FESOASOANI IAPANI AOGA SALELOLOGA

O le vaiaso nei sa sainia ai le feagaiga ma le Amepasa o Iapani, le susuga Shibuta i le Ofisa o Iapani e ala i le latou fesoasoani e $ 220,000 mo le toe faaleleia o le faleaoga Tulaga Lua a le afioga o Salelologa, ma sa auai atu uma i ai le komiti, le afioga i le peresetene o Matamua Eti faapea le afioga i le tamaitai pule o le aoga a Salelologa o Anapogi Fiu, mo le tauaaoina mai o lea meaalofa taua.

O lenei talosaga sa taulamua ai le failautusi o le komiti le fetalaiga ia Pipi Ioane Va’atausili o ia foi o le pule o le Faletupe o le National Bank of Samoa i Salafai, ae sa lagolago i ai nisi o sui o le nuu pei o le fetalaiga ia Matamua Alapati ma sui o le komiti. O le agaga maualuga ia lelei potu aoga mo le aoaoaina o alo ma fanau a Salelologa i le lumana’i.

AU TAALO A SAMOA MOSOOI

Na iloga ona silamio le au taaalo volipolo faapea le au maimoa i Amerika Samoa i le vaiaso na te’a nei, i le maoa’e o le taumafai a alo ma fanau mai Samoa nei sa tausinio ai i le Liki Volipolo o le Mosooi o lenei tausaga. E lua au na tuufaatasia e le Asosi Volipolo a Samoa ma na toe malolo lava le au a alii I lalo o le 19 tausaga i le sailiga siamupini ma le au malosi o le Tafuna Mizuno, ae sola mai le au a tamaitai i le vaega e le faatapulaaina ni tausaga po o le Open Division ma le ipu, ina ua manumalo i le au a le DGI i le sailiga siamupini.

Na maua e le au a tama i lalo o le 19 tausaga le talita o le tulaga lua ma le faailoga tupe e $400 tala Amerika, ae suipi le au a tamaitai i le ipu o le siamupini ma le faailoga tupe e $800 Amerika. I le Liki Kirikiti Faasamoa o le Mosooi, e lei manuia le taumafaiga a le au kirikiti a le Ainiu Sami mo le siamupini, ae na latou maua le tulaga tolu ina ua manumalo i le ao o le Papaseugogo mai le afioaga o Nua ma Seetaga. Na siamupini le au a le Mosiula mai le afioaga o Masefau ina ua manumalo i le au a Tama o le Muaau mai Faleniu.

Na faaalia e le taitai komiti o le liki, le susuga Sooamaalii Sani Lefaoseu e faapea, o lo o fuafua le latou komiti e valaaulia atu le siamupini o le Liki Kirikiti o le Teuila o lenei tausaga, le au o le Tanifa o le Vao mai Sili i Savaii ma se isi au mai Upolu, i le liki o le tausaga fou.

FAASOLO MANUIA SE TAMAITAI SA AAFIA I FAIGAAIGA FAAMALOSI

Ua matauina le faasolosolo lelei o le tulaga ua i ai le soifua ma le mafaufau o se tamaitai talavou sa taumafai e pule i lona ola ma o lo o i lalo nei o le vaavaaiga a le Toomaga mo e Puapuagatia, e pei ona faaalia mai e le tamaitai pule, le susuga Lina Chang. O lea tamaitai e 19 tausaga na faiaiga faamalosi i ai se alii mai lo latou afioaga, ma sa ia pueina ni ata o ia faia ni uiga mataga ia te ia.

O lea alii e 27 tausaga ua faasalaina nei e le Faamasinoga i le 11 tausaga i le falepuipui ina ua faamaonia moliaga o le faiaiga faamalosi, o le faamata’u o se tagata e faailoa ni mea faatatau i lea tagata ma lona pueina o ata mataga o se isi e aunoa ma se faatagaga po o se maliega. O ia ata mataga sa faasalalau faalauaitele e lea alii i luga o upega tafailagi lea sa suesueina ai loa e leoleo. Na faailoa mai Lina Chang, e ui ua tele le suiga i le amio ma le mafaufau o lea tamaitai, ae e tele lava tulaga moomia e ao ona faia e ala i faatalatalanoaga ina ia faamausali a ii lona mafaufau, o lo o i ai lava le faamoemoe e mafai ai ona soifua e aunoa ma le popole i le faasinosinolima o tagata.

SOIFUA MALOLOINA: “E LEAI SE EBOLA I SAMOA”

Ua teena malosi e le minisita o le Soifua Maloloina, le afioga Tuitama Leao Dr. Talalelei Tuitama, ia lipoti e faapea o lo o i ai se tagata e toatasi i Samoa ua pesia i le faamai oti o le Ebola. E pei ona lipotia mai e le au tusitala faavaomalo, ua faitau afe tagata i atunuu i sauté i sisifo o le konetintea o Aferika ua pesia ma maliliu i lea faamai. O se alii leoleo Samoa sa auai i vaegaau mo le tausia o le filemu a Malo Aufaatasi i se tasi o ia atunuu ua toe taliu ma ii Samoa, ma o lo o masalomia ua pesia o ia i le siama o lea faamai.

Peitai on lo o teena malosi e le Matagaluega o Leoleo lea tulaga. I se faatalanoaga ma le faatonu aoao o le Matagaluega o le Soifua Maloloina, le susuga Leausa Toleafoa Dr. Take Naseri, na ia faaalia ai e faapea, o lo o mataituina ma le toto’a e le matagaluega ia uafu ma malae vaalele aua i latou e ulufale mai i le atunuu pe le o pesia i lea faamai. Fai mai a ia, ua saunia se potu faapitoa e tuu  ai i latou e masalomia ua maua i lea faamai ma o le a auina ane i latou i le falemai i Faleolo mo suesuega.

Saunia: Lilomaiava Andrew Fa’asau, Naenae Productions