi o lona aiga e nofo aoga i Upolu, ae ua aafia ai fua o ia i le fe’eseeseaiga na tulai mai i le va o tamaiti o lona aiga ma nisi tupulaga talavou. O le afioga Faamasino Pierre Slicer sa faafoeina lea mataupu i le faamasinoga i le fesoasoani a faatonu o le faamasinoga.

MAEA LE FAAFOUINA O LE FALEAOGA TULAGA LUA A MOATAA

Ua maea nei le toe faafouina o le faleaoga a le aoga tulaga lua a le afioaga o Moataa ma o le vaiaso nei na tatala aloaia ai lea galuega sa faagasolo i le lata i le lua masina. E pei ona lipotia muamua i a tatou tala, o lenei faleaoga sa fogafalelua. Peitai sa fautuaina e le komiti a le kapeneta mo le itu tau aoaoga, le tala i lalo o le fogafalealuga ona ua le toe saogalemu mo alo ma fanau o lo o aotauina ai.

O lea la ua maea ona toe fausia le faleaoga ma ua toe faaopopo foi isi potu aoga fou. E $114,000 le tinoitupe atoa sa alu i lea galuega lea e aofia ai ma le fausia o ni fale le taua ma se faletusi fou, ma o lea tupe sa tagi lava i lima e pei ona faailoa mai e le afioga i le Aoe’e ia Asi Tuiataga Semisi Blakelock, o le taitaifono o le komiti o le aoga. Na ia faaalia foi, o le naunautaiga ina ia faaleleia atili le nofoaga o lo o aotauina ai alo ma fanau o lo latou afioaga faapea isi afioaga lalata ane. O le taimi nei, e lalata i le toa 400 tamaiti o lo o aooga ai ma ua pa’u lea fuainumera pe a faatusatusa i tausaga ua mavae.

O le faafeagaiga taulagi o le Ekalesia Faapotopotoga Kerisiano i Samoa i le afioaga, le susuga Rev. Dr. Taipisia Leilua sa taitaia le sauniga e tatala aloaia ai lea galuega. O le malosi lava o le afioaga sa faatinoina lea galuega i le 11 vaiaso.

TALOSAGA LE TAITAI O LE ITU AGAI INA IA ALOAIA LANA KAPENETA FAAOLIOLI

Ua faatalosagaina le malo e le taitai o le itu agai, le afioga Palusalue Faapo II, ina i ai se faiga faavae a le malo e aloaia ai lana kapeneta faaolioli. O le finagalo o le taitai o le vaega faaupufai o le Tautua Samoa, o le tali atu lea i le saunoaga a le alii palemia, le susuga Tuilaepa Lupesoliai Malielegaoi e faapea, o le faatauaina o le kapeneta faaolioli a le itu agai o se tasi lea o faiga malo lelei.

O lea saunoaga a le alii palemia na taualuga ai le soalaupuleina o le tala faatatau o le tupe a le malo e le palemene, ma ia ave ai foi le faamalo i le itu agai mo le fesiligia o le malo i vaega eseese o le tala o le tupe, aemaise o faiga faavae o lo o limataitaiina ai fuafuaga fai uma mo le mamalu lautele o le atunuu. O sui o le kapeneta faaolioli (Shadow Cabinet) sa tutulai e fesiligia minisita o matagaluega eseese e uiga i a latou tala faatatau o le tupe sa soalaupuleina.

LEAI SE SUIGA i LAFOGA A TAGATA MALAGA i AMERIKA SAMOA MAI FAGALII

O le a leai se suiga i lafoga mo i latou e tuua le atunuu mo Tutuila, Amerika Samoa i le malae vaalele i Fagalii, ao tulata le taimi e siitia ai le tau o lafoga mo tagata femalagai uma e tuua Samoa i le malae vaalele faavaomalo i Faleolo. Toe lua nei vaiaso ona faatino lea o le siitaga i lafoga e pei ona ua uma ona pasia e le pulega o le malae vaalele e le gata mo tagata malaga e tuua Samoa, ae faapea foi le pakaina o taavale i totonu o le malae vaalele.

O le aso muamua o le masina fou o lo o fuafua e amata ai lenei siitaga, o lafoga mo tagata matutua o lo o $40 o le a siitia nei i le $65, mo le fanau e i le va o le 2 ma le 15 tausaga le matutua, o le a $15, ao lalo ifo o le 2 tausaga e le leai se totogi. Mo taavale uma e agai atu i totonu o le malae vaalele, ua siitia nei le $2 o lo o i ai nei i le $5, vagana ai taavale tetele e pei o loli ma pasi o le a siitia i le $10. Ua 14 nei tausaga faatoa faamamaluina lea o se siitaga i ia tautua a le pulega o le malae vaalele, ma o tupe uma e maua mai ai o le a toe faaaogaina i le toe faaleleia atili vaega eseese o le malae vaalele.

TOE FAAOPOPO FAASALAGA O SKIPPY AFIOGA i LE FAIAIGA FAAMALOSI

Ua toe faamaonia nei i luma o le faamasinoga maualuga isi moliaga o le mataifale ma le faiaiga faamalosi faasaga i le alii pagota o Skippy Afioga, ma ua toe faaopopo ai nei ona tausaga e tuli i le toese i Tafaigata. O lea faaiuga na lauina lea e Faamasino Pierre Slicer. O le ua molia ua ono masina talu ona tuli lona faasalaga i le moliaga na molia muamua ai o lona faiaiga faamalosi lea ma se tamaitai e faaletonu lona mafaufau.

O lea mataupu na faasalaina ai o ia i le ono tausaga ma le ono masina i le toese. Peitai, ua toe faaopopo ai nei ma le 15 tausaga ina ua maea suesuega a le faamasinoga maualuga ma ua faamaonia ai lona ave faamalosia lea o ni tamaitai i lona aiga ma faia i ai ni faiga aiga faamalosi ma le faaoolima ia i latou.

O le mataupu lenei sa faailoa e se tasi o tina sa molimau i le faamasinoga e faapea, e lua aso na ave ai o ia e Skippy i lona aiga, ma sa faamalosi toe fasi o ia. Fai mai lea tina e faapea sa la fetaui ma le ua molia i luga o le pasi ma sa aisi atu ia te ia i se sikaleti ma sa ia tuuina ai le sikaleti. Ona fesili atu o le ua molia ia te ia po o fea a alu i ai ae tali atu o ia e alu e sue se tupe o lona faalavelave. Sa fai atu loa le ua molia la te o, e mafai ona fesoasoani ia te ia ma e faigaluega o ia i le ofisa o le tiute. Sa la o loa. Peitai sa ave o ia e le ua molia i se nofoaga mao uta ma faamaosi ai o ia. Fai mai a ia, e lua aso sa taofia ai o ia i lea nofoaga ma sa iu ina sola ese mai ai.

O lo o manatu le itu a leoleo, e tatau ona amata mai se faaiuga a le faamasinoga i le 12 tausaga, ae na toe iloiloina e le faamasinoga ma toe faaopopo ai i ai le isi tolu tausaga e amata ai le toe faia o le faaiuga a le faamasinoga, ma maua ai loa tausaga e 15 ona o le matuia tele o le solitulafono ua faia e lea alii, aemaise o le umi o le taimi na te ave ai tamaitai i lona fale ma faia i ai ia faiga faamalosi. Na tuuina atu le avanoa mo le ua molia mo sana faamatalaga mulimuli ma sa ia faailoa ai lona salamo ona o le tulaga ua ia faia. Sa ia tautino foi i luma o le faamasinoga, o le a le toe tulai mai se tulaga faapea ia te ia.