AOAOGA FAAPITOA MO LE FAUSIA O FALE SAMOA

O le vaiaso nei sa faagasolo ai se aoaoga faapitoa ua faatupeina e le lala o Malo Aufaatasi, le UNESCO, mo le puipuimaluina o tomai ma agavaa i le fausia o fale faaleaganuu a atunuu eseese o le Pasefika. Sa auai i lea aoaoga sui mai atunuu eseese o le Pasefika ma sa faatautaia lea i le Aai o Aganuu Faasamoa i Siusega.

Na faaalia e se tasi o tufuga faufale Samoa sa auai i lea aoaoga, le susuga Maulupe Faatali Faiga, o se tulaga ua alagatatau tele le aofia ai o le aoaoina o ia tomai ma agavaa i mataupu o aoaoga a alo ma fanau. Na saunoa le tufuga mai le afioaga o Saipipi, na o le pau lea o le auala e faamautinoa ai le pupuimalu o fausaga o fale Samoa moni mo tupulaga lalovaoa o le atunuu. Fai mai a ia, ua tauau ina mou atu lea tomai a o tatou matua ma tua’a ua lagomau mai i Tia Sa ma ua tatau i le malo ona faatulaga se polokalama faapitoa e puipui ma faasao ai.

Na faafetaia e Maulupe nisi o tupulaga talavou sa auai i lea aoaoga ma na ia faaalia, o i latou o le lumanai o le atunuu ma ua tatau ona latou malamalama lelei i le fausia o lenei measina a lo tatou atunuu. Na faaalia foi ona popolega i le matuu atu o fausaga o fale Samoa i tagata mai i si atunuu.

FA’ATONU IUNI LAKAPI A SAMOA TOTOGI SILIA MILIONA TALA

Ua faatonuina le Iuni Lakapi a Samoa e totogi lana aitalafu e silia ma le tasi le miliona tala i le kamupani mai Ausetalia o lo o saunia toniga a au lakapi a le atunuu e aofia ai le manu Samoa. E lei faailoaina mai le aofaiga atoa o le tupe o lo o aitalafu ai le iuni i le kamupani o le B.L.K. Sportswear mai Ausetalia, ae na faamaonia mai e le teutupe a le iuni, le susuga Tamaleta Taimang Jensen, le faatonuga mai lea kamupani ina ia totogi atu loa le aitalafu.

Fai mai a ia, e amata mai i le 2012 lea aitalafu ma o lo o tau faaopopo uma a latou pili e iloa ai le aofaiga atoa o le aitalafu. Na faailoa e Tamaleta, e ui sa totogi peimeni a le iuni o lea aitalafu, ae sa lei ausia tuutuuga e pei ona malilie i ai ma le pulega o lea kamupani, o lea la ua talosaga mai ai le kamupani ina ia totogi atoa atu loa le aofaiga o le aitalafu.

FAAUI I TUA MOLIAGA O LE MINISITA LAGOLAGO

Ua toe faaui i tua se tasi o moliaga sa faaulu faasaga i le alii minisita lagolago o le Matagaluega a le Palemia, le afioga Peseta Vaifou Tevaga. O le vaiaso nei na tuuina atu ai e Faamasino Faaitumalo Fepuleai Ameperosa Roma le faatagaga i le itu a le malo e toe faaui ai i tua se tasi o moliaga e tolu sa faaulu faasaga ia Peseta, o le ave taavale e aunoa ma se laisene ave taavale. Na logoina le Faamasinoga e faapea, ua faamaonia o lo o i ai le laisene ave taavale e le ua molia.

Peitai, o lo o tumau pea moliaga e lua faasaga ia te ia, o le ave taavale faasua’ava ma le ave taavale faatamala. O lo o teena e le alii minisita lagolago ia moliaga. O ia moliaga e mafua  mai i se faalavelave na tulai mai i Maluafou i le ogatotonu o le tausaga nei, lea na lavea ai le taavale a le malo sa faafoe e le alii minisita lagolago. O le alii loia ia Te’o Richard Faaiuaso sa tulai mo Peseta. Ua tolopo nei lea mataupu seia oo i le aso 11 o Fepuari o le tausaga fou.

TATALA ALOAIA LE TALIVAI I MULIVAI, APIA

O le vaiaso nei na tatala aloaia ai se tasi o galuega a le malo, o le talivai i talaane o le malumalu Katoliko i Mulivai, Apia na fausia i le tau e $1.8 miliona tala. O lea gasluega sa faatinoina e le Matagaluega o Punaoa Faalenatura ma le Siosiomaga ma na saunoa le minisita o le matagaluega, le afioga Faamoetauloa Lealaiauloto Dr. Faale Tumaalii, i le sauniga faapitoa na tatala aloaia ai e faapea, o lea poloketi o le tali lea a Samoa i le tulaga fesuisuiai o le tau.

O lea talivai ua tafe lelei ai le vai lea e tafe mai i Tufuiopa ma agai ane a ii le nofoaga o lo o i ai le aoga a Malisi i Mulivai, ma tafe atu ai i le sami. E le taumate o le a tele le aoga o lenei talivai i le faasaoina o le eleele i lea vaega o le taulaga mai le lolovaia i le taimi o le tetele o timuga faapea taimi o faalavelave faalenatura e pei o afa ma galo lolo. Sa faapea ona faapaia lea galuega e le afioga Katinale Alapati Mataeliga. Na faaalia, ua tino mai lea galuega ona o le galulue faatasi o le Komisi o le Iuni a Europa ma le Matagaluega o Punaoa Faalenatura faapea le polokalama fesoasoani mo le afa o Eveni.

Saunia: Lilomaiava Andrew Fa’asau, Naenae Productions