POLOAIGA O LE UTIUTI O LE SUATIMU

O le poloaiga mo le matutu o le eleele ona o le utiuti o le suatimu lea na faamatuu mai e le Ofisa o le Vaaitau i le faaiuga o le vaiaso na te’a nei, ua faapopoleina ai nisi o le mamalu o le atunuu. O lea poloaiga mai le Vaaitau na faamatuu mai ina ua maea le lapataiga mai le Pulega o le Tinei Mu ma Faalavelave Faafuasei, na lapataia ai le atunuu ina ia matua faaeteete i le soona tutuina o afi ona o le mago o le tulaga ua i ai le vao i nisi o vaega o le atunuu e puipuia ai mai ni mu sosolo.

Peitai na saunoa mai le faauluuluga o le Ofisa o le Vaaitau, le susuga Mulipola Ausetalia Titimaea, ma ia faamalamalama le uiga o le poloaiga ua tuuina mai e lona ofisa. Fai mai a ia, o le upu ‘poloaiga’ lea e faaperetaniaina o le ‘declaration’ ua foliga ai e pei ua ogaoga le tulaga ua i ai le utiuti o le suavai. Peitai na ia faaalia, o lea faaupuga e faaaogaina i le galuega faavaaitau e faaigoa ai tulaga eseese o lapataiga e loglogo puialii ai le atunuu. Na ia faamalamalama e faapea, o lea poloaiga e mo nai vaega o le atunuu ma o se faamanatu foi i le atunuu ina ia taumafai e faasao le suavai ma aua le faaaogaina faaletatau.

O vaega o le atunuu ua maitauina le pau maualalo o le suatimu mai le tulaga sa i ai muamua e aofia ai le vaega i matu ma le ogatotonu o le motu o Upolu mai Saoluiafata, Apia i Faleolo, faapea le vaega i sasa’e o Savaii mai Maota, Tuasivi i Vaipouli.

FAATE’A MAI LE NUU LE TOTOGIA 100 AUMATUA

Ua faate’a mai le afioaga o Auala i Savaii le tama o Puipui Isaako ma lona aiga ona o le musu o le tama e totogi le sala e 100 aumatua na faasala ai e le fono a tamalii ma failauga a lo latou afioaga. O lea sala e mafua mai i le totoina e lona atalii o Lauoleola Puipui o le laau faasaina o le mariuana. Na faaalia e le tama, sa logoina o ia e lona toalua e faapea sa ia mauaina se tamai laau mariuana na toto e le la tama. Sa ita tele le tama ma sa ia lipotia ai loa lea solitulafono ua faia e lona lava atalii i leoleo atoa ai ma le fono a le latou nuu. Peitai, sa fono le nuu ma faia ai le faaiuga e faasala lea tama ma lona aiga i le 100 aumatua.

Na musu le tama e totogi lea sala. Fai mai a ia, e le talafeagai tele le faasala o lona aiga atoa ona o ia na lipotia le solitulafono a lona lava atalii i leoleo atoa ai ma le nuu. Na ia finau foi e faapea, o lo o i ai lava tulafono a lo latou afioaga ma faasalaga mo se tagata na te totoina, ula pe faatau atu le mariuana, ma na ia faaalia, o le faasalaga o le faate’a o lea tagata mai le nuu ae le o lona aiga atoa. Na tulai Lauoleola Puipui i luma o le Faamasinoga Maualuga ma na ia ioeina lona moliaga. Na tulai foi le tama ma ia talosaga mo se faasalaga mama mo lona atalii ona e faamoemoe i ai le latou aiga i lana tausiga. O lo o faamautu nei la lea tama ma lona aiga i o latou tau aiga i Palisi, ae o lo o faaauau pea iloiloga o lea mataupu i le Faamasinoga.

AOAOGA MO FAIAOGA SAMOA MA TOELAU

Ua faailoa aloaia mai le agaga faafetai tele o le malo Toelau i le malo Samoa tauala i le Matagaluega o Aoga, Taaloga ma Aganuu, e tusa ai ma le faiga paaga ua mafai ai ona faatino se aoaoga sa faatautaia i le vaiaso ua tuanai, na mafai ai e nisi o faiaoga mai le malo Toelau, ona auai i se aoaoga sa faatautaia mo le faalauiloaina lea o le faaogaina o masini faaonaponei, aemaise le poloketi o aoaoga e faaaoga ai le upega tafailagi po o le e-Learning lea o lo o faaaogaina e aoga tulaga lua i Samoa nei. O le faamoemoe maualuga lava o le aoaoga ia faasoa le tomai ma le silafia i faiaoga o Toelau, i le faaaogaina ma le taua o nei masini faaonaponei, i le itu lava tau le aoaoina o le fanau.

E tolu aoga tulaga lua i Toelau lea sa auai mai o latou sui, e aofia ai le aoga tulaga lua a Fakaofo, Nukunonu ma Atafu. Ma ua faailoa mai e le faatonu o lenei faiga paaga le susuga ia Elaine Lameta le taua tele ma le aoga o lenei aoaoga i vaega sa tulimataia, mo le siitia ai o le tulaga tau le aoaoina o le fanau aoga i Toelau, aemaise i le faaaogaina o masini faaonaponei. O le uluai taimi lenei o le a mafai ai ona faatinoina le aoaoina o le faaaogaina o masini faaonaponei i totonu o aoga tulaga lua o le Atu Toelau, ma o se fiafiaga tele lea i le Ofisa o Aoga a le malo Toelau, ona o le a siitia ai foi le maualuga o le faatinoina o aoaoga.

‘OPEN DAY’ IUNIVESETE AOAO O SAMOA

Na tumutumu le laumua o le Iunivesete Aoao o Samoa i le Papaigalagala i alo ma fanau o vasega sinia mai kolisi e 20 i Upolu nei faapea kolisi e tolu mai Savaii, sa molimauina le aso faapitoa o le iunivesete e faalauiloa ai a latou auaunaga faaleaoaoga po o le Open Day. O lea aso faapitoa na lagolagoina malosi e le kamupani o le Blue Sky, o le kamupani o le Samoa Stationery and Books ma le kamupani o le Island Rock.

O le autu o lenei tausaga o le “O le Ala Agai i se Lumanai Mata’alia, Fou ma Gafataulimaina.” Na saunoa le Tapaau o le iunivesete, le afioga Fui Leapai Tuua Ilaoa Asofou So’o, o se tasi lea o aso aupito i taua i le kalena o le iunivesete ona e maua ai le avanoa o alo ma fanau i vasega faauu i kolisi maualuluga, e o atu ai e mataitu mataupu eseese o lo o aoaoina i le iunivesete, ma talatalanoa i faiaoga i mataupu e fetaui ma galuega e fia galulue ai. E le gata i lea, o le i ai foi sui o matagaluega ma ofisa a le malo faapea kamupani tumaoti e faamatala a latou auaunaga eseese i fesoasoani i faiga filifiliga a le fanau i galuega e fia galulue ai pe a maea aoaoga.

Saunia: Lilomaiava Andrew Fa’asau, Naenae Productions