MALOLO MANU SAMOA IA EGELANI

E lei manuia le taumafai a le Manu Samoa i lana taaloga mulimuli o lana malaga taamilo i Europa ma le au malosi a Egelani i le taeao ananafi, lea na manumalo ai Egelani i ai e 28 i le 9. O ai a Egelani na maua mai i a latou sikoa e tolu ma sala ao ai a le Manu Samoa na maua mai sala e tolu na kiki e le alii o Tusi Pisi. Peitai e ui i le manumalo ai o Egelani i lea taaoga, na faaalia i tusitusiga i lea atunuu le le malilie o loto ma finagalo o le pulega o le au faapea le toatele o tagata sa maimoa, i le taaalo a le au a Egelani ma ai na manumalo ai.

O lo o lilifa manatu o tagata i le malosi o le finau a le Manu Samoa aemaise i minute amata o le taaloga, e ui o lo o i ai faafitauli sa feagai ai ma le au lea na semanu e solitu ai le au i lea taaloga. Na molimauina foi le lagolago a sui o le au a Egelani i le Manu Samoa ona o faafitauli tau pulega o lo o latou feagai, e ala i le faapotopoto faatasi o au e lua ina ua maea le taaloga ma faia se latou tatalo.

Ae o se tala fiafia mo le Manu Samoa ma ana tapenaga mo le taamilosaga o le ipu o le lalolagi i le tausaga fou, ua lipotia mai le faia o le filifiliga a se tasi o alo o le atunuu sa taalo mo le au a le Hurricanes a Ueligitone i le taamilosaga o le Super 15, le susuga Tim Nanai-Williams. Afai ae taunuu lea fuafuaga a Nanai-Williams, o lona uiga e tatau ona taalo o ia i le au taitoafitu a le Manu Samoa mo vae e fa o le taamilosaga taitoafitu a le IRB lea o le a toe faagasolo i le vae lona lua i Dubai i le amataga o le masina fou.

TOE FILIFILIA SALA THEODORE I LE TOFI PULE SILI

Ua toe filifilia nei mo lana nofoaiga sosoo lona fa, le afioga Sala Theodore To’alepai, i le tofiga pule sili o le Faalapotopotoga o Vaa o Samoa. I se faatalanoaga ma le au tusitala i le vaiaso na tea nei, na taua ai e Sala lona faatauaina o soifua o tupulaga talavou o le atunuu, ma e talitonu o ia, o le saunia o galuega mo tupulaga lalovaoa o le atunuu e tatau ona ave i ai le faamuamua. Fai mai a ia, o le toatele o tupulaga i le talafatai o Apia e tele ina le fia faigaluega i galuega faaseila, seia vagana tupulaga mai afioaga maotua ma Savaii e fiafia lava e galulue i lea galuega e tausi ai o latou aiga e tusa lava pe valavala ma o latou aiga ona o le mamao o atunuu e galulue ai.

Na saunoa Sala, o le taimi nei e to’a 294 tupulaga talavou ua iu mai le aoga faaseila a le faalapotopotoga o lo o galulue nei i luga o vaa i Europa ma Amerika, ae toa 456 i latou ua resitala o lo o faatalitali mo ni avanoa e faigaliuega ai. Na faaalia e le alii pule lona faamoemoega o le a maua nisi avanoa faigaluega i le faiga faapaaga a le kamupani o le Pacific Forum Line, PFL ma le kamupani vaa o le Neptune. O le afioga Sala ua 52 tausaga o lona soifua ma sa aoaoina i le Kolisi o Sagato Iosefo.

FINAUINA FANUA I LE TAULAGA

O lo o faaauau ona faatalatalanoaina i luma o le vaega o Tufuga o Faatofala’iga po o le mediation, le mataupu tau fanua o lo o aafia ai nisi o fanua i totonu o le taulaga i Apia lea e aofia ai ma fanua i Mulinuu. E eseese uma itu o lo o finau i lea mataupu, pei foi ona faailoa e se tasi o aiga e le o fia faailoa o latou suafa, o nei fanua ua leva ona tuuina atu ai le latou tagi i le Faamasinoga.

Na faailoa foi e se tasi o itu o lo o finauina lenei mataupu, o le tausaga e 2000 na tuuina atu ai la latou mataupu i luma o le Faamasinoga o Fanua ma Suafa, ina ia toe tuuina atu pule o nisi o nei fanua i le latou aiga. Ae na faamanino e lenei aiga, o se mataupu o le a aafia uma ai loa tagatanuu o Samoa atoa, ona o fanua ia o lo o finauina, o lo o i totonu lava o le taulaga. E le i mafai ona maua mai se atoaga o lenei mataupu, ae pau le tulaga ua mautinoa, ua faatalatalanoaina nei lea tulaga e itu uma o lo o finauina pule o nisi o nei fanua, i le vaega o Tufuga o Faatofala’iga mo se autasiga.

TOE FAALELEIA LE MAOTA O LE ALOFA

O le toe faaleleia o le Fale o Tina po o le Maota o le Alofa i Apia, o se tasi lea o mataupu na laga i le faamanatuina o le 46 tausaga o le Fono Aoao a Tina o Samoa i le aso vaiaso na te’a nei. E pei ona silafia, o le maota muamua lea sa faataunuuina ai le tele o sauniga faapitoa a le atunuu i tausaga ua tuanai. Peitai o aso nei, ua vaaia ma le faanoanoa le tulaga faaletonu ua i ai nei lea maota.

O ananafi na aofaga potopoto ai sui o le Fono Aoao a Tina o Samoa i le Maota o le Alofa mo le faamanatuina o le 46 tausaga talu ona faavaeina le latou faalapotopotoga. Na faaalia e le tina ia Makerita Asiata mai le itumalo Satupaitea ua amata faagasolo a latou sailiga seleni mo le toe faaleleia o le Maota o le Alofa. Na taua foi e le tina ia Makerita, sa maopopo lava itumalo o le latou faalapotopotoga, e 13 mai Upolu ma le ono mai Salafai, peitai ua amata ona vaaia le faamaamulu o nisi.

MANUMALO LE LIONA MAI LAULII

Ua manumalo le au a le Liona mai Laulii i le vae lona lua o le taamilosaga taitoafitu a le atunuu ina ua manumalo i le au a le SCOPA e 34-19 i le faiuga o le vaiaso na tea nei i Tuanaimato. I le vaega o le ipu mafolafola po o le plate, na manumalo ai le au a Vaiala ia Moataa i se taaloga taufao e 19 i le 17, ae faatoilalo e Maloisi le au a Vailele i le vaega o le ipu faaofuofu poo le bowl, e 21 i le 14.

Na faaalia le agaga fiafia o le faiaoga a le au a Laulii, le susuga Seneuefa i le taumafai a lana au ma na ia taua, o le amataga lea o le latou finau mo le puipuia o le siamupini o lo o latou umia mai le tausaga na tea nei. E pei ona silafia, o le taimi muamua lea ua ausia ai e le Liona mai Laulii le siamupini o le taamilosaga taitoafitu a kalapu lakapi i Samoa, lea sa latou faatoilalo ai le au a Vaiala i le tausaga na tea nei.

Saunia: Lilomaiava Andrew Fa’asau, Naenae Productions