TATALA VAALELE FOU A LE POLENISIA

O le aoauli analeila na tatala aloaia ai le vaalele fou a le kamupani vaalele a le atunuu, le Polenisia i se sauniga sa faataunuuina i le malae vaalele i Fagalii, ma na faaalia ai e le alii palemia, le susuga Tuilaepa Sailele Malielegaoi, le igoa o le a faaigoaina ai lea vaa. 

O le tolu ai lea o vaalele a le Polenisia ma na faaalia e le alii palemia, ua a’e se tofa i le alii minisita ma le pulega o le Polenisia, ua tatau ona faaopopo se isi vaalele ona ua fai foi si leva o vaalele e lua o lo o i ai ina nei faaletonu se vaalele ao i ai se isi vaalele e sui ai. Fai mai a ia, ua fetaui lelei foi lea vaalele ma le faatupulaia o faigamalaga i le va o Samoa ma Amerika Samoa faapea foi mai Tutuila i Manua ona o lo o faaletonu foi vaalele a le teritori.

“O se tulaga le talafeagai tele se atunuu e fai ni ana vaalele ae le soo lea atunuu i faigamalaga a ana vaalele,” o a Tuilaepa lea. “E le faapea a gau ona fai ai lava lea. O le mea a atoa le to’a 20 o tagata ua fia malaga i Savaii, ona alu lea pe faatasi i le vaiaso. Ae le faapea o le a le toe alu ai lava se malaga i Savaii.” Na faaalia foi e le alii palemia, o lo o i ai fuafuaga a le malo e faatau nisi vaalele lapopoa atu se lua mai Saina.

FAAVAE E MAHONRI LE RUGBY ACADEMY SAMOA

E maualuga se faamoemoega o lo o i le susuga ia Mase Mahonri Schwalger, o le sa avea ma kapeteni o le Manu Samoa faapea nisi o alo lakapi o le atunuu o lo o galulue faatasi i le polokalame o le Rugby Academy Samoa, lea ua faavaeina ma le faamoemoe e atina’eina ai le faatinoina o le taaloga lakapi mo tupulaga lalovaoa o le atunuu. O lea polokalama e mo I tupulaga talavou tama i le va o le 15-18 tausaga le matutua, e aotauina i tulafono ma tomai eseese i le faatinoina o le taaloga ina ia ausia le maualuga ua vaaia I atunuu e pei o Niu Sila ma Ausetalia i le tulaga faapolofesa ua i ai nei le taaloga.

O le polokalme mo le silafia, o lo o galulue faatasi ai le susuga ia Mase Mahonri Schwalger ma le susuga George Stowers o se tasi foi o sui tuai o le Manu Samoa, faapea le susuga ia Sei Robert Johnston lea o lo o faiaoga nei i le au lakapi a alii i lalo o le 20 tausaga le matutua. Na maitauina le toatele o alo ma fanau sa oo atu i le aso muamua na faagasolo ai le polokalama i malae o le Kolisi o Pesega faapea le mamalu o m atua sa autovaa atu e faaali la latou lagolago i o latou alo. O lo o sailia nisi o tama taaalo talavou e taaalo i au a nisi o aoga i Niu Sila o lo o mananao mai i ni tama taaalo mai Samoa. O i si tama taaalo ua le toe aooga o lo o latou taumafai e maua ni a latou konekarate e taaalo a ii kalapu i Niu Sila.

MANU’A TUGA I SE AGAESE

E 28 tausaga o se alii mai Faleaseela, Lefaga o lo o i le va o le oti ma le ola i le falemai i Motootua, ona o ni manuaga tuga mai se agaese e mafua mai i se feeseeseaiga lea na iu ina osofaia ai o ia e se i si alii i se agaese. Na lipotia atu i leoleo lea faalavelave i le vaiaso na te’a neima na faamaonia mai e le sui komesina, le afioga Misa Fotuitaua Nofoito’a Talaimanu Keti e faapea, ua motusi nisi o tamatama’ilima o lea alii ma on lo o i ai ni manua tuga i ona foliga.

Na lipotia mai e faapea, o le ua aafia sa fai se latou inugapia ma nisi alii ma na iu ina tulai mai ai le feeseeseaiga ua manua tuga ai o ia. O lo o taofia nei e leoleo se alii e 44 tausaga i lenei faalavelave ma ua molia nei o ia e leoleo i moliaga o le faaoo manua tuga i se tasi, ma o lo o i ai le fuafuaga e faaulu nisi moliaga faasaga ia te ia.

FAAOOLIMA I SE TAMA E 80 TAUSAGA

E 33 tausaga o se alii mai Fasitoo-tai na faasala i le falepuipui mo le lua masina i le vaiaso nei ona o lona faaaogaina o se pate ta polo e faaoolima ai i se tama e 80 tausaga. E oo mai i le taimi nei o lo o faataotolia lava lea tama talu mai lea faalavelave i le aso o Iulai o le tausaga nei. Ua auina atu nei o ia i Niu Sila mo togafitiga ma o lo o i se tulaga tigaina. Na otegia e le tamaitai faamasino o Matav Tuatagaloa le alii o Sialeipata Moe i lona faaoolima i lenei tama matua.

 “E le taitai faatusalia lou malosi ma le malosi o le tama na e faaoolima i ai,” o a Faamasino Tuatagaloa lea. “Ana e le faasua’ava atonu e i ai se faautauta ia te oe.” O lea faalavelave na mafua ona o se feeseeseaiga a le tama ua aafia ma le uncle o le ua faasalaina. Na faaalia i faamaumauga a le Faamasinoga e faapea, sa alu atu le tama e 80 tausaga ua aafia ina ua ia faalogoina le uncle o le ua faasalaina o ia lafo ni upu masoa i luma o lona fale. Ae sa faamata’u atu le uncle ua faasalaina i le tama ua aafia i se pate ta polo.

Lilomaiava Andrew Fa’asau, Naenae Productions