SOLOFUA MOLIAGA FASIOTI TAGATA PA’IVALEA

E toatolu ni taulelea na molia faatasi i le fasioti tagata faamoemoeina ona o se latou inuga pia na faaoolima ai ise isi alii ma maliu ai. O Oketopa o le tausaga ua mavae na tupu ai lea faalavelave ma molia ai loa Elisitia Peniata, Loi Apa’au ma Talitonu Lei’ataua. Sa tete’e uma i latou ile moliaga ae ina ua maea suesuega a se laulau o faatonu na taunuu ai ise faaiuga e le faamaonia le moliaga o Elisita ae o Loi ma Talitonu e le faamaonia le fasioti tagata faamoemoeina ae faamaonia le fasioti tagata pa’ivalea. I le faamsinoga o talosaga apili a le atunuu lea na tauaofia ile vaiaso ua mavae na suesueina ai le apili a Apa’au ma Lei’ataua faasaga ile faaiuga na faamaonia ai o la moliaga.

O iloiloga a le faamasinoga maualuga na faaalia ai i molimau a leoleo o se tasi le tu’i malosi a Elisita lea na palasi ai i lalo le ua maliu ma faapea loa ona feosofi atu Loi ma Lei’ataua ma feaa ma fekiki. Peitai ile molimau a le fomai na faia le suesuega o le mafuaaga o le maliu na faaalia ai e mafai ona faapea o le tui malosi e tasi na tau ise vaega o le ua o le ua maliu na mafua ai ona uma lona soifua, peitai na molimau nisi sa iai ile faalavelave na palasi ifo i lalo le ua maliu tau lona ua ise puipui piliki o le fale na fai ai le inuga. Na maua foi i suesuega a le fomai faapitoa ni uno’oa ma ni solouli ile ulu o le na aafia ma e mafai foi ona faapea o le mafuaga lea o le maliu.

Peitai o le iuga a le faamasinoga o talosaga apili ua soloia ai moliga o le fasioti tagata pa’ivalea o Loi ma Talitonu. Fai mai le faaiuga afai na taunuu le laulau o faatonu ise taunuuga ua le lava molimau a leoleo e faamaonia ai le moliaga fasioti tagata faamoemoeina o Elisita, sa tatau ona faia foi le faaiuga lea e tasi o le le faamaonia o moliaga o ia taulele’a e to’alua. Ua saoloto ai nei Apaau ma Leiataua.

LOKA LE TINA FAATAU MARIUANA

Ua famaonia mai e le komesina lagolago o le Matagaluega o Leoleo, le susuga Afamasaga Michael Soonalole, le nofo taofia ai lea o se tina i lalo o le vaavaaiga a leoleo, ao faagasolo a latou suesuega i lona umiaina lea o ni fualaau faasaina o le mariuana. O le maua ai o lenei tina ma le taofia ai e leoleo, e mafua i se faasea a se tasi o tama i le Ofisa o Leoleo i Faleolo, na ia faailoa ai i leoleo lea tulaga, ona o se tina na tago ave ni mariuana i lona atalii e 17 tausaga lona matua. I suesuega a leoleo na latou maua ai lea tina mai Fasitoo-tai ma faia i ai suesuega ma taofia ai loa.

O suesuega o lo o agai i mafuaaga o le ave ai e lea tina o nei mariuana i se tamaititi, ona o se tasi foi lenei o popolega i le matagaluega, i le ono aliae mai ai o ni faiga faasolitulafono, o le faaaogaina lea o tamaiti ma tupulaga talavou e nisi e tulei ma faatauina atu le mariuana. Na faailoa foi e Afamasaga, e leai ni moliaga faasolitulafono o faia faasaga i le tamaititi e 17 tausaga lona matua lea o loo aafia i lenei mataupu.

LOKA LE TOALUA O LE TAMAITAI TOGA

E 32 tausaga o se alii mai Lalovaea ua faasalaina e le Faamasinoga Maualuga i le falepuipui mo le 11 tausaga ina ua faamaonia lona moliaga o le taumafai e fasioti tagata, ma le moliaga e tasi o le faaoo manua tuga. E pei ona lipotia muamua i a tatou tala, o le alii lenei o Talapelo Soi sa ia faaaogaina se agaese e faaoo ai ni manua tuga i se tamaitai Toga sa la nonofo. Na faaalia i faamaumauga a le Faamasinoga e faapea, sa oo atu lea tamaitai Toga i le Toomaga mo e Puapuagatia ina ua tete’a ma lona toalua ona o le fasi ava o lea alii.

O se tasi o aso ao galue o ia i le fale oti ulu i Matautu-tai, ae oo atu loa Soi ma se agaese ma ia osofaia ai o ia ma sa tuga manua o lea tamaitai. Na laki o ia ina ua mafai ona sola ese ma auina atu ai loa e se taavale lau pasese i le falemai. Na faaalia i le lipoti a le falemai e faapea, e 16 aso o faataotolia lea tamaitai i le potu mo gasegase tigaina, ICU ma sa iu ina manuia ona togafitiga. Sa faamauina ai foi le maua e leoleo o Soi o taumafai e alu atu i le potu o lo o faataotolia ai lea tamaitai e toe faaoolima ia te ia. Na fetaui lea ulugalii ao aooga i Fiti ma sa malaga mai ai loa i Samoa ma nonofo ai.

Saunia: Lilomaiava Andrew Fa’asau, Naenae Productions