Ads by Google Ads by Google

TALA MAI SAMOA

MANAOMIA TELE LE SOSI FEU A SAMOA

 

O se faafitauli tele na tulai mai i le faalauiloaina o oloa a Samoa na faatautaia i Aukilani i le tausaga nei e talitonu le malo, e manaomia le uunaia malosi o le au gaosi oloa i le atunuu, ona ua maua maketi faavaomalo, ae ua le gafatia le tali atu i manaoga o ia maketi.

 

Na faailoa e le afioga i le sui palemia, le afioga  Fonotoe Nuafesili Pierre Lauofo Meredith, e manaomia le lava o oloa ina ia le toe tulai mai ai se faaletonu i fefaatauaiga ma maketi e pei ona tulai mai i le oloa o le fagu sosi feu a Samoa, lea e lei mafai ona tali atu i manaoga a nisi o kamupani tetele na matuai manaomia lea oloa.

 

Na faamanino foi la e le pule sili o le Matagaluega o Pisinisi, Alamanuia ma Leipa, le susuga Auelua Samuelu Enari, o le galuega patino lava lea a le malo o le sailili i auala e mafai ai ona faaleleia pisinisi tumaoti ma o latou atinae, ma e manaomia foi le galulue faatasi o le au faipisinisi ma le au gaosi oloa i le faia o le latou pito laau.

 

FANAU LAITI E AAFIA I LE TULAFONO

 

O le aafia ai o fanau laiti i le tulafono ma le ituaiga fesoasoani e manaomia e fanau ona o se solitulafono, o le faamoemoe maualuga lea o se aoaoga na faagasolo i le vaiaso nei, lea sa valaaulia faapitoa ai alii ma tamaitai loia Samoa, faapea sui o le Faamasinoga. Na faailoa e le peresetene o le Sosaiete a Loia Samoa, le susuga Mareva Betham Annandale, o le agaga maualuga lava ia mafai ona tuuina mai fesoasoani i le galuega faaloia mo le faafoeina o mataupu e aofia ai le fanau laiti e aafia i le tulafono, po o fanau foi o lo o fetosoaina ona o feeseeseaiga faaleaiga ona o matua, atoa ai ma fanau o lo o aafia pe ua le saogalemu i totonu o latou lava aiga.

 

O lo o i ai la se fesoasoani faapitoa a le malo Niu Sila o lo o faatinoina atoa ai lenei aoaoga, e aofia ai le tamaitai Faamasino Samoa ia Ida Malosi o le Faamasinoga o Mataupu Tau Aiga a Niu Sila, lea foi sa avea ma Faamasino o le Faamasinoga Maualuga I Samoa nei, o sui o le Faamasinoga o le malo Niu Sila, o le vaega o leoleo faatasi ai ma le fesoasoani I mataupu tau le mafaufau, e i ai se tamaitai Samoa o lo o galue ai i lea tulaga I Niu Sila, le susuga Dr Julia Ioane.

 

LAGOLAGO E LE OLOPELEKI LE MANU SAMOA

 

Ua faaalia le lagolago a nisi o tama taaalo o le Olopeleki a Niu Sila i fanoga a le au o le Manu Samoa i luga o upega tafailagi. E toasefulu tama taaalo o le Olopeleki e aofia ai Keven Mealamu, Sonny Bill Williams, Jerome Kaino, Julia Savea, Dan Carter ma Charlie Faumuina ua pu’e se latou ata ma se saini o lo o tusia ai upu Samoa United po o le Samoa Tutufaatasi.

 

E pei ona lipotia e le au tusitala faavaomalo i le vaiaso na tea nei, ua laga e nisi o sui sinia o le Manu Samoa o latou atugaluga i le pulega ma le taitaiina o le Iuni Lakapi a Samoa ma sa latou faamatauyina le iuni o le a latou le taaalo i le taaloga faitaulia ma le au a Egelani i le faaiuga o le vaiaso nei pe afai e le faia se faatatau a le iuni ii a atugaluga. O ia atugaluga e aofia ai le mananao o ia sui o le Manu Samoa ina ia faamavae ni sui se toalua o le komiti faapea mataupu e faatatau i o latou alauni.

 

FAATAUTO PISIKOA FOU I SAMOA

 

E to’a 13 pisikoa fou sa faatauto i se sauniga faapitoa ile taeao o le aso Faraile na tea nei ina ua maea le fitu vaiaso o polokalama faamasani i le gagana ma le aganuu Samoa, ma ua sauni e galulue i aoga tulaga lua i Upolu, Manono ma Savaii mo le aoaoina o le gagana faaperetania. O le vaega lona 86 lea o alii ma tamaitai Pisikoa mai Amerika ua ofo e galulue i Samoa. Sa auai i lea sauniga ia sui o aiga sa api ai ia pisikoa, o pule aoga o aoga o le a galulue ai i latou faapea sui o le Matagaluega o Aoga, Taaloga ma Aganuu. Sa faatautoina i latou e le faauluuluga le tumau o le ofisa o le amepasa o Amerika i Samoa, le susuga William Barkell, ona talia aloaia ai lea e le minisita o Aoga, le afioga Magele Mauiiliu Magele e avea ma sui o le malo. Na maitauina le talavou o alii ma tamaitai pisikoa e to’a 13 ma sa faafetaia e le afioga Magele ia alii ma tamaitai ua ofo mai o latou soifua talavou e galulue i le aotauina o alo ma fanau lalovaoa o le atunuu.

 

TAUTUA MO E FAALETONU LE FAALOGO 

 

O le vaiaso na tea nei o se vaiaso faagalogata mo le silia i le toaselau o tagata matutua i le motu tele i Salafai sa i ai faafitauli i o latou taliga sa le lelei ai le latou faalogo, ona sa maua le fesoasoani mo i latou e ala i totoga faalogo faaneionapo sa faapipiina i o latou taliga, ma mafai ai ona latou faalogoina nisi o leo ua leva e lei mafai ona latou lagonaina.

 

O lea galuega alofa sa faatinoina e sui o le faalapotopotoga o le SENESE lea sa malaga faapitoa atu i Savaii e faatino lea galuega mo o latou sui i Salafai sa feagai ai ma le faafitauli o le lelei o le faalogo. O le faapipiina o ia totoga faapitoa i taliga o i latou sa i ai ia faafitauli aemaise o tagata matutua, na pei o se vavega mo i latou ina ua ki ia totoga faalogo ma faapea ona lagonaina ai mo le taimi muamua i le tele o tausaga, ia leo o le soifuaga i aso uma e le ano i ai tagata o lo o lelei le faalogo.

 

Saunia: Lilomaiava Andrew Fa’asau, Naenae Productions